മലയാളിയാണെങ്കിലും കീർത്തി സുരേഷ് തെന്നിന്ത്യയുടെ പ്രിയ നായിക ആണ്. തമിഴിലാണ് കീർത്തി കൂടുതൽ തിളങ്ങിയത്. മഹാനടിയെന്ന തെലുങ്ക് ചിത്രത്തോടെ കീർത്തിയുടെ കരിയർ തന്നെ മാറി മറിഞ്ഞു.
ഇപ്പോൾ കോളിവുഡും ടോളിവുഡും കടന്ന് താരം ബോളിവുഡിലേക്ക് പോകാൻ ഒരുങ്ങുന്നതായി ഇന്നലെയാണ് ഔദ്യോഗിക സ്ഥിരീകരണം വന്നത്. പിന്നാലെ കീര്‍ത്തി സുരേഷിനെ ബോളിവുഡിലേക്ക് സ്വാഗതം ചെയ്തിരിക്കുകയാണ് ബോളിവുഡിൻ്റെ താരപുത്രിയായ ജാൻവി കപൂര്‍.
തൻ്റെ അച്ഛൻ നിര്‍മ്മിക്കുന്ന അടുത്ത ചിത്രത്തിൽ നായികയാകുന്ന കീര്‍ത്തി സുരേഷിന് ഇൻസ്റ്റാഗ്രാമിലൂടെയാണ് ജാൻവി കപൂര്‍ സ്വാഗതം അരുളിയിരിക്കുന്നത്. കീര്‍ത്തിയുടെ ചിത്രം പങ്കുവെച്ചുകൊണ്ട് ജാൻവി ഇങ്ങനെ കുറിച്ചു. ‘മഹാനടി കണ്ടപ്പോൾ മുതൽ താങ്കളുടെ കടുത്ത ആരാധികയാണ് താൻ, ഇപ്പോൾ അച്ഛൻ്റെ പുതിയ ചിത്രത്തിൽ നായികയായുന്നു എന്നറിഞ്ഞതിൽ ഒരുപാട് സന്തോഷം, സ്വാഗതം.’
ബോളിവുഡിൽ നടൻ അജയ് ദേവ്‍ഗണിന്‍റെ നായികയായാണ് താരത്തിന്‍റെ ബോളിവുഡ് അരങ്ങേറ്റം. ‘ബധായി ഹോ’ സംവിധായകൻ അമിത് ശര്‍മ്മയാണ് സംവിധാനം നിര്‍വ്വഹിക്കുന്നത്. തെലുങ്കിൽ മഹാനടിയിലെ അഭിനയം കീര്‍ത്തിയെ പ്രശസ്തിയുടെ കൊടുമുടിയിലെത്തിച്ചിരിക്കുന്ന സമയത്തായിരുന്നു ബോളിവുഡില്‍ നിന്നും കീര്‍ത്തിയെത്തേടി അവസരം എത്തുന്നതായി റിപ്പോര്‍ട്ടുകള്‍ വന്നിരുന്നത്. എന്നാൽ ഇന്നലെയാണ് ഔദ്യോഗിക സ്ഥിരീകരണം വന്നത്.
ഇന്ത്യൻ ഫുട്ബോള്‍ ലോകത്തെ അതികായനായ സയിദ് അബ്ദുള്‍ രഹീമിന്‍റെ ജീവചരിത്രം പ്രമേയമാക്കിയുള്ളതാണ് ചിത്രം. അജയ് അവതരിപ്പിക്കുന്ന സയിദിന്‍റെ ഭാര്യയുടെ റോളാണ് കീര്‍ത്തി അഭിനയിക്കുന്നത്. ചിത്രം നിര്‍മ്മിക്കുന്നത് ബോണി കപൂറാണ്. ചിത്രം പ്രീ പ്രൊഡക്ഷന്‍റെ അവസാന ഘടത്തിലാണ്. ജൂണിൽ റിലീസ് ചെയ്യുമെന്നാണ് അറിയുന്നത്. ശിവ കാര്‍ത്തികേയനൊപ്പം രജനി മുരുഗനില്‍ വേഷമിട്ട്ശേഷം കീര്‍ത്തിയ്ക്ക് നിരവധി അവസരങ്ങളാണ് ലഭിച്ചുകൊണ്ടിരിക്കുന്നത്.
ആര്‍ മുരുഗദോസ്സിന്‍റെ രജിനികാന്ത് ചിത്രത്തിലും കീര്‍ത്തിയുണ്ടെന്നും റിപ്പോര്‍ട്ടുകളുണ്ട്. മുരുഗദോസിന്‍റെ സര്‍ക്കാറിലും കീര്‍ത്തി നായികയായിരുന്നു. പ്രിയദര്‍ശൻ സംവിധാനം ചെയ്യുന്ന ബിഗ് ബജറ്റ് ചിത്രമായ മരയ്ക്കാര്‍-അറബിക്കടലിന്‍റെ സിംഹത്തിലും താരം അഭിനയിക്കുന്നുണ്ട്.
Jhanvi kapoor about keerthy suresh