ഇതാണ് അസിന്റെ സുന്ദരിക്കുട്ടി – ഒന്നാം പിറന്നാളിന് കുഞ്ഞിന്റെ ചിത്രം പുറത്തു വിട്ട് അസിൻ.
മലയാളിയായ അസിൻ തമിഴ് സിനിമയിലാണ് താരമായത്. അതിനു ശേഷം ഹിന്ദിയിലും ചുവടുറപ്പിച്ച അസിൻ, രാഹുൽ ശർമയെ വിവാഹം ചെയ്തതോടെ സിനിമയിൽ നിന്നും മാറി നിൽക്കുകയായിരുന്നു. പിനീട് വന്നത് അസിൻ ഗര്ഭിണിയാണെന്നും പെണ്കുഞ്ഞു ജനിച്ചെന്നുമാണ്. പക്ഷെ കുഞ്ഞിന്റെ ചിത്രം അസിൻ ആരാധകർക്കായി പങ്കു വച്ചിരുന്നില്ല. ഇപ്പോൾ മകളുടെ ഒന്നാം പിറന്നാളിന് കുഞ്ഞിന്റെ ചിത്രം സമൂഹ മാധ്യമങ്ങളിൽ പങ്കു വച്ചിരിക്കുകയാണ് അസിൻ.
“ഒരു വര്‍ഷം മുമ്പാണ് തിളക്കമുളള കണ്ണുകളുളള, സുന്ദരിയായ ഞങ്ങളുടെ മാലാഖയെ ഈ ലോകത്തേക്ക് സ്വാഗതം ചെയ്തത്. അവള്‍ക്ക് ഒരു വയസ് ആയി. കാലം എങ്ങോട്ടാണ് പായുന്നത്? നീ എന്തിനാ ഇത്ര വേഗം വളരുന്നത്. ജന്മദിനാശംസകള്‍ എറിന്‍”, ശര്‍മ്മ ട്വിറ്ററില്‍ കുറിക്കുന്നു.
വിവാഹ വാര്‍ഷിക ദിനത്തില്‍ ആദ്യമായി കുഞ്ഞിന്റെ കാല്‍ വിരലില്‍ മോതിരമിട്ട ഒരു ചിത്രം മാത്രമായിരുന്നു അസിന്‍ തന്റെ ആരാധകര്‍ക്കായി പങ്കിട്ടിരുന്നത്. അതിന് മുമ്പ് കുഞ്ഞ് ജനിച്ചപ്പോള്‍ അക്ഷയ് കുമാര്‍ കുഞ്ഞിനെ നെഞ്ചോട് ചേര്‍ത്ത് നില്‍ക്കുന്ന ചിത്രവും പുറത്തുവന്നിരുന്നു. മൈക്രോമാക്സ് ഉടമ രാഹുല്‍ ശര്‍മ്മയുമായി 2016 ജനുവരി 19നാണ് അസിന്‍ വിവാഹിതയായത്.