ദൃശ്യം 2 വിന്റെ റിലീസുമായി ബന്ധപ്പെട്ട് തിയേറ്ററുകളുമായി കരാറുണ്ടാക്കിയിട്ടില്ലെന്നും അതുകൊണ്ട് ആമസോണ് പ്രൈമില് തന്നെ ചിത്രം റിലീസ് ചെയ്യുമെന്നും നിര്മ്മാതാവ് ആന്റണി പെരുമ്പാവൂര്. സംഭവത്തില് വിമര്ശനവുമായി രംഗത്തെത്തിയവരാരും തന്നെ തന്റെ ഭാഗം കേള്ക്കുന്നില്ലെന്നും ആന്റണി പെരുമ്പാവൂര് പറയുന്നു. ആമസോണ് പ്രൈമുമായുള്ള കരാര് ഇനി റദ്ദാക്കാന് സാധിക്കില്ല എന്നും ആന്റണി പെരുമ്പാവൂര് വ്യക്തമാക്കി.
ദൃശ്യം 2 ആമസോണ് പ്രൈമില് റിലീസ് ചെയ്യുന്നു എന്ന വാര്ത്തയ്ക്ക് പിന്നാലെ ഫിലിം ചേബറും ഫിലിം എക്സിബിറ്റേഴ്സ് അസോസിയേഷന് പ്രസിഡന്റ് ലിബര്ട്ടി ബഷീറും രംഗത്തെത്തിയിരുന്നു. ജനുവരി ഒന്നിനാണ് ദൃശ്യം 2വിന്റെ ടീസര് പുറത്തുവിട്ട് ആമസോണ് പ്രൈമില് റിലീസ് ചെയ്യുന്ന വിവരം അണിയറപ്രവര്ത്തകര് പ്രഖ്യാപിച്ചത്. മോഹന്ലാലും ആന്റണി പെരുമ്പാവൂരും പേരുണ്ടാക്കിയത് തിയേറ്ററില് പടം റിലീസ് ചെയ്തിട്ടാണ്. ആ നന്ദി അവര്ക്ക് വേണ്ടേ എന്നാണ് ലിബര്ട്ടി ബഷീര് പ്രതികരിച്ചത്.