നടനായും ഗായകനായും മലയാളി പ്രേക്ഷകര്‍ക്ക് സുപരിചിതനായ താരമാണ് മനോജ് കെ ജയന്‍. താരത്തിന്റേതായുള്ള വിശേഷങ്ങളെല്ലാം തന്നെ വളരെപ്പെട്ടെന്നാണ് വൈറലായി മാറുന്നത്. ഇപ്പോഴിതാ ഒരു അഭിമുഖത്തില്‍ താരം പറഞ്ഞ വാക്കുകളാണ് സോഷ്യല്‍ മീഡിയയില്‍ വൈറലായി മാറുന്നത്.
പാട്ടു പാടാനുള്ള തന്റെ കഴിവിനെ വളര്‍ത്താത്തതില്‍ മമ്മൂട്ടി ശാസിക്കാറുണ്ടെന്ന് ആണ് അദ്ദേഹം പറയുന്നത്. ‘മമ്മൂക്ക ഇടയ്ക്ക് പറയും ഇയാള്‍ക്ക് ഇത് മര്യാദയ്ക്ക് ഒരു പ്രൊഫഷനായി എടുത്തുകൂടെ? എന്റെയൊക്കെ സ്വപ്നമാണ് മര്യാദയ്ക്ക് ഒരു പാട്ട് പാടണം എന്നത്. ഇന്ന് വരെ സാധിച്ചിട്ടില്ല. ഇത്രയും നന്നായി പാടുന്നതല്ലേ? അച്ഛന്റെ മകനല്ലേ? എന്നൊക്കെ ചോദിക്കും’എന്നും മനോജ് കെ ജയന്‍ പറഞ്ഞു.
തനിക്ക് കിട്ടിയ ഈ ചെറിയ കഴിവ് പിതാവിന്റെ അനുഗ്രഹമാണ് എന്നും അദ്ദേഹം പറഞ്ഞു. ‘എനിക്ക് ചെറിയ രീതിയില്‍ എങ്കിലും പാടാന്‍ സാധിക്കുന്നു എങ്കില്‍ അച്ഛന്റെ കഴിവാണ്. ഇല്ലെങ്കില്‍ ഞാന്‍ അത് ചെയ്യുമായിരുന്നില്ല.
അത് മുന്നോട്ട് കൊണ്ടുപോകാനായി ഞാന്‍ സംഗീതം പഠിച്ചിട്ടില്ല. ചിലര്‍ പറയും ഇനിയും പഠിക്കാം എന്ന്. എന്നാല്‍ ഞാന്‍ ആണ് ഇപ്പോള്‍ ആ പാരമ്പര്യം മുന്നോട്ട് കൊണ്ടുപോകുന്നത്. എന്റെ ചേട്ടനൊക്കെ പാട്ട് പഠിച്ചിട്ടുണ്ട്. എന്നാലും എല്ലാ ഉത്തരവാദിത്തവും എന്റെ തലയിലാണ്’ മനോജ് കെ ജയന്‍ കൂട്ടിച്ചേര്‍ത്തു.