സംഗീത സംവിധായകനായ ഗോപി സുന്ദറും ഗായിക അമൃത സുരേഷും പുതിയ ജീവിതം തുടങ്ങിയിരിക്കുകയാണ്. ഗോപിയോട് ചേര്‍ന്നുനിന്നൊരു ചിത്രവുമായെത്തി അമൃതയായിരുന്നു ഇവരുടെ ബന്ധം പരസ്യമാക്കിയത്. ഗോപി സുന്ദറും ആ പോസ്റ്റ് പങ്കിട്ടിരുന്നു. നേരത്തെ ഇന്‍സ്റ്റഗ്രാമില്‍ ഗോപി സുന്ദറിനൊപ്പമുള്ള ചിത്രങ്ങള്‍ അമൃത പോസ്റ്റ് ചെയ്തപ്പോള്‍ അത് പുതിയ പാട്ടിനായി ഒന്നിച്ചതായിരിക്കുമെന്നായിരുന്നു എല്ലാവരും കരുതിയത്. ദിവസങ്ങള്‍ക്ക് ശേഷമായാണ് ഇവര്‍ തങ്ങളുടെ ബന്ധം വ്യക്തമാക്കിയത്. താനും അമൃതയും വിവാഹിതരായത് സ്ഥിരീകരിച്ച് ഗോപി സുന്ദറെത്തിയിരുന്നു.
ഇതോടെ സോഷ്യല്‍ മീഡിയയില്‍ ഏറ്റവും അധികം ചര്‍ച്ചയായ വിഷയമാണ് ഗോപി സുന്ദറിന്റെ സ്വകാര്യ ജീവിതം. എന്നാല്‍ പലരും വിമര്‍ശിക്കുമ്പോള്‍, അതില്‍ പിന്നെയും എണ്ണ ഒഴിക്കുന്നത് പോലെ വീണ്ടും വീണ്ടും അമൃത സുരേഷിനൊപ്പമുള്ള ഫോട്ടോ പങ്കുവയ്ക്കുകയായിരുന്നു താരം. പ്രിയയുമായുള്ള ദാമ്പത്യ ജീവിതത്തിന് ശേഷം അഭയ ഹിരണ്‍മയിയുമായി ലിവിങ് റിലേഷന്‍. അതിന് ശേഷം ഇപ്പോള്‍ അമൃതയ്‌ക്കൊപ്പം, അടുത്തത് ആരാണ് എന്നൊക്കെയുള്ള വിമര്‍ശനങ്ങളോട് ഒന്നും ഗോപി സുന്ദര്‍ പ്രതികരിച്ചില്ല. ഇനി പ്രതികരിക്കുകയുമില്ല എന്നാണ് ഗോപി സുന്ദര്‍ പറയുന്നത്. കാന്‍ മീഡിയയ്ക്ക് നല്‍കിയ അഭിമുഖത്തില്‍ ഗോപി സുന്ദര്‍ പറഞ്ഞ വാക്കുകളിലൂടെ തുടര്‍ന്ന് വായിക്കാം,
എന്റെ സ്വകാര്യ ജീവിതത്തെ കുറിച്ച് പുറത്ത് പറയുന്ന കാര്യങ്ങളിലും വിമര്‍ശനങ്ങളിലും വിഷമിയ്ക്കുന്ന ആളല്ല ഞാന്‍. എന്ത് തന്നെ ആരൊക്കെ പറഞ്ഞാലും എന്റെ സ്വകാര്യ ജീവിതവുമായി മുന്നോട്ട് പോകുന്ന ആളാണ് ഞാന്‍. അത് എന്റെ സ്വകാര്യതയാണ്. ആര്‍ക്കും അതില്‍ കൊടുക്കാനോ വാങ്ങാനോ ഒന്നും ഇല്ല.എന്റെ വ്യക്തിപരമായ കാര്യങ്ങളില്‍, എന്നോട് വ്യക്തിപരമായി ഇടപെടുന്നവര്‍ക്ക് പ്രശ്‌നമില്ലാത്ത പക്ഷം അതിന് എനിക്കൊരു വിലയും ഇല്ല. എന്റെ അച്ഛനും അമ്മയ്ക്കും ഇല്ലാത്ത എന്ത് പ്രശ്‌നമാണ് നാട്ടുകാര്‍ക്ക്. അവര്‍ക്ക് എന്റെ തീരുമാനങ്ങളില്‍ എതിര്‍പ്പില്ല. എനിക്കൊപ്പം ജീവച്ചവര്‍ക്കും പരാതിയില്ല. പിന്നെ ഞാന്‍ ആരെയാണ് നോക്കേണ്ടത്.ഭൂമിയില്‍ ഒരു വാടകക്കാരനായി വന്നവനാണ് ഞാന്‍, അത് പോലെ തന്നെ നില്‍ക്കുന്നു പോകും. അതില്‍ എന്റെ ജീവിതം ഒരു തരത്തിലും കോംപ്രമൈസ് ചെയ്യാന്‍ ഞാന്‍ താത്പര്യപ്പെടുന്നില്ല. അതായത് വേറെ ഒരാള്‍ക്ക് വേണ്ടി കോംപ്രമൈസ് ചെയ്യേണ്ടതില്ല എന്ന് കരുതുന്ന ആളാണ്. മറ്റുള്ളവരെ ബോധ്യപ്പെടുത്താന്‍ വേണ്ടിയുള്ള ജീവിതത്തിനും ഞാന്‍ തയ്യാറല്ല. എനിക്ക് എന്റെ സ്‌പേസുണ്ട്, അതില്‍ ഹാപ്പിയായി പോകാനാണ് ആഗ്രഹിയ്ക്കുന്നത്. അതിലെ തീരുമാനം തീര്‍ത്തും വ്യക്തിപരമായിരിയ്ക്കും.
സെലിബ്രിറ്റി ഇമേജുള്ള ആളുകളുടെ സ്വകാര്യ ജീവിതം പരസ്യപ്പെടുത്തണം എന്ന് പറയുന്നത് എന്തിനാണ്. എല്ലാവരും വന്നത് പോലെ അമ്മയുടെ ഗര്‍ഭപാത്രത്തില്‍ നിന്ന് തന്നെയല്ലേ ഞങ്ങളും വന്നത്. ലഭിയ്ക്കുന്ന ഫെയിം അത് ജോലിയുടെ ഭാഗമാണ്. അതല്ലാതെയുള്ള സെലിബ്രിറ്റി ജീവിതത്തില്‍ എനിക്ക് വിശ്വാസമില്ല.
ഇതുവരെ എടുത്ത എന്റെ തീരുമാനങ്ങള്‍ എല്ലാം ശരിയായിരുന്നോ എന്ന് ചോദിച്ചാല്‍, എന്റെ തീരുമാനങ്ങള്‍ ഒന്നും ഞാന്‍ ഒരിക്കലും കോംപ്രമൈസ് ചെയ്തിട്ടില്ല. മറ്റുള്ളവരെ എന്റെ തീരുമാനങ്ങള്‍ അടിച്ചേല്‍പ്പിക്കാനും പോയിട്ടില്ല. കൂടെ ജീവിച്ചവര്‍ക്കും ആ സ്വാതന്ത്രം നല്‍കിയിട്ടുണ്ട്.കുടുംബത്തിന്റെ കാര്യത്തില്‍ ആയാലും മറ്റെന്തിന്റെ കാര്യത്തില്‍ ആയാലും മറ്റുള്ളവര്‍ എന്ത് ചിന്തിയ്ക്കും എന്ന് കരുതി ജീവിയ്ക്കുന്ന ആളല്ല ഞാന്‍. എല്ലാ ദിവസവും ഉണരുമ്പോള്‍ ഞാന്‍ സന്തോഷവാനായിരിയ്ക്കും, അതേ സന്തോഷത്തോടെ എനിക്ക് ഉറങ്ങാന്‍ പോകാനും സാധിക്കണം. അതുകൊണ്ട് തന്നെ എന്റെ സന്തോഷങ്ങളും ഞാന്‍ കോംപ്രമൈസ് ചെയ്യില്ല.നമ്മള്‍ നമ്മുടെ സന്തോഷത്തിന് വേണ്ടി ചെയ്യന്ന കാര്യങ്ങള്‍ മറ്റുള്ളവരെ വേദനിപ്പിയ്ക്കരുത് എന്നത് പ്രധാനമാണ്. എല്ലാവര്‍ക്കും ജീവിതത്തില്‍ ആവശ്യത്തിലധികം പ്രശ്‌നങ്ങളുണ്ട്. പിന്നെ എന്തിനാണ് മറ്റുള്ളവരുടെ സ്വകാര്യ ജീവിതത്തെയും കുറിച്ച് അന്വേഷിക്കാന്‍ പോകുന്നത്. എന്റെ ജീവിതത്തെ കുറിച്ചുള്ള മറ്റുള്ളവരുടെ ചോദ്യങ്ങള്‍ക്ക് പ്രതികരിക്കാന്‍ എനിക്ക് താത്പര്യമില്ല- ഗോപി സുന്ദര്‍.