ഏറെ ആരാധകരുള്ള തെന്നിന്ത്യൻ നടിയാണ് ഭൂമിക ചൗള. ഒരുകാലത്ത് വിവിധ ഭാഷകളിൽ വളരെ തിരക്കുള്ള നായികമാരിൽ ഒരാൾ കൂടിയായിരുന്നു താരം. ബോളിവുഡിലും ഭൂമിക നിറഞ്ഞു നിന്നിരുന്നു. തേരേ നാം, സില്ലന് ഒരു കാതൽ, എംസിഎ, ഖുഷി തുടങ്ങി നിരവധി സൂപ്പർ ഹിറ്റ് ചിത്രങ്ങളിൽ താരം നായികയായി തിളങ്ങി. ഇപ്പോൾ തന്റെ സിനിമ ജീവിതം 23 വർഷം പിന്നിട്ടിരിക്കുകയാണെന്നും എന്നാലിപ്പോഴും ഒരു തുടക്കക്കാരിയെ പോലെയാണ് തനിക്ക് തോന്നുന്നതെന്നുമാണ് ഭൂമിക പറയുന്നത്. ഒരു സ്വകാര്യ മാധ്യമത്തിന് നൽകിയ അഭിമുഖത്തിലാണ് താരം തന്റെ പുതിയ വിശേഷങ്ങൾ പങ്കുവച്ചത്.
തനിക്കിപ്പോൾ ബോളിവുഡിൽ നിന്ന് അധികം അവസരങ്ങൾ വരാറില്ലെന്ന് ഭൂമിക പറയുന്നു. ഒന്നുകിൽ ബോളിവുഡിലെ ആളുകൾക്ക് താൻ ഇപ്പോഴും അഭിനയിക്കുന്നുണ്ടെന്ന കാര്യം അറിയില്ല എന്ന് തോന്നുന്നുവെന്നാണ് ഭൂമിക പറയുന്നത്. ഞാൻ ചിലപ്പോൾ അഭിനയം നിർത്തിയതായി തോന്നിയതു കൊണ്ടാവാം അവസരങ്ങൾ ലഭിക്കാത്തത്. ഒന്നുകിൽ ഞാൻ ഒരു നല്ല അഭിനേതാവ് അല്ല, അല്ലെങ്കിൽ എന്റെ പിആർ വേണ്ടത്ര കോളുകൾ ചെയ്യുന്നില്ല, അല്ലെങ്കിൽ ഞാൻ ഇപ്പോഴും ജോലി ചെയ്യുന്നുണ്ടെന്ന കാര്യം അവർക്ക് അറിയില്ല. സത്യസന്ധമായി പറയുകയാണെങ്കിൽ അവസരം കിട്ടാത്തത് എന്തുകൊണ്ടാണെന്ന് എനിക്കറിയില്ല എന്ന് താരം വ്യക്തമാക്കി
എന്നെ സംബന്ധിച്ച് സിനിമ എന്നത് മൊത്തത്തിൽ വ്യത്യസ്തമായ ഒരു ഗെയിമായിരുന്നു. പക്ഷേ ഇപ്പോൾ സിനിമ മേഖല എങ്ങനെയാണ് പ്രവർത്തിക്കുന്നത് എന്ന കാര്യം എനിക്കറിയില്ല. സിനിമയിലേക്ക് ഇപ്പോൾ എങ്ങനെ എത്തണമെന്ന് ചോദിച്ചാൽ എനിക്കറിയില്ല. എന്റെ സോഷ്യൽ മീഡിയ പേജിലൂടെ ഞാൻ ജോലി അന്വേഷിക്കുകയാണ്, ആരെങ്കിലും എനിക്ക് ജോലി തരൂ എന്ന് പറയാൻ മാത്രമേ എനിക്ക് കഴിയൂ. എങ്കിൽ കൂടിയും ഒരു ചാൻസിനായി ആരെ സമീപിക്കണമെന്ന് എനിക്കറിയില്ല എന്നും താരം പറയുന്നു.
ഞാനിപ്പോഴും ഒരു തുടക്കക്കാരിയോ അല്ലെങ്കിൽ ഒരു പുതുമുഖമോ ഒരു വിദ്യാർഥിനിയോ ആണെന്നൊക്കെയാണ് എനിക്ക് തോന്നുന്നത്- താരം പറയുന്നു.ഏകദേശം ഇരുപത്തിമൂന്ന് വർഷത്തോളമായി ഞാൻ സിനിമ മേഖലയിൽ പ്രവർത്തിക്കാൻ തുടങ്ങിയിട്ട്. അതിന് ഞാൻ ദൈവത്തോട് നന്ദി പറയുന്നു. അതോടൊപ്പം എന്നെ സ്നേഹിക്കുന്ന പ്രേക്ഷകരോടും സിനിമ മേഖലയിലുള്ളവരോടും നന്ദി പറയുന്നു. ഇതുവരെ ചെയ്ത വർക്കുകളിൽ എല്ലാം ഞാൻ വളരെ തൃപ്തയാണ്. പക്ഷേ ഇപ്പോഴും നല്ല പ്രൊജക്ടുകൾക്കായി ആഗ്രഹിക്കുന്നു.
എന്റെ ഏറ്റവും മികച്ചത് പുറത്തെടുക്കാൻ കഴിയുന്ന ടീമിനൊപ്പം പ്രവർത്തിക്കാൻ ഞാൻ ഇപ്പോഴും ആഗ്രഹിക്കുന്നുവെന്നും നടി അഭിമുഖത്തിൽ പറയുന്നു.
ഇപ്പോൾ ഒരു തമിഴ് ചിത്രത്തിന്റെ ഷൂട്ടിംഗ് തിരക്കുകളിലാണ് ഭൂമിക. അതു കൂടാതെ ഔദ്യോഗികമായി പ്രഖ്യാപിക്കാത്ത ഒരു ഹിന്ദി ചിത്രത്തിന്റെ ആദ്യ ഷെഡ്യൂളിനായുള്ള തയ്യാറെടുപ്പിലുമാണ്. ഇത് ജനുവരിയിൽ തുടങ്ങുമെന്നാണ് വിവരം. തെലുങ്ക്, തമിഴ്, മലയാളം, കന്നഡ, ഹിന്ദി തുടങ്ങി വിവിധ ഭാഷകളിലെ മുൻ നിര നായികമാരിൽ ഒരാൾ കൂടിയായിരുന്നു താരം. ബ്ലെസി സംവിധാനം ചെയ്ത ഭ്രമരം, ആശ ശരത്തിനൊപ്പം ബഡ്ഡി തുടങ്ങിയ മലയാള ചിത്രങ്ങളിലും ഭൂമിക പ്രധാനവേഷത്തിലെത്തിയിരുന്നു.