മിനി സ്ക്രീൻ പ്രേക്ഷകർക്ക് ഏറെ പ്രിയപ്പെട്ട താരമാണ് അനൂപ് കൃഷ്ണൻ. ബിഗ് ബോസ് മലയാളം സീസൺ 3 മത്സരാർഥിയായി പങ്കെടുത്തപ്പോഴാണ് അനൂപിന് കൂടുതൽ ആരാധകരെ ലഭിച്ചത്. തുടക്കം മുതല്‍ അവസാനം വരെ ശ്രദ്ധേയ പ്രകടനമാണ് അനൂപ് ഷോയില്‍ കാഴ്ചവെച്ചത്.
പ്രേക്ഷകരുടെ വലിയ പിന്തുണയും ഇത്തവണ നടന് ലഭിച്ചിരുന്നു. അഞ്ചാം സ്ഥാനം നേടി ടോപ്പ് ഫൈവില്‍ എത്താന്‍ അനൂപ് കൃഷ്ണന് സാധിച്ചു. ബിഗ് ബോസിന് മുന്‍പ് തന്നെ കുടുംബ പ്രേക്ഷകരുടെ പ്രിയങ്കരനാണ് അനൂപ്. ജനപ്രിയ പരമ്പരയായ സീതാകല്യാണത്തിലൂടെ എല്ലാവരുടെയും ഇഷ്ടതാരമായി നടന് മാറി.വിജയി ആകാൻ കഴിഞ്ഞില്ലെങ്കിലും അന്ന് വരെ ബിഗ് ബോസിൽ മത്സരാർഥികളായി എത്തിയവരിൽ ഏറ്റവും കൂടുതൽ ജനപ്രീതി നേടിയ വ്യക്തികളിൽ ഒരാളായി മാറാൻ അനൂപ് കൃഷ്ണന് കഴിഞ്ഞു. 2013 മുതൽ സിനിമാ രംഗത്ത് പ്രവർത്തിക്കുന്നുണ്ട് അനൂപ്.
ചെറിയ വേഷങ്ങളാണ് താരത്തിന് സിനിമയിൽ ലഭിച്ചിരുന്നത്. പത്തിന് അടുത്ത് സിനിമകളിൽ അഭിനയിച്ച അനൂപ് കൃഷ്ണൻ സീരിയലിലേക്ക് എത്തുന്നത് 2018ൽ ആണ്. സീതാ കല്യാണം എന്ന സീരിയലിൽ നായകനായ കല്യാൺ എന്ന കഥാപാത്രമായാണ് അനൂപ് മിനി സ്ക്രീൻ പ്രേക്ഷകരുടെ ഇടയിൽ എത്തുന്നത് . ഏഷ്യാനെറ്റിൽ സംപ്രേഷണം ചെയ്യുന്ന സീരിയലിൽ നടി ധന്യ മേരി വർഗീസായിരുന്നു മറ്റൊരു പ്രധാന കഥാപാത്രത്തെ അവതരിപ്പിച്ചത്. സംപ്രേഷണം ചെയ്തിരുന്ന സമയത്ത് ഏറ്റവും കൂടുതൽ ആരാധകരുണ്ടായിരുന്ന സീരിയൽ കൂടിയായിരുന്നു സീതാ കല്യാണം.
അനൂപിന്റെ ആദ്യത്തെ സിനിമ ദൈവത്തിന്റെ സ്വന്തം ക്ലീറ്റസ് ആയിരുന്നു. ഈ സിനിമയ്ക്ക് ശേഷം വിവിധ സ്റ്റേജ് ഷോകളിൽ അവതാരകനാകാനുള്ള അവസരം അനൂപിന് ലഭിച്ചിരിന്നു. പിന്നീട് പ്രെയ്സ് ദ ലോഡ്, ഞാൻ സംവിധാനം ചെയ്യും, സർവോപരി പാലാക്കാരൻ, എന്നാലും ശരത്ത്, കോണ്ടസ, അമ്മ മരത്തണലിൽ തുടങ്ങിയ സിനിമകളിൽ അഭിനയിച്ചു. അനൂപിന്റെ ഏറ്റവും പുതിയ സന്തോഷം താരം അഭിനയിച്ച അജഗജാന്തരം എന്ന സിനിമ നിറഞ്ഞ സദസിൽ പ്രദർശിപ്പിക്കുന്നു എന്നതാണ്. ആന്റണി പെപ്പെ നായകനായ സിനിമ ക്രിസ്മസ് റിലീസായാണ് തിയേറ്ററുകളിലെത്തിയത്. ചിത്രത്തിൽ ദേവരാജൻ എന്ന കഥാപാത്രത്തെ ആണ് അനൂപ് കൃഷ്ണൻ അവതരിപ്പിക്കുന്നത്. സിനിമയ്ക്ക് നല്ല അഭിപ്രായങ്ങൾ ലഭിക്കുന്നതിൽ സന്തോഷം ഉണ്ടെന്നാണ് അനൂപ് കൃഷ്ണൻ പറയുന്നത്. സിനിമയുമായി ബന്ധപ്പെട്ട് വളരെ വ്യത്യസ്തമായ വീഡിയോ പങ്കുവെച്ചിരിക്കുകയാണ് അനൂപ് കൃഷ്ണൻ ഇപ്പോൾ.
സിനിമ കാണാനെത്തിയവർക്ക് അനൂപ് തന്നെയാണ് ടിക്കറ്റ് മുറിച്ച് നൽകുന്നതും. വളരെ സ്പെഷ്യലായ വീഡിയോ എന്ന് പറഞ്ഞ് മനോഹരമായ ക്യാപ്ഷനോടെയാണ് അനൂപ് കൃഷ്ണൻ വീഡിയോ സ്വന്തം യുട്യൂബ് ചാനലിൽ പങ്കുവെച്ചിരിക്കുന്നത്. ‘ചെറുപ്പത്തിൽ കണ്ടിട്ടുള്ള ചില സിനിമകളുടെ ലൊക്കേഷനിലാണ് നിൽക്കുന്നത്. എടുത്ത് പറയുകയാണെങ്കിൽ ബാലേട്ടൻ എന്ന സിനിമയുടെ ലൊക്കേഷൻ ഇതായിരുന്നു. വാഴാലിക്കാവിലാണ് ഞാൻ നിൽക്കുന്നത്. ഞാൻ കൂടി ഭാഗമായിട്ടുള്ള അജഗജാന്തരം എന്ന ചിത്രത്തിന്റെ ലൊക്കേഷനിലാണ് ഞാൻ നിൽക്കുന്നത്. എല്ലാവരും അജഗജാന്തരം കണ്ടിട്ടുണ്ടാവുമെന്ന് എനിക്കറിയാം. ഈ സിനിമ ഷൂട്ട് ചെയ്തത് വാഴാലിക്കാവ് പരിസര പ്രദേശങ്ങളിലായാണ്. അതിലെ ആ പ്രധാന പൂരം നടക്കുന്നത് ഇവിടെ വെച്ചാണ്. ഇത്രയും പ്ലെയിനായിട്ടുള്ള സ്ഥലത്തെയാണ് ചിത്രത്തിൽ ഗ്രാന്റാക്കി കാണിച്ചിട്ടുള്ളത്. വളരെ രസകരമായ വിഷ്വൽസാണ് ചിത്രത്തിലേത്. വെറുതെ കാണുമ്പോൾത്തന്നെ ഈ സ്ഥലത്തിന് പ്രത്യേകമായൊരു ഭംഗിയാണ്. ഭാരതപ്പുഴയും ഈ പാടവും റെയിൽവെ ട്രാക്കുമൊക്കെയുള്ള ഈ സ്ഥലമാണ് ചിത്രത്തിൽ കാണിക്കുന്നത്. ദേവരാജ് എന്ന പറയുന്ന കഥാപാത്രത്തെയാണ് ഞാൻ അവതരിപ്പിച്ചത്. ചിത്രത്തിന്റെ ലൊക്കേഷനിൽ വന്ന് എന്റെ കഥാപാത്രത്തെക്കുറിച്ച് പറയാൻ കഴിയുന്നതിൽ സന്തോഷമുണ്ട്. ലാലേട്ടന്റെ ആശീർവാദിന്റെ എം ലാലിന്റെ ഓഡി വണ്ണിലാണ് ഇപ്പോൾ അജഗജാന്തരം പ്രദർശിപ്പിച്ചുകൊണ്ടിരിക്കുന്നത്.’
സിനിമ കാണാൻ വരുന്നവരെല്ലാം തിയേറ്ററിൽ ഉത്സവാന്തരീക്ഷം സൃഷ്ടിക്കുകയാണ്. കൊറോണയ്ക്ക് മുമ്പ് എങ്ങനെയാണോ ആളുകൾ സിനിമ കണ്ടിരുന്നത് അതേ പോലെയാണ് അജഗജാന്തരം ആളുകൾ ഇപ്പോൾ കാണുന്നത്. ആ സന്തോഷം തിയേറ്റർ ജീവനക്കാർക്കുമുണ്ട്’ അനൂപ് പറയുന്നു. സിനിമ കാണാൻ വന്നവർ സുപരിചിതനായ താരം ടിക്കറ്റ് മുറിച്ച് നൽകുന്നത് കണ്ട് അമ്പരക്കുന്നതും ഒപ്പം അനൂപിനൊപ്പം സെൽഫി പകർത്തുന്നതും വീഡിയോയിൽ കാണാം. സ്റ്റാർ മ്യൂസിക്ക് സീസൺ ത്രീ എന്ന സീരിയൽ താരങ്ങളുടെ പരിപാടിയുടെ അവതാരകനാണ് ഇപ്പോൾ അനൂപ് കൃഷ്ണൻ.