കൊട്ടാരക്കര താലൂക്കാശുപത്രിയില് വനിതാ ഡോക്ടറെ കുത്തിക്കൊന്നുവെന്ന വാർത്ത ഞെട്ടലോടെയാണ് മലയാളികൾ കേട്ടത്. കോട്ടയം സ്വദേശിയായ ഹൗസ് സര്ജന് വന്ദനാ ദാസ് ആണ് യുവാവിൻ്റെ കുത്തേറ്റ് മരിച്ചത്.
ആരോഗ്യ പ്രവര്ത്തകര്ക്ക് നേരായുണ്ടാകുന്ന ആക്രമണങ്ങളെക്കുറിച്ച് മുരളി തുമ്മാരക്കുടി നല്കിയ മുന്നറിയിപ്പ് പോസ്റ്റാണ് ഇപ്പോള് ചര്ച്ചയാകുന്നത്. മുമ്പ് കേരളത്തില് ഉടനെ ഒരു ബോട്ടപകടം ഉണ്ടാകുമെന്ന മുന്നറിയിപ്പും അദ്ദേഹം നല്കിയിരുന്നു. ഇതിന് ദിവസങ്ങള്ക്ക് ശേഷമാണ് താനൂരില് ബോട്ടപകടമുണ്ടായതും 22 ഓളം പേര് മരണപ്പെട്ടതും.
മുരളി തുമ്മാരക്കുടിയുടെ ഫേസ്ബുക്ക് പോസ്റ്റിന്റെ പൂര്ണരൂപം
‘മാസത്തില് അഞ്ച് ആരോഗ്യ പ്രവര്ത്തകരാണ് കേരളത്തില് രോഗികളുടെയോ ബന്ധുക്കളുടെയോ അക്രമത്തിന് ഇരയാകുന്നത്. ഭാഗ്യവശാല് ഇതുവരെ ഇത്തരത്തില് ഒരു മരണം ഉണ്ടായിട്ടില്ല. അത് ഭാഗ്യം മാത്രമാണ്. അത്തരത്തില് ഒരു മരണം ഉണ്ടാകും, നിശ്ചയമാണ്. ഇപ്പോള്, ‘ചില ഡോക്ടര്മാര് അടി ചോദിച്ചു വാങ്ങുകയാണ്’ എന്നൊക്കെ പറയുന്നവര് അന്ന് മൊത്തമായി കളം മാറും. സമൂഹത്തില് വലിയ എതിര്പ്പ് ഉണ്ടാകും, മാധ്യമങ്ങള് ചര്ച്ച നടത്തും, മന്ത്രിമാര് പ്രസ്താവിക്കും, കോടതി ഇടപെടും, പുതിയ നിയമങ്ങള് ഉണ്ടാകും. ആരോഗ്യപ്രവര്ത്തകരുടെ നേരെയുള്ള അക്രമങ്ങള് കുറച്ചു നാളത്തേക്കെങ്കിലും കുറയും. അപ്പോഴേക്കും ഒരാളുടെ ജീവന് പോയിരിക്കും എന്ന് മാത്രം.’
ഇന്ന് പുലര്ച്ചെയാണ് നാടിനെ നടുക്കിയ സംഭവം ഉണ്ടായത്. പ്രതി പൂയപ്പള്ളി സ്വദേശി സന്ദീപ് സ്കൂള് അധ്യാപകനാണ്. നെടുമ്പന യുപി സ്കൂള് അധ്യാപകനായ സന്ദീപ് ഇപ്പോള് സസ്പെന്ഷനിലാണ്. ലഹരിക്ക് അടിമയായതിന് പിന്നാലെയാണ് സസ്പെന്ഷന് എന്നാണ് പുറത്തു വരുന്ന റിപ്പോര്ട്ടുകള്. വീടിനടുത്തു നടന്ന അടിപിടി കേസില് കസ്റ്റഡിയിലെടുത്ത സന്ദീപിനെ മുറിവ് തുന്നിക്കെട്ടുന്നതിന് വേണ്ടിയാണ് പൊലീസുകാർ ആശുപത്രിയില് കൊണ്ടുപോയത്. ഇതിനിടയിൽ പ്രതി അക്രമാസക്തനാകുകയായിരുന്നു. ഡ്രസിങ് റൂമില് വച്ച് അവിടെ ഉണ്ടായിരുന്ന കത്രിക ഉപയോഗിച്ച് പ്രതി വനിതാ ഡോക്ടറെ മാരകമായി കുത്തിപ്പരിക്കേല്പ്പിക്കുകയായിരുന്നു എന്നാണ് വിവരം.