സിനിമ നാടക സംഗീത സംവിധായകൻ ചന്ദ്രൻ വേയാട്ടുമ്മൽ (പാരീസ് ചന്ദ്രൻ) അന്തരിച്ചു. തിങ്കളാഴ്ച വൈകുന്നേരം നാലിന് നരിക്കുനി വട്ടപ്പാറപൊയിലെ വീട്ടുവളപ്പിൽ സംസ്കാരം നടക്കും.
നിരവധി മലയാള ചിത്രങ്ങൾക്ക് അദ്ദേഹം സംഗീതമൊരുക്കിയിരുന്നു. 1988ൽ ബിബിസിയുടെ ദ് മൺസൂൺ എന്ന റേഡിയോ നാടകത്തിന് വേണ്ടിയും സംഗീതം നൽകി.
2008 ൽ ബയോസ്കോപ്പ് എന്ന ചിത്രത്തിന് മികച്ച പശ്ചാത്തല സംഗീതത്തിനുള്ള കേരള സംസ്ഥാന അവാർഡും, 2010ൽ പ്രണയത്തിൽ ഒരുവൾ എന്ന ടെലിഫിലിമിന് മികച്ച സംഗീത സംവിധായകനുള്ള കേരള ടെലിവിഷൻ അവാർഡും ലഭിച്ചിരുന്നു. ദൃഷ്ടാന്തം, ചായില്യം, ബോംബേ മിഠായി, നഗരം, ഈട, ബയോസ്കോപ്പ്, ഞാൻ സ്റ്റീവ് ലോപ്പസ് തുടങ്ങി ചിത്രങ്ങൾക്ക് സംഗീതമൊരുക്കിയത് ചന്ദ്രൻ ആയിരുന്നു.
പാരീസിലെ യ ഫുട്സ്ബെൻ തീയേറ്ററുമായി സഹകരിച്ച് ഒട്ടേറെ രാജ്യങ്ങളിൽ നാടകങ്ങൾക്ക് വേണ്ടി സംഗീതം ചെയ്തിരുന്നു. സ്കൂൾ ഓഫ് ഡ്രാമയിൽ നിന്നാണ് പഠനം പൂർത്തിയാക്കിയത്. ഭാര്യ ശൈലജ, മക്കൾ ആനന്ദ് രാഗ്, ആയുഷ്.