ഡിംസംബര്‍ 5 ന് മോനിഷ ഈ ലോകത്തോട് വിട പറഞ്ഞിട്ട് മുപ്പത് വര്‍ഷങ്ങള്‍ പൂര്‍ത്തിയാവുകയാണ്. മരിച്ച് മൂന്ന് പതിറ്റാണ്ട് പിന്നിടുമ്പോഴും വെള്ളിത്തിരയിൽ മായാത്ത മുദ്ര പതിപ്പിച്ച മോനിഷ ഇപ്പോഴും മലയാളത്തിന് തീരാനോവാണ്.
ഇപ്പോഴും മോനിഷയെ മലയാളികള്‍ മറന്നിട്ടില്ല എന്ന് ബോധ്യപ്പെടുത്തുന്നതാണ് സഹപ്രവര്‍ത്തകരുടെയും ആരാധകരുടെയും സോഷ്യല്‍ മീഡിയ പോസ്റ്റുകള്‍.
ഇന്നും മോനിഷയ്‌ക്കൊപ്പമുള്ള അഭിനയാനുഭവത്തെ കുറിച്ച് നടന്‍ വിനീത് വാചാലനാണ്. മനോജ് കെ ജയനും മോനിഷയ്‌ക്കൊപ്പമുള്ള തന്റെ ഓര്‍മകള്‍ ഇന്‍സ്റ്റഗ്രാമില്‍ പങ്കുവച്ചു. കുടുംബസമേതം എന്ന ചിത്രത്തില്‍ അഭിനയിക്കുമ്പോള്‍ ഉള്ള ഏതാനും ചിത്രങ്ങളും മനോജ് കെ ജയന്‍ പങ്കുവച്ചിട്ടുണ്ട്.
‘ഊഞ്ഞാലുറങ്ങി…ഹിന്ദോള രാഗം മയങ്ങി.. മോനിഷ വിട പറഞ്ഞിട്ട് ഇന്നേക്ക് 30 വര്‍ഷങ്ങള്‍. പ്രിയ സഹപ്രവര്‍ത്തകയെ വളരെ സ്‌നേഹത്തോടെ ഓര്‍ക്കുന്നു, അശ്രുപൂക്കള്‍.. പ്രണാമം’ എന്നാണ് മനോജ് കെ ജയന്‍ കുറിച്ചത്.
1992 ല്‍ ഇറങ്ങിയ കുടുംബ സമേതം എന്ന ചിത്രത്തിന് പുറമെ, 1990 ല്‍ വന്‍ വിജയം നേടിയ പെരുന്തച്ചന്‍ എന്ന ചിത്രത്തിലും മോനിഷയും മനോജ് കെ ജയനും ഒന്നിച്ച് അഭിനയിച്ചിരുന്നു.
മോനിഷയെ അനുസ്മരിച്ചുകൊണ്ടുള്ള കമന്റുകളാണ് പോസ്റ്റിന് താഴെ വരുന്നത്. ‘ആ കാലഘട്ടത്തില്‍ ഞാന്‍ ജനിച്ചില്ല എങ്കിലും, എല്ലാവരും മോനിഷ എന്ന നടിയെ കുറിച്ച് പറയുന്നത് കേട്ടാണ് വളര്‍ന്നത്’ എന്ന് ഒരാള്‍ കമന്റ് എഴുതിയതില്‍ നിന്നും ഇന്നും മോനിഷയ്ക്ക് ഉള്ള സ്വീകാര്യത എത്രത്തോളം ആണെന്ന് മനസ്സിലാക്കാവുന്നതാണ്. നല്ല അഭിനേത്രി, ഇപ്പോഴും മലയാള സിനിമ ലോകം മിസ്സ് ചെയ്യുന്നു എന്നൊക്കെ പറഞ്ഞുകൊണ്ടാണ് കമന്റുകള്‍.