മലയാളികള്‍ക്ക് എന്നും വളരെ പ്രിയങ്കരിയായ അഭിനേത്രിയാണ് മഞ്ജു വാര്യര്‍. സിനിമയില്‍ തിളങ്ങി നിന്ന സമയത്താണ് മഞ്ജു ദിലീപിനെ വിവാഹം കഴിച്ചതും സിനിമ ലോകത്ത് നിന്നും നടി വിട്ടു നില്‍ക്കുന്നതും. ശേഷം 14 വര്‍ഷങ്ങള്‍ക്ക് ശേഷമാണ് മഞ്ജു തിരിച്ചെത്തിയത്. ഇന്ന് ഒരുപാട് സ്ത്രീകള്‍ക്ക് ഒരു പ്രചോദനമായി മാറിയ വ്യക്തി കൂടിയാണ് മഞ്ജു വാര്യര്‍.
ഇപ്പോഴിതാ മഞ്ജുവിന്റെ ചില വാക്കുകളാണ് സോഷ്യല്‍ മീഡിയയില്‍ വൈറലായി മാറുന്നത്. അടുത്തിടെ നടി ഒരു തമിഴ് മാധ്യമത്തിന് നല്‍കിയ അഭിമുഖത്തില്‍ അഭിനയം നിര്‍ത്താന്‍ ഉദ്ദേശിക്കുന്നുണ്ടോ എന്ന ചോദ്യത്തിനായിരുന്നു മഞ്ജുവിന്റെ മറുപടി. നടിയുടെ വാക്കുകള്‍ ഇങ്ങനെയായിരുന്നു;
അത് നമ്മുടെ കൈയില്‍ ഉള്ളൊരു കാര്യമല്ല, അത് നമ്മള്‍ എടുക്കുന്ന തീരുമാനം അല്ല. പ്രേക്ഷകര്‍ക്ക് മടുക്കുമ്പോള്‍ അഭിനയം ഉപേക്ഷിച്ചേ പറ്റൂ. എന്നാല്‍ സിനിമ മേഖലയില്‍ പിന്നീട് കൊറിയോഗ്രാഫര്‍ ആയി തുടരാന്‍ ആണ് ആഗ്രഹിക്കുന്നത്. എന്നും മഞ്ജു പറയുന്നു. ജീവിതത്തിലെ ഏറ്റവും പ്രിയപ്പെട്ടവരെക്കുറിച്ചും, സുഹൃത്തുക്കളെക്കുറിച്ചുമെല്ലാം വാചാലയാകുന്ന മഞ്ജു, തന്റെ പേരിലുള്ള ലോണിനെ കുറിച്ചുകൂടി സംസാരിക്കുന്നുണ്ട്.
നിലവില്‍ തന്റെ പേരില്‍ മൂന്നോളം ലോണുണ്ട് എന്നാണ് ഒരു മടിയും കൂടാതെ മഞ്ജു തുറന്ന് പറയുന്നത്. അതുപോലെ തന്നെ ഒരുപാട് പേര് പറയുന്നത് കേട്ടിട്ടുണ്ട് പണം ഉണ്ടെങ്കില്‍ സമാധാനം ഉണ്ട്. ഒരുപാട് കാശ് ഉള്ളവര്‍ ഭാഗ്യം ചെയ്തവരാണ് എന്നൊക്കെ, എന്നാല്‍ എന്റെ അനുഭവത്തില്‍ നിന്നും അതിലൊന്നും ഒരു കാര്യവുമില്ല എന്നാണ് തോന്നിയിട്ടുള്ളത്. ഓരോ ദിവസം അവസാനിക്കുമ്പോഴും സമാധാനത്തോടെ ഉറങ്ങാല്‍ കഴിയുന്നുണ്ടെകില്‍ അവരാണ് ഈ ലോകത്ത് ഏറ്റവും ഭാഗ്യം ചെയ്തവര്‍ എന്നാണ് എനിക്ക് എന്റെ അനുഭവങ്ങളില്‍ നിന്നും മനസിലായിട്ടുള്ളത്.
അല്ലാതെ പണത്തിനും പ്രശസ്തിയിലും ഒന്നിലും ഒരു കാര്യവുമില്ല എന്നും മഞ്ജു പറയുന്നു. അതുപോലെ തന്നെ ഒരിക്കലും ഫ്യൂച്ചറിനെക്കുറിച്ചു യാതൊരു ചിന്തയും ഇല്ലാത്ത ആളാണ് ഞാന്‍. നമ്മുടെ ജീവിതത്തില്‍ അപ്രതീക്ഷിതമായി പലതും സംഭവിക്കും, അതിലൊന്നും പകച്ച് നില്‍ക്കാതെ മുന്നോട്ട് പൊയ്‌ക്കൊണ്ടേ ഇരിക്കണം എന്നും മഞ്ജു പറയുന്നു.
മാത്രമല്ല, തന്നെ കുറിച്ചടക്കം വരുന്ന ട്രോളുകള്‍ താന്‍ ആസ്വദിക്കാറുണ്ട് എന്നും നടി പറയുന്നുണ്ട്. അവരുടെ ക്രീയേറ്റിവിറ്റിയെ നമ്മള്‍ അഭിനന്ദിക്കുക തന്നെ വേണം. നമ്മള്‍ കാണിക്കുന്ന തെറ്റുകള്‍ വീണ്ടും ആവര്‍ത്തിക്കാതെ ഇരിക്കാന്‍ നമ്മളെ അത് സഹായിക്കും. എന്നാല്‍ ട്രോള്‍ ചെയ്യുമ്പോള്‍ അതൊരിക്കലും മറ്റുള്ളവരെ വേദനിപ്പിക്കുന്ന ഒന്നായി മാറരുത് എന്നും മഞ്ജു ഓര്‍മ്മിപ്പിച്ചു.
മഞ്ജുവിന്റെ ഈ വാക്കുകളും ആത്മധൈര്യവുമാണ് നടിയെ ഇന്ന് ഇവിടെകൊണ്ട് എത്തിച്ചത്. വേറെ ആരെങ്കിലുമായിരുന്നെങ്കില്‍ പാതിവഴിയില്‍ തളര്‍ന്നു വീണുപോകുമായിരുന്നു. മഞ്ജു എന്നുമൊരു പ്രചോദനമാണ് എന്നും പല സ്ത്രീകളും കമന്റുകള്‍ ചെയ്യുന്നുണ്ട്. എന്നാല്‍ മഞ്ജുവിന്റേതായി അടുത്തിടെ കാര്യമായ ഹിറ്റുകളൊന്നും ഉണ്ടായിട്ടില്ല, അതുകൊണ്ട് സിനിമയില്‍ നിന്ന് ഇടവേളയെടുക്കുകയാണോ, അഭിനയം നിര്‍ത്തുന്നുണ്ടോ എന്നെല്ലാം മറ്റ് ചിലരും ചോദിക്കുന്നുണ്ട്.
അതേസമയം, യാത്രകളും ഡ്രൈവിംഗും റൈഡിംഗുമൊക്കെയായി ജീവിതം ആസ്വദിക്കുകയാണ് മഞ്ജു. അതോടൊപ്പം കരിയറിലെ തിരക്കുകളിലും ആണ് നടി. തമിഴില്‍ രജിനികാന്തിനൊപ്പമുള്ള സിനിമ അണിയറയില്‍ ഒരുങ്ങുന്നു. മലയാളത്തില്‍ ഫൂട്ടേജ് ഉള്‍പ്പെടെയുള്ള സിനിമകളും പുറത്തിറങ്ങാനുണ്ട്. മലയാളത്തോടൊപ്പം തമിഴിലും ഇന്ന് മഞ്ജുവിന് തിരക്കേറുകയാണ്. ഇതുവരെ പുറത്തിറങ്ങിയ അസുരന്‍, തുനിവ് എന്നീ രണ്ട് സിനിമകളും ഹിറ്റായി. ഇതിനോടകം തമിഴ് പ്രേക്ഷകരുടെ പ്രിയങ്കരിയായി മാറാന്‍ മഞ്ജുവിന് കഴിഞ്ഞിട്ടുണ്ട്.
ഇപ്പോള്‍ ‘മിസ്റ്റര്‍ എക്‌സ്’ എന്ന തമിഴ് സിനിമയിലാണ് മഞ്ജു വാര്യര്‍ അഭിനയിച്ചു കൊണ്ടിരിക്കുന്നത് എന്നാണ് വിവരം. ചിത്രത്തില്‍ രജനികാന്തിന്റെ കൂടെ മുഴുനീള കഥാപാത്രമായി തന്നെ മഞ്ജു എത്തുന്നുണ്ട്. മാത്രമല്ല, ബോളിവുഡിലേയ്ക്കും നടി ചുവടുവെയ്ക്കുന്നതായി വാര്‍ത്തകള്‍ വന്നിരുന്നു. മഞ്ജുവിന്റെ പുതിയ സിനിമകള്‍ക്കായി കാത്തിരിക്കുകയാണ് ആരാധകര്‍.