അയ്യപ്പനും കോശിയും എന്ന ചിത്രത്തിലൂടെ പ്രേക്ഷകര്‍ക്ക് സുപരിതയായ നടിയാണ് ഗൗരി നന്ദ. ഇതിനു മുമ്പ് നിരവധി ചിത്രങ്ങളില്‍ അഭിനയിച്ചിട്ടുണ്ട് എങ്കിലും ചിത്രത്തിലെ കണ്ണമ്മ എന്ന കഥാപാത്രത്തെയാണ് പ്രേക്ഷകര്‍ സ്വീകരിച്ചത്.
ഇപ്പോഴിതാ സിനിമയുടെ ചിത്രീകരണ സമയത്തെ അനുഭവങ്ങള്‍ പങ്കുവെച്ച് രംഗത്ത് എത്തിയിരിക്കുകയാണ് നടി. ഒരു മാധ്യമത്തിന് അനുവദിച്ച അഭിമുഖത്തിലാണ് ചിത്രത്തെ കുറിച്ചും ചിത്രീകരണ സമയത്തെ അനുഭവങ്ങളെ കുറിച്ചും നടി തുറന്ന് പറഞ്ഞത്.
‘ചിത്രത്തിലെ കണ്ണമ്മ എന്ന ഇമേജ് ബ്രേക്ക് ചെയ്യുക അത്ര എളുപ്പമല്ല. അത്തരത്തിലൊരു കഥാപാത്രം ഇനി കിട്ടണം. കണ്ണമ്മയ്ക്കായി ഞാന്‍ ഒരുപാട് എഫേര്‍ട്ടെടുത്തിരുന്നു.
ഡയറ്റിങ് ചെയ്ത് ഭാരം കുറച്ചു. കണ്ണമ്മ എന്ന കഥാപാത്രം അട്ടപ്പാടിയിലെ ആദിവാസി ഗോത്രത്തില്‍പ്പെട്ട ഒരാളാണ്. അതുകൊണ്ടു തന്നെ മെലിഞ്ഞ, അല്പം പരുക്കനായ ഒരു ശരീരപ്രകൃതമായിരിക്കും അവര്‍ക്കെന്ന് കഥപറയുമ്പോള്‍ത്തന്നെ സംവിധായകനായ സച്ചിയേട്ടന്‍ പറഞ്ഞിരുന്നു.
ഗൗരിയെക്കൊണ്ട് ആവുന്നത്രയും ഭാരം കുറയ്ക്കണമെന്ന് ആണ് അദ്ദേഹം പറഞ്ഞിരുന്നത്. ആ കഥാപാത്രത്തോടുള്ള ഇഷ്ടംകൊണ്ടു തന്നെ അതിനുശേഷം കഠിനമായ ഡയറ്റിങ് നടത്തി.
മിതമായ രീതിയില്‍ പച്ചക്കറികള്‍ മാത്രമാണ് കഴിച്ചിരുന്നത്. ചിലദിവസങ്ങളില്‍ പട്ടിണിപോലും കിടന്നിട്ടുണ്ട്. ഒപ്പം കഠിനമായ വ്യായാമമുറകളും ചെയ്തു. കുറച്ച് ഭക്ഷണം കഴിച്ചാല്‍ത്തന്നെ പെട്ടെന്ന് ശരീരത്തില്‍ കാണുന്ന ഒരാളാണ് ഞാന്‍.
അതുകൊണ്ടുതന്നെ ഡയറ്റിങ് എന്നെ സംബന്ധിച്ച് ഇത്തിരി ബുദ്ധിമുട്ടായിരുന്നു.സെറ്റിലെത്തിയപ്പോള്‍ രാജുവേട്ടനും ബിജുവേട്ടനുമൊക്കെ അഭിനന്ദിച്ചു. കഥാപാത്രമാകാന്‍ നന്നായി കഷ്ടപ്പെട്ടിട്ടുണ്ടല്ലേ, നന്നാകട്ടെ, എന്നാണ് അവര്‍ പറഞ്ഞത്.