ദേശീയ പുരസ്‌കാരം അപ്രതീക്ഷിതമായിരുന്നുവെന്ന് ബിരിയാണി സിനിമയുടെ സംവിധായകന് സജിന്‍ ബാബു. ദേശീയ അംഗീകാരം കിട്ടുക എന്നത് ചെറിയ കാര്യമല്ല. വിദേശരാജ്യങ്ങളില്‍ ഒരുപാട് മേളകളില്‍ ബിരിയാണി സിനിമ പ്രദര്‍ശിപ്പിച്ചിരുന്നു.
പക്ഷേ, രാജ്യത്തിനകത്ത് പലയിടത്തും സിനിമ തിരസ്‌ക്കരിക്കപ്പെട്ടു കനി കുസൃതിക്ക് മികച്ച നടിക്കുളള സംസ്ഥാന അവാര്‍ഡ് ഈ ചിത്രം നേടിക്കൊടുത്തിരുന്നു.
അന്ന് ആ അവാര്‍ഡ് അപ്രതീക്ഷിതമായിരുന്നു. അതുപോലെ തന്നെ പ്രതീക്ഷിക്കാത്ത ഒന്നാണ് പ്രത്യേക ജൂറി പരാമര്‍ശമെന്നും സജിന്‍ ബാബു പറഞ്ഞു
തിരുവനന്തപുരത്തെ കൂപ്പ് എന്ന ഗ്രാമത്തില്‍ നിന്നാണ് താന്‍ വരുന്നത്. തന്റെ മൂന്നാമത്തെ സിനിമയ്ക്ക് ഇതുപോലെയൊരു ദേശീയ അംഗീകാരം ലഭിച്ചതില്‍ വലിയ സന്തോഷമുണ്ട്.
വെളളിയാഴ്ച സിനിമ റിലീസ് ചെയ്യുകയാണ്. ഇതൊരു അവാര്‍ഡ് സിനിമയായി ആരും കാണരുത്.
എല്ലാവരും തിയേറ്ററില്‍ തന്നെ സിനിമ കാണണമെന്നും സജിന്‍ ബാബു. പിന്നാക്ക മുസ്ലീം സ്ത്രീയുടെ ജിവിതത്തെ ആധാരമാക്കി നിര്‍മ്മിച്ച സിനിമയാണ് ബിരിയാണി.
സംവിധായകന് പ്രത്യേക ജൂറി പരാമര്‍ശം എന്ന അംഗീകാരമാണ് ബിരിയാണി നേടിക്കൊടുത്തത്. റോമില്‍ നടന്ന രാജ്യാന്തര ഫെസ്റ്റിവലില്‍ പ്രീമിയര്‍ നടത്തുകയും ഒപ്പം അവിടെ നിന്നുള്ള ഏഷ്യാറ്റിക്ക നെറ്റ്പാക്ക് അവാര്‍ഡ് നേടുകയും ചെയ്തിരുന്നു.
എന്നാല്‍ ഇന്ത്യയിലെ ഐഎഫ്എഫ്‌ഐ, ഐഎഫ്എഫ്‌കെ ഫെസ്റ്റിവലുകളില്‍ സെലക്ഷന്‍ നിഷേധിക്കപ്പെടുകയും ചെയ്തിരുന്നു.