മാര്ക്കോണി മത്തായി ചിത്രത്തിലൂടെയാണ് വിജയ് സേതുപതി മലയാള സിനിമയിലേക്കെത്തിയത്. വിജയ് സേതുപതിയായിത്തന്നെ അഭിനയിച്ച ഈ ചിത്രത്തിന് ശേഷം ഇന്ദു വി എസ് സംവിധാനം ചെയ്ത മലയാള ചിത്രത്തില് അഭിനയിക്കുകയാണ് വിജയ് സേതുപതി.
ഇപ്പോഴിതാ മലയാളത്തില് തുടര്ന്ന് അഭിനയിക്കുന്നതിനെക്കുറിച്ചും മോളിവുഡിനോടുള്ള ഇഷ്ടത്തെക്കുറിച്ചും മനസ്സുതുറന്നിരിക്കുകയാണ് നടന്.
അനുയോജ്യമായ കഥയും സമയവും ഒത്തുവന്നാല് മലയാളത്തില് തുടര്ന്ന് അഭിനയിക്കണമെന്ന് ആഗ്രഹമുണ്ട്. മലയാള സിനിമയില് നിന്ന് നിറയെ വിഷയങ്ങള് പഠിക്കാന് സാധിക്കും. എനിക്ക് മലയാളം നന്നായി സംസാരിക്കാനറിയില്ലെങ്കിലും പറയുന്നത് മനസ്സിലാക്കാം. ഭാര്യ ജെസി മലയാളിയാണ്. അവരുടെ സഹായത്തോടെ മലയാളം പഠിച്ചുവരുന്നു. അടുത്തു തന്നെ ഞാന് മലയാളം സംസാരിക്കാന് തുടങ്ങും അദ്ദേഹം കൂട്ടിച്ചേര്ത്തു. ഇന്ദു വി എസ് ചിത്രത്തില് തമിഴ്നാട്ടില് ജനിച്ച് കേരളത്തില് ജീവിക്കുന്ന ഒരു എഴുത്തുകാരന്റെ വേഷമാണ് വിജയ് സേതുപതിക്ക്. നായികയായി വേഷമിടുന്നത് നിത്യ മേനോനാണ്.