മഹേഷിന്റെ പ്രതികാരം’ എന്ന ചിത്രത്തിലൂടെ മലയാളികള്‍ക്ക് പരിചിതമായ നടിയാണ് ലീന. വര്‍ഷങ്ങള്‍ക്ക് മുന്‍പ് മുടങ്ങിപ്പോയ പത്താം ക്ലാസ് തിരിച്ചിപിടിക്കാന്‍ ഒരുങ്ങുകയാണ് നടി. ഇന്ന് നടക്കുന്ന പത്താം ക്ലാസ് തുല്യതാ പരീക്ഷയില്‍ ലീന ആന്റണിയും ഉണ്ടാകും. ചേര്‍ത്തല ഗവ. ഹര്‍സെക്കന്‍ഡറി സ്‌കൂളില്‍ നടക്കുന്ന പരീക്ഷയിലാണ് ലീനയും എത്തുക.
നാടകത്തിലെ വലിയ ഡയലോഗുകള്‍ പഠിച്ചുള്ള ശീലം ഇപ്പോള്‍ എളുപ്പമായി, നാടക ഡയലോഗ് ആയാലും പാഠഭാഗങ്ങള്‍ ആയാലും മനസിരുത്തി പഠിച്ചാലേ ഓര്‍മ്മ കിട്ടൂ’എന്ന പറയുകയാണ് ലീന .അപ്പന്റെ മരണവും തുടര്‍ന്നുണ്ടയ സാമ്പത്തിക ബാധ്യതകളെയും തുടര്‍ന്നാണ് ലീനയ്ക്ക് പത്താം ക്ലാസ് പൂര്‍ത്തിയാക്കാന്‍ കഴിയാതെ പോയത്. പഠനം നിര്‍ത്തിയ ലീന പിന്നീട് നാടകത്തില്‍ സജീവമായി.
അന്ന് പഠനം പൂര്‍ണ്ണമായി നിര്‍ത്തിയെങ്കിലും ഭര്‍ത്താവ് ആന്റണിയുടെ മരണവും തുടര്‍ന്നുണ്ടായ ഏകാന്തതയുമാണ് വീണ്ടും പഠിക്കാമെന്ന തീരുമാനമെടുത്തത്. അങ്ങനെയൊരു തീരുമാനത്തിന് കാരണവും മക്കള്‍ തന്നെയാണെന്ന് നടി പറയുന്നു.ആന്റണിയുടെ മരണശേഷം മകന്‍ ലാസര്‍ ഷൈനിന്റെ ഭാര്യ മായാകൃഷ്ണയാണ് തുടര്‍ പഠനമെന്ന ആശയത്തെക്കുറിച്ച് പറഞ്ഞത്. പിന്നീട് പഠിക്കാന്‍ തീരുമാനിക്കുകയായിരുന്നു. പ്രശസ്ത നാടക നടനും മഹേഷിന്റെ പ്രതികാരം എന്ന സിനിമയില്‍ ഫഹദിന്റെ ചാച്ചനായി അഭിനയിച്ച നടനുമാണ് ലീനയുടെ ഭര്‍ത്താവ് ആന്റണി.