തെന്നിന്ത്യന്‍ സിനിമാലോകത്തിന്റെ സ്വകാര്യ അഹങ്കാരം ആണ് സൂര്യ. മലയാള സിനിമയില്‍ അഭിനയിച്ചിട്ടില്ലെങ്കിലും മലയാളികള്‍ക്കിടയിലും സൂര്യയ്ക്ക് ആരാധകർ ഏറെയാണ്. ദേശീയ അവാര്‍ഡ് സാധ്യത പട്ടികയില്‍ സൂര്യയുടെ പേരുണ്ടെന്നറിഞ്ഞപ്പോള്‍ മലയാളികൾക്കും അതൊരു അഭിമാന നിമിഷമായിരുന്നു.
സുധ കൊങ്ങര സംവിധാനം ചെയ്ത സുരറൈ പോട്രു എന്ന ചിത്രത്തിലൂടെയായാണ് സൂര്യ ഈ നേട്ടം സ്വന്തമാക്കിയത്. ഈ ചിത്രത്തിലെ അഭിനയത്തിന് പുരസ്‌കാരം പ്രതീക്ഷിച്ചത് തന്നെയായിരുന്നു എന്നായിരുന്നു തമിഴകവും മലയാളി സിനിമാ പ്രേമികളും ഒരേ സ്വരത്തിൽ പറഞ്ഞത്.
ചിത്രത്തില്‍ അഭിനയിക്കുന്നതിനായി അങ്ങേയറ്റത്തെ തയ്യാറെടുപ്പുകളായിരുന്നു സൂര്യ നടത്തിയത്. വിവിധ ഗെറ്റപ്പുകളിലേക്ക് മാറുന്നതിനായി ശാരീരികമായും മാറ്റങ്ങള്‍ വരുത്തിയിരുന്നു. തനിക്ക് ലഭിക്കുന്ന കഥാപാത്രത്തെ അങ്ങേയറ്റം മനോഹരമാക്കുന്ന ആ ശീലം സൂര്യ ആവര്‍ത്തിക്കുകയായിരുന്നു. ചിത്രീകരണത്തിനിടയില്‍ പല സമയത്തും സൂര്യ തന്നെ അമ്പരപ്പിച്ചിരുന്നുവെന്ന് സംവിധായിക പറഞ്ഞിരുന്നു.
സഹതാരങ്ങളെയെല്ലാം കംഫര്‍ട്ടാക്കിയുള്ള അഭിനയമാണ് സൂര്യയുടേതെന്നായിരുന്നു ചിത്രത്തിലെ നായികയായ അപര്‍ണ ബാലമുരളി പറഞ്ഞത്. ലൊക്കേഷനില്‍ എല്ലാവരുമായും അദ്ദേഹം സൗഹൃദം നിലനിര്‍ത്തിയിരുന്നു. ഒന്നിച്ച് അഭിനയിക്കുന്ന രംഗങ്ങളിലെല്ലാം അദ്ദേഹം മികച്ച പിന്തുണയാണ് തന്നത്.
മലയാളി താരങ്ങളെല്ലാമായി അടുത്ത സൗഹൃദമുണ്ട് സൂര്യയ്ക്ക്. താരസംഘടനയായ അമ്മയുടെ ഷോയില്‍ മുഖ്യാതിഥിയായും അദ്ദേഹം എത്തിയിരുന്നു. നാഷണല്‍ അവാര്‍ഡ്, ഇത്തവണത്തെ പിറന്നാള്‍ സമ്മാനം, ഹാപ്പി ബര്‍ത്ത് ഡേ സൂര്യയെന്നായിരുന്നു മമ്മൂട്ടി കുറിച്ചത്.
ജൂലൈ 23നാണ് സൂര്യയുടെ പിറന്നാള്‍. 22നായിരുന്നു മികച്ച നടനുള്ള അവാര്‍ഡ് തേടിയെത്തിയത്. ഇത്തവണത്തെ പിറന്നാള്‍ കളറാവാന്‍ ഇതില്‍പ്പരം എന്ത് സന്തോഷമാണ് വേണ്ടതെന്നായിരുന്നു ആരാധകരും ചോദിച്ചത്.
അഭിനയിക്കാനറിയില്ല, മുഖത്ത് ഭാവം വരുന്നില്ലെന്നൊക്കെ പറഞ്ഞ് പലരും തിരസ്‌കരിച്ച ആ നായകന്‍ ഇന്ന് മികച്ച നടനുള്ള ദേശീയ പുരസ്‌കാരം സ്വന്തമാക്കിയിരിക്കുകയാണ്. വിമര്‍ശിച്ചവര്‍ക്കുള്ള മറുപടി തന്നെയാണ് ഈ അവാര്‍ഡെന്നും ആരാധകര്‍ പറഞ്ഞിരുന്നു. സൂര്യയുടെ അഭിനയത്തെക്കുറിച്ച് പറഞ്ഞുള്ള കുറിപ്പുകളെല്ലാം വൈറലായി മാറിയിരുന്നു.
about suriya