സോഷ്യല്‍ മീഡിയയില്‍ ഏറെ വൈറലായ ഗായികയാണ് മീര, ഇന്‍സ്റ്റാഗ്രാമില്‍ തന്‍റെ ഗാനങ്ങളെല്ലാം പോസ്റ്റ് ചെയ്യുന്ന മീരയെ അഭിനന്ദിച്ച് നിരവധി പേരാണ് രംഗത്തെത്തിയിരുന്നത്. കുറച്ച് നാളുകള്‍ക്ക് മുന്പ് ബ്ലെസി-പൃഥ്വിരാജ് കൂട്ടുക്കെട്ടില്‍ പുറത്തെത്തിയ ആടുജീവിതം എന്ന സിനിമയിലെ ‘പെരിയോനെ’ എന്ന ഹിറ്റ് ഗാനം പാടിയിരുന്നു.
ഇത് വൈറലായതോടെ മീരയ്ക്ക് പ്രശംസയുമായി സാക്ഷാല്‍ എ.ആർ. റഹ്മാന്‍ തന്നെ രംഗത്തെത്തിയിരുന്നു. ഇതെല്ലാം അന്ന് വലിയ വാര്‍ത്തയായിരുന്നു. ഇപ്പോഴിതാ വളരെ വലിയൊരു സന്തോഷം പങ്കുവെച്ച് എത്തിയിരിക്കുകയാണ് മീര.
മീര ആദ്യമായി സിനിമയില്‍ പാട്ട് പാടിയിരിക്കുകയാണ്. കനോലി തീരത്ത് എന്ന സിനിമയിലാണ് മീര പാടിയത്. മെഡി. അസോസിയേറ്റ്സിന്റെ ബാനറിൽ മുജിബ് എടപ്പാൾ നിർമിച്ച് റഷീദ് കെ. മൊയ്തു സംവിധാനം ചെയ്ത ചിത്രമാണ് കനോലി തീരത്ത്.
ഇതോടെ ആദ്യമായി സിനിമയിൽ പാടാനുള്ള അവസരവും കിട്ടിയ സന്തോഷത്തിലാണ് മീര. ശ്യാം ധർമൻ സംഗീത സംവിധാനം നിർവഹിച്ച ‘തേങ്ങി തേങ്ങി കരയ്യല്ലെ പൊന്നേ…’ എന്ന ഗാനമാണ് പാടിയത്. നജിം അർഷാദ്, ഹിഷാം വഹാബ്, ശ്യാം ധർമൻ എന്നിവരാണ് ചിത്രത്തിലെ മറ്റു ഗാനങ്ങൾ ആലപിച്ചത്.
ഉടൻ റിലീസിനെത്തുന്ന സിനിമയിൽ ബിഗ് ബോസ് താരം ഗബ്രിയേല്‍ ജോസാണ് നായകൻ ആയി എത്തുന്നത്. സുനിൽ സുഗത, നീന കുറുപ്പ്, വിനോദ് കോവൂർ, ശിവജി ഗുരുവായൂർ, സീമ ജി. നായർ, വിജയൻ ചാത്തനൂർ, ശ്രീദേവി, നിതുദാസ് എന്നിവരും വേഷമിട്ടിട്ടുണ്ട്.