ഇത്തവണത്തെ ബിഗ് ബോസിലെ പ്രണയജോഡികളെ കണ്ടെത്താനുള്ള ശ്രമത്തിലാണ് ആരാധകര്‍. ത്രികോണ പ്രണയമാണോ ഷോയില്‍ നടക്കുന്നതെന്ന തരത്തിലുള്ള ചര്‍ച്ചകളും സജീവമാണ്. തങ്ങളുടെ ഇഷ്ടത്തെക്കുറിച്ച് പല താരങ്ങളും തുറന്നുപറഞ്ഞിരുന്നു. ബിഗ് ബോസ് വീട്ടില്‍ മണിക്കുട്ടനോടാണ് കൂടുതല്‍ ഇഷ്ടം തോന്നിയതെന്ന് സൂര്യ പറഞ്ഞിരുന്നു. തനിക്ക് ഈ വീട്ടിലൊരാളെ ഭയങ്കരമായി ഇഷ്ടമാണെന്ന് സൂര്യ മോഹന്‍ലാലിനോടും പറഞ്ഞിരുന്നു. അതാരാണെന്ന് പറയട്ടെയെന്ന് ചോദിച്ചപ്പോള്‍ അത് വേണ്ടെന്നായിരുന്നു താരത്തിന്റെ മറുപടി. മണിക്കുട്ടനെക്കുറിച്ചായിരുന്നു സൂര്യ സൂചിപ്പിച്ചത്. കഴിഞ്ഞ ദിവസവും സൂര്യ ഇതേക്കുറിച്ച് സംസാരിച്ചിരുന്നു. മണിക്കുട്ടനോട് ഇഷ്ടം പറഞ്ഞിരുന്നോയെന്ന് ചോദിച്ചപ്പോള്‍ അറിയാമെന്നായിരുന്നു താരത്തിന്റെ മറുപടി.
ഇത് വണ്‍സൈഡാണോ, അതില്‍ നിരാശയുണ്ടോയെന്നായിരുന്നു ഭാഗ്യലക്ഷ്മി പിന്നീട് ചോദിച്ചത്. തിരിച്ച് കിട്ടുമെന്ന് പ്രതീക്ഷിച്ചല്ല ഇഷ്ടപ്പെട്ടതെന്നായിരുന്നു സൂര്യ പറഞ്ഞത്. സാഹിത്യം പറയാന്‍ തുടങ്ങിയെന്നായിരുന്നു റംസാന്റെ കമന്റ്. ടെലിവിഷന്‍ പരിപാടിയല്ലേ, ആളുകള്‍ കാണുന്നതല്ലേ, അതായിരിക്കാം മണിക്കുട്ടന് മൗനം പാലിക്കുന്നതെന്ന നിഗമനത്തിലാണ് സൂര്യ. സൂര്യയ്ക്ക് മണിക്കുട്ടനെ നേരത്തെ തന്നെ അറിയാമായിരുന്നുവെന്നും ഇരുവരും ഒരുമിച്ച് അഭിനയിച്ചിട്ടുണ്ടെന്നുമുള്ള കണ്ടെത്തലുമായി സോഷ്യല്‍ മീഡിയ എത്തിയിരുന്നു. സ്ട്രാറ്റജിയാണെങ്കിലും അല്ലാതെയാണെങ്കിലും ഇത് സൂര്യയ്ക്ക് പണിയാവുമെന്നുള്ള വിലയിരുത്തലുകളുമുണ്ട്.
അതേസമയം സംഭവബഹുലമായി മാറിക്കൊണ്ടിരിക്കുകയാണ് ബിഗ് ബോസ് വീട്ടിലെ കാര്യങ്ങള്‍. കഴിഞ്ഞ തവണ വീക്കിലി ടാസ്‌ക്ക് റദ്ദാക്കിയതോടെ താരങ്ങളെല്ലാം നിരാശയിലായിരുന്നു ഇത്തവണ അങ്ങനെയാവരുതെന്നുള്ള തീരുമാനത്തിലാണ് എല്ലാവരും. മികച്ച പ്രകടനവുമായി മുന്നേറുന്ന മത്സരാര്‍ത്ഥികളിലൊരാളാണ് മണിക്കുട്ടന്. തുടക്കത്തില്‍ അത്ര സജീവമായിരുന്നില്ലെങ്കിലും പൂര്‍വ്വാധികം ശക്തിയോടെ മുന്നേറുകയായിരുന്നു താരം. ഫിനാലെ വരെ എത്താന്‍ സാധ്യതയുള്ള മത്സരാര്‍ത്ഥികളിലൊരാളായാണ് മണിക്കുട്ടനെ വിശേഷിപ്പിക്കുന്നത്. ഋതു മന്ത്രയും മണിക്കുട്ടനും പ്രണയത്തിലാണോയെന്ന് സംശയിപ്പിക്കുന്ന തരത്തിലുള്ള കാര്യങ്ങളായിരുന്നു ഇടയ്ക്ക് നടന്നത്. അനൂപ് കൃഷ്ണനായിരുന്നു ഇരുവരോടും ഇതേക്കുറിച്ച് ചോദിച്ചത്.
bigboss