മലയാളി പ്രേക്ഷകരുടെ പ്രിയപ്പെട്ട നടിയാണ് മംമ്ത മോഹൻദാസ്. 2005ൽ പുറത്തിറങ്ങിയ മയൂഖം എന്ന ചിത്രത്തിലൂടെ അഭിനയ ലോകത്തിലെത്തിയ താരം ഇതുവരെ സൂപ്പർ താരങ്ങളുടെയടക്കെ നായികയായി തിളങ്ങി. ഒരു അഭിനേത്രി മാത്രമല്ലെന്നും താൻ നല്ലൊരു ഗായികയാണെന്നു കൂടി താരം പലപ്പോഴും തെളിയിച്ചിട്ടുണ്ട്. സോഷ്യൽ മീഡിയയിൽ അത്ര സജീവമല്ലെങ്കിലും ഇടയ്ക്കിടെ തന്റെ ഫോട്ടോഷൂട്ട് ചിത്രങ്ങളും വിശേഷങ്ങളും എല്ലാം പങ്കുവെയ്ക്കാറുണ്ട്.
കരിയറിലും ജീവിതത്തിലും ഒരുപോലെ ഉയർച്ച താഴ്ചകൾ വന്ന മംമ്ത ഇന്ന് പ്രതിസന്ധികൾ നേരിടുന്നവർക്ക് പ്രചോദനം ആണ്. രണ്ട് വട്ടം കാൻസറിനെ അതിജീവിച്ചാണ് മംമ്ത തന്റെ ജീവിതം തിരിച്ച് പിടിച്ചത്. തന്റെ നിലപാടുകൾ പലപ്പോഴും മംമ്ത തുറന്ന് പറയാറുമുണ്ട്. കാൻസറിനെ നേരിട്ട് കരിയറിലെ തിരക്കുകളുമായി മുന്നോട്ട് പോകവെയാണ് വിറ്റിലിഗൊ എന്ന ഓട്ടോഇമ്മ്യൂൺ കണ്ടീഷൻ മംമ്തയെ ബാധിക്കുന്നത്. ചർമ്മത്തെ ബാധിക്കുന്ന വിറ്റിലൊഗുയുടെ ചികിത്സയ്ക്കും നടി വിധേയയായി.
ഇപ്പോഴിതാ നടിയുടെ അതിജീവനത്തെ കുറിച്ച് സംവിധായകനും നിർമാതാവുമെല്ലാമായ ആലപ്പി അഷ്റഫ് പറഞ്ഞ വാക്കുകളാണ് വൈറലാകുന്നത്. സ്വന്തം യുട്യൂബ് ചാനലിൽ പങ്കിട്ട പുതിയ വീഡിയോയിലാണ് ആലപ്പി അഷ്റഫ് മംമ്തയുടെ ജീവിത യാത്രയെ കുറിച്ച് തനിക്ക് അറിയാവുന്ന കാര്യങ്ങൾ വിവരിച്ചത്. രോഗം പിടിപെട്ടില്ലായിരുന്നുവെങ്കിൽ സൗത്ത് ഇന്ത്യയിലെ സൂപ്പർസ്റ്റാറാകേണ്ട നടിയായിരുന്നു മംമ്ത മോഹൻദാസെന്നും ആലപ്പി അഷ്റഫ് പറയുന്നു.
കൊടും കാറ്റിലും നെഞ്ച് വിരിച്ച് നിൽക്കുന്ന വൻ മരങ്ങളുണ്ട്. കൊടും രോഗങ്ങൾ കാർന്ന് തിന്നുമ്പോഴും ചിരിക്കുന്ന മുഖങ്ങളുണ്ട്. വലിയ വലിയ വേദനകൾ സഹിച്ചിട്ടും ഇന്നും തകരാത്തവരുമുണ്ട്. പ്രതിസന്ധികൾക്ക് മുന്നിൽ കീഴടങ്ങാത്ത എല്ലാ നഷ്ടപ്പെട്ടിട്ടും വിദൂരമായ ചെറിയ സാധ്യതകളോട് പോലും അഭിനേവശമുള്ളവരെയൊക്കെയാണ് നമ്മൾ കരുത്തരെന്ന് വിളിക്കുന്നത്. അത്തരത്തിൽ വിധിക്ക് മുമ്പിൽ കീഴടങ്ങാതെ കാൻസർ എന്ന മഹാമാരിയോട് പോരാടുന്ന മംമ്ത എന്ന നടിയുടെ ജീവിത പോരട്ടമാണ് ഞാൻ ഇന്ന് ഇവിടെ വരച്ച് കാട്ടുന്നതെന്ന് പറഞ്ഞുകൊണ്ടാണ് ആലപ്പി അഷ്റഫിന്റെ വീഡിയോ ആരംഭിക്കുന്നത്.
മോനിഷയുടെ മാതാവ് ശ്രീദേവി ഉണ്ണി ഹരിഹരന് പരിചയപ്പെടുത്തി കൊടുത്ത് ഹരിഹരൻ സിനിമാ ലോകത്തിന് സമ്മാനിച്ച മണിമുത്താണ് മംമ്ത മോഹൻദാസ്. ആദ്യ ചിത്രത്തിൽ തന്നെ ഒരു മാറാരോഗിയുടെ വേഷത്തിൽ അഭിനയിച്ചപ്പോൾ മംമ്ത ഒരിക്കൽ പോലും കരുതി കാണില്ല ജീവിതത്തിലും ഇത്തരമൊരു അവസ്ഥ പകർന്നാടേണ്ടി വരുമെന്ന്.
മയൂഖം എന്ന മംമ്തയുടെ ആദ്യ സിനിമ ബോക്സ് ഓഫീസിൽ വിജയിച്ചില്ലെങ്കിലും മംമ്തയുടെ വേഷം ശ്രദ്ധിക്കപ്പെട്ടു. ചെറുപ്പം മുതൽ സംഗീതത്തോട് ഭ്രാന്തമായ അഭിനിവേശം മംമ്തയ്ക്കുണ്ടായിരുന്നു. മലയാളത്തിലെ മുൻനിര നായികയായി ഉയർന്ന മംമ്തയ്ക്ക് തെലുങ്കിലെ ബിഗ് ബജറ്റ് സിനിമ അരുന്ധതിയിൽ നായിക വേഷം ചെയ്യാനുള്ള അവസരം വന്നിരുന്നു. അനുഷ്കയ്ക്ക് പകരം നായിക റോളിലേക്ക് ആദ്യം വിളി വന്നത് മംമ്തയ്ക്കായിരുന്നു.
കരാറിൽ ഒപ്പുവെച്ചുവെങ്കിലും മാനേജരുടേയും മറ്റും കുബുദ്ധി കാരണം മംമ്തയ്ക്ക് പിന്നീട് അതിൽ നിന്നും പിന്മാറേണ്ടി വന്നു. മലയാളത്തിൽ ഉൾപ്പടെ അരുന്ധതി സൂപ്പർ ഹിറ്റായിരുന്നു. ഈ സംഭവം യാഥാർത്ഥ്യങ്ങൾ തിരിച്ചറിഞ്ഞ് മുന്നോട്ട് പോകാൻ മംമ്തയെ സഹായിച്ചു. മംമ്തയുടെ സൗന്ദര്യത്തോടൊപ്പം തന്നെ ബുദ്ധിയും ധൈര്യവും എടുത്ത് പറയേണ്ടതാണ്. മംമ്തയെ മറ്റൊരു ഝാൻസി റാണി എന്നാണ് ഒരിക്കൽ സെലിബ്രിറ്റി മേക്കപ്പ് ആർട്ടിസ്റ്റ് രഞ്ജു രഞ്ജിമാർ വിശേഷിപ്പിച്ചത്.
എന്ത് പേരിട്ട് വിളിക്കണമെന്ന് എനിക്കറിയില്ല. എന്ത് പേര് വിളിച്ചാലും അത് കൂടുതൽ അല്ല. ഞാൻ സ്കിൻ കെയറിന് വേണ്ടി അത് പോലെ കഷ്ടപ്പെടുന്ന ആളാണ്. എന്റെ ചർമ്മത്തിൽ ഒരു പാട് വന്ന് കഴിഞ്ഞാൽ എനിക്ക് കുറച്ച് ദിവസത്തേക്ക് ഉറക്കമുണ്ടാവില്ല. സൗന്ദര്യമുള്ള നടിയാണ് മംമ്ത. എന്റെ കേരളത്തിലെ ദീപിക പദുകോൺ. ഞാൻ അത്രയും കെയർ ചെയ്ത് മേക്കപ്പ് ചെയ്യുന്ന ആർട്ടിസ്റ്റാണ്. അങ്ങനെയൊരു ആർട്ടിസ്റ്റിന് ഇത് പോലെ സ്കിന്നിന് പ്രശ്നം വന്നെന്ന് കണ്ടപ്പോൾ പൂർണമായും അപ്സെറ്റായി.
എന്റെ പ്രാർത്ഥന ആ മനോഹരമായ മുഖത്ത് ഒരു കേടുപാടും സംഭവിക്കരുത് എന്നായിരുന്നു. ബാക്കിയെല്ലാം എങ്ങനെയെങ്കിലും അഡ്ജസ്റ്റ് ചെയ്യാം. ദൈവം തമ്പുരാൻ സഹായിച്ച് അവളുടെ മുഖത്ത് യാതൊരു വിധ പ്രശ്നവും ഇല്ല. ആ സൗന്ദര്യം നാൾക്ക് നാൾ വർധിച്ച് വരുന്നു. കൈയിലെ പാടുകളെല്ലാം മാറി വരുന്നുണ്ട്. അവളത് മാറ്റിയെടുക്കും അതാണ് മംമ്ത മോഹൻദാസ്. ഞങ്ങൾ ഒരുമിച്ച് കരഞ്ഞ ഒരു സാഹചര്യമുണ്ട്. രുദ്രംഗി എന്ന സിനിമയിൽ ഫൈറ്റ് സീൻ ചെയ്യുമ്പോൾ മംമ്തയുടെ കൈയ്ക്ക് വീക്കമുണ്ട്. ഒരു ദിവസം കൊണ്ട് ഇത്രയും ഫൈറ്റ് സീനെടുക്കണം.
അതൊക്കെ ചെയ്ത് പുള്ളിക്കാരി കാരവാനിൽ വന്ന് കൈ വലിച്ച് പിടിച്ച് കരയും. കണ്ണിൽ നിന്ന് കുടു കുടാ വെള്ളം വരും. ഞാൻ ആ കൈ തോളത്തേയ്ക്ക് വെച്ച് അവിടെ ഇരിക്കും. ഞാൻ ദൈവത്തെ ശപിച്ചിട്ടുണ്ട്. ഒരാളെ എന്തിനാണ് ഇങ്ങനെ കഷ്ടപ്പെടുത്തുന്നതെന്ന് പറഞ്ഞ് ഞാൻ കരയാറുണ്ട്. ഞാൻ ദൈവത്തെ ശപിച്ചിട്ടുണ്ടെങ്കിൽ, മുട്ടുകാലിൽ നിന്നിട്ടുണ്ടെങ്കിൽ അത് മംമ്തയ്ക്ക് വേണ്ടിയാണ്. മംമ്തയ്ക്കും പ്രിയാമണിയ്ക്കും എന്നെ അറിയാം. ഒരാളെ പോലും സുഖിപ്പിച്ച് സംസാരിക്കുന്ന ആളല്ല ഞാൻ എന്നും രഞ്ജു രഞ്ജിമാർ വ്യക്തമാക്കി.
താരം തന്നെയാണ് തന്റെ അവസ്ഥ തുറന്നു പറഞ്ഞത്. ശരീരത്തിന്റെ നിറം 70 ശതമാനവും നഷ്ടമായെന്നും ഇതിനാൽ മേക്കപ്പ് ചെയ്താണ് താൻ പുറത്തിറങ്ങുന്നതെന്നും മംമ്ത തുറന്ന് പറഞ്ഞിരുന്നു. രോഗത്തെക്കുറിച്ച് അറിഞ്ഞതോടെ താൻ തകർന്നു പോയെന്നും മംമ്ത പറഞ്ഞിരുന്നു. ഞാൻ എന്റെ അവസ്ഥയെ കുറിച്ച് തുറന്ന് പറഞ്ഞ ശേഷം ആരും എന്നോടൊന്നും ചോദിക്കുന്നില്ല. എപ്പോഴും ഇത് കവർ ചെയ്ത് വെക്കണമെന്ന തോന്നലും നിന്നു.
പക്ഷെ ഇപ്പോഴും ഞാനിത് മറച്ച് പിടിക്കുന്നുണ്ട്. ആളുകൾക്ക് അതൊരു ഷോക്ക് ആകരുതെന്ന് കരുതി. ആയുർവേദമാണ് ഇപ്പോൾ ചികിൽസിക്കുന്നത്. അത് ഫലപ്രദമാകുന്നുണ്ട്. അതിന്റെ പൊസറ്റീവ് കാര്യങ്ങൾ കാണുന്നുണ്ട്. എന്നാണ് എന്റെ ഈ അവസ്ഥക്ക് ഒരു മാറ്റം ഉണ്ടാവുന്നത് എന്ന കാത്തിരിപ്പിലാണ് ഞാൻ എന്നും മംമ്ത പറയുന്നു. നേരത്തേത് പോലെ തന്നെ നിലവിലെ സാഹചര്യത്തേയും താരം മറികടക്കുമെന്നാണ് ആരാധകർ പറയുന്നത്.
ോ
ബാല്യകാല സുഹൃത്ത് സുജിത്ത് പത്മനാഭനുമായി 11.11. 2011 എന്ന ഫാൻസി നമ്പർ ദിനത്തിലാണ് മംമ്തയുടെ വിവാഹം നടന്നത്. മറ്റൊരു ഫാൻസി നമ്പറായ 12.12. 2012 എന്ന ദിനത്തിൽ വിവാഹമോചനത്തിലുള്ള തീരുമാനം മംമ്ത എടുത്തു. ശേഷം കരിയർ ശ്രദ്ധകൊടുത്ത് വളർച്ചയുടെ പടവുകൾ ഒരോന്നായി മംമ്ത കയറുന്നതിനിടയിൽ വീണ്ടും കാൻസർ എത്തി. ഇക്കുറി രക്ഷയില്ലെന്നാണ് മംമ്ത കരുതിയത്. പ്രോജക്ടുകൾ എല്ലാം ഉപേക്ഷിച്ച് ജീവൻ തിരികെ പിടിക്കാനുള്ള ഓട്ടത്തിലായിരുന്നു അവർ. വീണ്ടും ക്ഷണിക്കാതെ വന്ന അതിഥി മംമ്തയുടെ വ്യക്തി ജീവിതത്തെയും ബാധിച്ചു.
തന്റെ അനാരോഗ്യം മറ്റുള്ളവർക്ക് ബാധ്യതയായി തീരുമോയെന്ന് മംമ്ത ചിന്തിച്ചു. കൂടാതെ ആശ്വസിപ്പിച്ച് ഒപ്പം നിൽക്കാതെ പോയ പ്രണയവും. എല്ലാം ചേർന്ന് അസ്വസ്ഥമായ മനസുമായി മംമ്ത ബോൺമാരോ ട്രാൻസ്പ്ലാന്റ്സിന് വിധേയമായി. മജ്ജ മാറ്റിവെക്കൽ ശസ്ത്രക്രിയ വിജയിക്കാൻ നാൽപ്പത് ശതമാനം മാത്രമെ സാധ്യതയുള്ളുവെന്ന് അറിഞ്ഞിട്ടും വേറെ വഴിയില്ലാതെ അവർ സർജറി ചെയ്തു. ഇല്ലാത്ത ധൈര്യം പിടിച്ചെടുത്ത് വീണ്ടും സിനിമയിലേക്ക് തിരികെ വന്നു.
2013-2014 കാലഘട്ടത്തിൽ രോഗം മംമ്തയിൽ ശക്തമായി പിടിമുറുക്കിയിരുന്നു. പതിനെട്ട് കീമോയും ഒരു സർജറിയും കഴിഞ്ഞ അവരുടെ ശരീരത്തിലേക്ക് കാട്ടുതീ പോലെ പടർന്ന് കയറി. മരണത്തിനും ജീവിതത്തിനും ഇടയിലുള്ള യാത്രവേള. അതിനിടയൽ അമേരിക്കയിൽ പുതിയതായി കണ്ടുപിടിച്ച പരീക്ഷണ ചികിത്സയ്ക്കായി മംമ്ത പോയി. ആ ചികിത്സയ്ക്ക് വിധേയയാകുന്ന ആദ്യത്തെ ഇന്ത്യക്കാരിയായിരുന്നു മംമ്ത. മാതാപിതാക്കളെ പോലും നടി ഒപ്പം കൂട്ടിയില്ല.
ലോകത്തിന്റെ വിവിധ ഭാഗങ്ങളിൽ നിന്നും പരീക്ഷണ വസ്തുക്കളായി എത്തിയ ഒരു കൂട്ടം രോഗികൾക്കൊപ്പം മംമ്ത തന്റെ ചികിത്സയും ആരംഭിച്ചു. ആ പരീക്ഷണത്തിൽ നടി വിധിയെ തോൽപ്പിച്ച് വിജയം കൈവരിച്ചു. മംമ്തയ്ക്ക് അമേരിക്കയിൽ പോയി കീമോ ചെയ്യാനുള്ള സൗകര്യത്തിന് വേണ്ടിയാണ് ലണ്ടനിൽ ഷൂട്ട ചെയ്യേണ്ടിയിരുന്ന ടു കൺട്രീസിന്റെ ഷൂട്ട് കാനഡയിലേക്ക് അണിയറപ്രവർത്തകർ മാറ്റിയത്. മലയാള സിനിമയിൽ തനിക്കുണ്ടായ വേദനിപ്പിക്കുന്ന നന്ദികേടിനെ കുറിച്ച് പലപ്പോഴായി മംമ്ത വെളിപ്പെടുത്തിയിട്ടുണ്ട്.
ഒരു നടി സിനിമയിലേക്ക് രണ്ടാം വരവ് നടത്തി തിരിച്ച് വരുമ്പോൾ അവർ നായികയായ സിനിമയിൽ മംമ്ത ഒരു ചെറിയ വേഷം ചെയ്ത് കൊടുത്തു. എന്നാൽ പിന്നീട് മംമ്ത നായികയായ സിനിമയിലേക്ക് ഒരു ചെറിയ വേഷം ചെയ്യാൻ അവരെ വിളിച്ചപ്പോൾ പോയി പണിനോക്കൂവെന്ന് പറഞ്ഞ് അവഗണിച്ചുവെന്ന്. ഇതേ കുറിച്ച് അവർ സംസാരിച്ചത് കേട്ടാൽ ആ നടി ആരാണെന്ന് മലയാളികൾക്ക് മനസിലാകും. ചില നടിമാർ പിആർ വർക്കേഴ്സിനെ വെച്ച് സൂപ്പർ സ്റ്റാറെന്ന് സ്വയം പ്രചരിപ്പിക്കുന്നുവെന്നും മംമ്ത പറഞ്ഞിരുന്നു.
മലയാളത്തിൽ സൂപ്പർ സ്റ്റാർ എന്നൊന്നില്ല. എല്ലാവരും മികച്ച അഭിനേത്രികളാണ്. ഒരുപക്ഷെ രോഗം പിടിപെട്ടില്ലായിരുന്നുവെങ്കിൽ അവർ തന്നെയാകുമായിരുന്നു സൗത്ത് ഇന്ത്യയിലെ സൂപ്പർസ്റ്റാർ. ഇത്രത്തോളം ജീവിത പോരാട്ടം നടത്തുന്ന ഈ അതിജീവിത ഒരു അത്ഭുതമാണെന്നും ആലപ്പി അഷ്റഫ് പറഞ്ഞു. സിനിമയിലെ തരംതിരിവുകളെക്കുറിച്ച് തുറന്നടിച്ചപ്പോഴാണ് മലയാളത്തിലെ മുൻനിര നായിക നടിയിൽ നിന്നും ഉണ്ടായ ഒരു അനുഭവം മംമ്ത വിവരിച്ചത്.
മലയാളത്തിൽ ഒരു വലിയ നായിക തിരിച്ച് വരവ് നടത്തിയപ്പോൾ ആ സിനിമയിൽ ഞാൻ സെക്കൻഡ് ലീഡായി അഭിനയിച്ചിട്ടുണ്ട്. ആ അഭിനേത്രിയുടെ തിരിച്ചുവരവിനെ പിന്തുണയ്ക്കുന്നതിനാണ് ഞാൻ ആ വേഷം സ്വീകരിച്ചത് തന്നെ. പക്ഷെ ഞാൻ ലീഡ് ചെയ്ത ഒരു സിനിമയിൽ ഒരു അതിഥി വേഷത്തിനായി ആ നായികയെ വിളിച്ചപ്പോൾ അവർ നോ പറഞ്ഞു. കാരണമെന്താണ്? അരക്ഷിതത്വം. ഒരു വ്യക്തിയെന്ന നിലയിലോ ആർട്ടിസ്റ്റ് എന്ന നിലയിലോ ഞാൻ അരക്ഷിതാവസ്ഥ നേരിടുന്നില്ല. അതാണ് എന്നെ മറ്റുള്ളവരിൽ നിന്ന് വ്യത്യസ്തയാക്കുന്നത് എന്നാണ് മംമ്ത പറഞ്ഞത്.