നടിയും, അവതാരകയും സോഷ്യൽ മീഡിയ ഇൻഫ്ലുവൻസറുമായി മലയാളികൾക്ക് പരിചിതമായ മുഖമാണ് പാർവതി ആർ കൃഷ്ണ. മഴവിൽ മനോരമയിൽ സംപ്രേഷണം ചെയ്യുന്ന ‘കിടിലം’ എന്ന ഷോയുടെ അവതാരക കൂടിയാണ് പാർവതി. ഇപ്പോഴിതാ ബേസിൽ ജോസഫ് പ്രധാന കഥാപാത്രമായെത്തുന്ന ‘കഠിന കഠോരമീ അണ്ഡകടാഹം ചിത്രത്തിൽ തനിക്കൊപ്പം മകൻ അച്ചുവും അഭിനയിക്കുന്നുണ്ടെന്ന സന്തോഷ വാർത്ത ആരാധകരുമായി പങ്കുവയ്ക്കുകയാണ് പാർവതി.
“അഭിനേത്രി, അമ്മ എന്നീ നിലകളിൽ ഏറ്റവും അഭിമാനം തോന്നിയ നിമിഷം. മാലിക്കിനു ശേഷം ഞാൻ അഭിനയിക്കുന്ന ചിത്രത്തിൽ അച്ചുക്കുട്ടനും ആദ്യമായി മുഖം കാണിക്കുന്നു” മകനൊപ്പമുള്ള ചിത്രം പങ്കുവച്ച് പാർവതി കുറിച്ചു. അണിയറപ്രവർത്തകർക്ക് നന്ദി അറിയിക്കുന്നുമുണ്ട് പാർവതി.
മുഹസിന്റെ സംവിധാനത്തിൽ ഒരുങ്ങുന്ന ചിത്രമാണ് ‘കഠിന കഠോരമീ അണ്ഡകടാഹം.’ ചിത്രം ഈദിനു തിയേറ്റുകളിലെത്തും. വെള്ളിയാഴ്ച ചിത്രത്തിലെ വീഡിയോ സോങ്ങ് പുറത്തിറങ്ങിയിരുന്നു.
സ്വന്തമായി യൂട്യൂബ് ചാനലുള്ള പാർവതി മകൻ അവ്യുക്തിനൊപ്പമുള്ള വീഡിയോയാണ് അധികവും ഷെയർ ചെയ്യാറുള്ളത്. മകനെ അച്ചുക്കുട്ടൻ എന്നാണ് പാർവതി വിളിക്കുന്നത്.