കേരളത്തിൽ ഇക്കുറി കനത്ത പോളിങ്ങാണ് ഇതുവരെ റിപ്പോര്‍ട്ട് ചെയ്തിരിക്കുന്നത്. സിനിമാതാരങ്ങളടക്കം നിരവധിപേര്‍ ഇക്കുറി രാവിലെ തന്നെ തങ്ങളുടെ സമ്മതിദാന അവകാശം
രേഖപ്പെടുത്താൻ ബൂത്തുകളിലെത്തിയ കാഴ്ചയാണ് എവിടേയും കാണാൻ കഴിയുന്നത്.
‘കൽക്കി’ സിനിമയുടെ ചിത്രീകരണത്തിനിടയിൽ തെങ്കാശിയിൽ നിന്ന് പാഞ്ഞെത്തിയാണ് നടൻ ടൊവിനോ തോമസ് വോട്ട് രേഖപ്പെടുത്തിയത്. തിങ്കളാഴ്ച രാത്രി ഷൂട്ട് കഴിഞ്ഞ് ഏഴുമണിക്കൂര്‍ കാര്‍ ഓടിച്ചാണ് പുലർച്ചെ വീട്ടിൽ എത്തിയത്. രാവിലെ ഏഴോടെ ഇരിങ്ങാലക്കുട ഗവ. ഗേൾസ് സ്കൂളിലെ ആദ്യ വോട്ടര്‍മാരായി ടൊവിനോയും ഭാര്യ ലിഡിയയും എത്തുകയായിരുന്നു. വോട്ട് രേഖപ്പെടുത്തിയ താരം പിന്നീട് 9 മണിയോടെ തിരിച്ച് തെങ്കാശിയിലേക്ക് പോയെന്നാണ് അറിയാൻ കഴിയുന്നത്.
വോട്ട് ചെയ്ത ശേഷം ടൊവിനോ വിരലിലെ മഷി അടയാളം കാണിച്ചു കൊണ്ട് ഇൻസ്റ്റാഗ്രാമിലും ഫേസ്ബുക്കിലുമടക്കം ചിത്രം പങ്കുവെച്ചിരുന്നു. ചിത്രത്തിന് താഴെ ആരാധകന്‍റെ കമന്‍റിന് മറുപടിയായാണ് ടൊവീനോ ഞാൻ സിനിമ ലൊക്കേഷനിൽ നിന്നാണ് വരുന്നതെന്നും വോട്ട് ചെയ്യാൻ തെങ്കാശി മുതൽ ഇരിഞ്ഞാലക്കുട വരെ ഉറക്കം കളഞ്ഞ് 7 മണിക്കൂർ ഡ്രൈവ് ചെയ്താണ് വന്നതെന്നും പറഞ്ഞിരിക്കുന്നത്.
Tovino’s Voting…