മാധ്യമപ്രവര്ത്തകയെ അപമാനിച്ചുവെന്ന കേസില് സുരേഷ് ഗോപിക്ക് മുന്കൂര് ജാമ്യം അനുവദിച്ച് ഹൈക്കോടതി. അറസ്റ്റു ചെയ്താല് ജാമ്യത്തില് വിടാന് പോലീസിന് കോടതി നിര്ദ്ദേശം നല്കി. കേസില് തനിക്കെതിരെ ഗുരുതര കുറ്റങ്ങള് ചുമത്തി അറസ്റ്റ് ചെയ്യാന് സാധ്യതയുണ്ടെന്ന് കാണിച്ചാണ് സുരേഷ് ഗോപി ഹൈക്കോടതിയെ സമീപിച്ചത്. മാധ്യമപ്രവര്ത്തകയുടെ പരാതിയില് കേസില് സുരേഷ് ഗോപിക്കെതിരെ 354 A വകുപ്പ് ചുമത്തിയാണ് പോലീസ് കേസ് എടുത്തത്.
എന്നാല് പിന്നീട് ഐപിസി 354 പ്രകാരം സ്ത്രീത്വത്തെ അപമാനിച്ചെന്ന കുറ്റം കൂടി ഉള്പ്പെടുത്തുകയായിരുന്നു. ഇതോടെ പുതിയ വകുപ്പുകള് ചുമത്തിയത് തന്നെ അറിയിച്ചില്ലെന്നും അഞ്ചുവര്ഷം വരെ തടവ് ലഭിക്കാവുന്ന ജാമ്യമില്ലാത്ത കുറ്റമായതിനാല് അറസ്റ്റ് ചെയ്യുമെന്ന് ആശങ്കയുണ്ടെന്നും ചൂണ്ടിക്കാട്ടിയാണ് സുരേഷ് ഗോപി ഹൈക്കോടതിയില് ഹര്ജി നല്കിയത്.
ജനുവരി 17ന് മകളുടെ വിവാഹം ഗുരുവായൂരിലും റിസപ്ഷന് തിരുവനന്തപുരത്തും നടത്താന് തീരുമാനിച്ചിരിക്കുകയാണ്.ഈ സാഹചര്യത്തില് മുന്കൂര് ജാമ്യം നല്കണമെന്ന് ഹര്ജിയില് പറഞ്ഞിരുന്നു. കരുവന്നൂര് ബാങ്ക് തട്ടിപ്പുകേസില് പണം നഷ്ടപ്പെട്ട നിക്ഷേപകര്ക്കുവേണ്ടി പ്രതിഷേധമാര്ച്ച് നടത്തിയതിലുള്ള വൈരാഗ്യമാണ് കേസെടുക്കാന് കാരണമെന്നും ഹര്ജിയില് പറയുന്നുണ്ട്. മാധ്യമങ്ങളെ കണ്ട ശേഷം പോകാനൊരുങ്ങിയ തന്നെ മാധ്യമപ്രവര്ത്തക തടഞ്ഞുനിര്ത്തുകയായിരുന്നുവെന്നതടക്കമുള്ള വാദങ്ങളും ഹര്ജിയില് ഉന്നയിച്ചിരുന്നു.
തുടര്ന്ന് ഹര്ജി പരിഗണിച്ച കോടതി ഇക്കാര്യത്തില് സര്ക്കാരിന്റെ നിലപാട് തേടി.എന്നാല് സുരേഷ് ഗോപിയെ അറസ്റ്റ് ചെയ്യേണ്ട സാഹചര്യം ഇല്ലെന്നാണ് പോലീസ് കോടതിയെ അറിയിച്ചത്. ഒക്ടോബര് 27 നായിരുന്നു സുരേഷ് ഗോപിക്കെതിരായ കേസിനാസ്പദമായ സംഭവം. കോഴിക്കോട് വെച്ച് മാധ്യമങ്ങളോട് പ്രതികരിക്കവെ ചോദ്യം ഉയര്ത്തിയ മീഡിയ വണ് ചാനലിലെ വനിത മാധ്യമ പ്രവര്ത്തകയുടെ തോളില് സുരേഷ് ഗോപി കൈവെക്കുകയായിരുന്നു.
സുരേഷ് ഗോപിയുടെ പ്രവൃത്തിയില് ആദ്യം തന്നെ മാധ്യമപ്രവര്ത്തക അനിഷ്ടം പ്രകടിപ്പിച്ചെങ്കിലും വീണ്ടും സുരേഷ് ഗോപി ആവര്ത്തിച്ചു. ഇതോടെ മാധ്യമ പ്രവര്ത്തക സുരേഷ് ഗോപിയുടെ കൈ എടുത്ത് മാറ്റി. ഇതിന്റെ ദൃശ്യങ്ങള് സോഷ്യല് മീഡിയയില് വൈറലായിരുന്നു. പിന്നാലെയാണ് ഇവര് നടനെതിരെ കേസ് കൊടുത്തത്. സംഭവത്തില് പിന്നീട് സുരേഷ് ഗോപി ഖേദം പ്രകടിപ്പിച്ചിരുന്നു. എന്നാല് തൊഴിലെടുക്കുന്ന സ്ത്രീകളോടുള്ള അപമാനമാണ് സുരേഷ് ഗോപിയുടെ നടപടിയെന്നായിരുന്നു ഇതിനോട് മാധ്യമപ്രവര്ത്തക പ്രതികരിച്ചത്.