നിരവധി ആരാധകരുള്ള താരമാണ് സോനു നിഗം. താരത്തിന്റെ ഏറ്റവും പുതിയ ഗാനമായ ‘സുന്‍ സരാ’ എന്ന ഗാനത്തിനെതിരെ രംഗത്തെത്തിയിരിക്കുകയാണ് പാകിസ്ഥാന്‍ ഗായകന്‍ ഒമര്‍ നദീം. 2009ല്‍ പുറത്തിറങ്ങിയ തന്റെ ഗാനമായ ‘ഏ ഖുദാ’ എന്ന ഗാനത്തിന്റെ കോപ്പിയടിയാണെന്ന ആരോപണവുമായി ആണ് ഒമര്‍ നദീം രംഗത്ത് വന്നിരിക്കുന്നത്. ഒറിജിനല്‍ കോമ്പോസിഷന്റെ ക്രെഡിറ്റ് പോലും നല്‍കാത്തതിന് നിര്‍മ്മാതാക്കളെ ടാഗ് ചെയ്ത് പാക് ഗായകന്‍ സോഷ്യല്‍ മീഡിയ പോസ്റ്റ് ഇട്ടിരുന്നു.
എന്നാല്‍ ഇന്‍സ്റ്റാഗ്രാമില്‍ നദീമിന്റെ പോസ്റ്റ് കണ്ടപ്പോള്‍ തനിക്ക് ഇത്തരം ഒരു ഗാനത്തെക്കുറിച്ച് അറിവില്ലന്നും,ഇത്തരത്തില്‍ പാട്ട് പാടേണ്ടി വന്നതില്‍ പാക് ഗായകനോട് ക്ഷമാപണം നടത്തി സോനു നിഗം രംഗത്ത് എത്തിയതാണ് പുതിയ വഴിത്തിരിവ്. ഒരാഴ്ച മുമ്പ് നദീം ‘സുന്‍ സര’യുടെയും ‘ഏ ഖുദാ’യുടെയും ക്ലിപ്പുകള്‍ ഇന്‍സ്റ്റാഗ്രാമില്‍ പങ്കുവെച്ചിരുന്നു ‘എന്റെ ജീവിതത്തിലെ ചില പ്രധാന കാര്യങ്ങളില്‍ ശ്രദ്ധിക്കാന്‍ കഴിയാത്ത ഒരു ഘട്ടത്തില്‍ ഞാന്‍ എത്തിയിരിക്കുന്നു.
എങ്കില്‍ നിങ്ങള്‍ അത് ഉപയോഗിക്കുകയാണെങ്കില്‍ ഒജി ട്രാക്കില്‍ ചെറിയ ക്രെഡിറ്റെങ്കിലും നല്‍കാമായിരുന്നു. നിങ്ങള്‍ എന്റെ ഗാനം ശ്രദ്ധിച്ചെങ്കില്‍ കുറഞ്ഞത് അല്‍പ്പം സൂക്ഷ്മതയോടെയെങ്കിലും ചെയ്യാമായിരുന്നു. സോനു നിഗമിന്റെ വലിയ ആരാധകനാണ് ഞാന്‍’ പാക് ഗായകന്റെ പോസ്റ്റ് പറയുന്നു.
നദീമിന്റെ പോസ്റ്റിനോട് പ്രതികരിച്ച സോനു നിഗം, പാട്ട് പാടിയതിന് അദ്ദേഹത്തോട് മാപ്പ് ചോദിച്ച് രംഗത്ത് എത്തി. ‘നിങ്ങള്‍ക്കെല്ലാം അറിയാവുന്നത് പോലെ, എനിക്ക് ഇതുമായി ഒരു ബന്ധവുമില്ല. ദുബായില്‍ എന്റെ അയല്‍വാസിയായ കെആര്‍കെ (കമാല്‍ ആര്‍ ഖാന്‍) ആണ് എന്നോട് പാട്ട് ചെയ്യാന്‍ ആവശ്യപ്പെട്ടത്. പിന്നെ അദ്ദേഹത്തിന്റെ ആവശ്യം നിരസിക്കാന്‍ കഴിഞ്ഞില്ല. ഞാന്‍ പാടിയെങ്കിലും ഞാന്‍ അതിന് മുന്‍പ് ഒമറിന്റെ പതിപ്പ് കേട്ടിരുന്നെങ്കില്‍, ഞാന്‍ ഒരിക്കലും പാടില്ലായിരുന്നു’എന്നും സോനു നിഗം പ്രതികരിച്ചു.
സോനു നിഗത്തിന്റെ ശബ്ദത്തിലെത്തിയ പുതിയ ഗാനം ഡിസംബര്‍ 2 ന് ടിസീരീസ് പുറത്തിറക്കിയത്. പാക് ഗായകന്റെ ആലാപനത്തെയും സോനു നിഗം അഭിനന്ദിച്ചു. ‘എന്നെക്കാള്‍ നന്നായി താങ്കള്‍ ഈ ഗാനം പാടി. നിങ്ങളുടെ പാട്ട് ഞാന്‍ കേള്‍ക്കാത്തതില്‍ ഞാന്‍ ക്ഷമ ചോദിക്കുന്നു. ഞാനിപ്പോള്‍ കേട്ടു. എന്തൊരു അസാധാരണ ഗാനമാണ്, തീര്‍ച്ചയായും എന്നെക്കാള്‍ നന്നായി നിങ്ങള്‍ അത് ആലപിച്ചു. ഇത് തുടരുക. നിങ്ങള്‍ക്ക് കൂടുതല്‍ അനുഗ്രഹങ്ങള്‍. നിങ്ങള്‍ക്ക് കൂടുതല്‍ ബഹുമതികള്‍ ലഭിക്കട്ടെ. ഒത്തിരി സ്‌നേഹവും പ്രാര്‍ത്ഥനയും’ എന്നാണ് സോനു നിഗം എഴുതിയത്.