ഷാരൂഖ് ഖാന്റെ വസതിയായ മന്നത്തില്‍ ആരാധകര്‍ അതിക്രമിച്ചു കയറിയത് വലിയ വാര്‍ത്തയായിരുന്നു. പുലര്‍ച്ചെ 3 മണിയോടെ വീട്ടില്‍ കയറിയ ഇവരെ തൊട്ടടുത്ത ദിവസം 10.30നാണ് സുരക്ഷ ഉദ്യോഗസ്ഥര്‍ പിടികൂടിയത്. ഷാരൂഖ് ഖാനെ കാണാന്‍ വേണ്ടിയായിരുന്നു ആരാധകര്‍ ഈ കടും കൈ ചെയ്തത്.
ആരാധകര്‍ അതിക്രമിച്ച് കയറിയ സംഭവത്തില്‍ മന്നത്തിലെ സുരക്ഷക്രമീകരണം പുനഃപരിശോധിക്കണമെന്ന് ഷാരൂഖ് ഖാനോട് മുംബൈ പൊലീസ് ആവശ്യപ്പെട്ടു എന്ന വാര്‍ത്തയാണ് ഇപ്പോള്‍ പുറത്തു വരുന്നത്.
നടന്റെ സുരക്ഷയെ കരുതിയാണ് ഇത് എന്നും വസതിയില്‍ മോഷണമോ മറ്റു അസ്വഭാവികമായതെന്തെങ്കിലും നടന്നിട്ടുണ്ടോയെന്നും അറിയാന്‍ വേണ്ടിയാണ് ഇക്കാര്യം ആവശ്യപ്പെടുന്നതെന്നും ആണ് അടുത്ത വൃത്തങ്ങളില്‍ നിന്നും അറിയാന്‍ സാധിക്കുന്നത്.
മാര്‍ച്ച് 2നാണ് ഗുജറാത്ത് സ്വദേശികളായ സാഹില്‍ സലിം ഖാന്‍, രാം സരഫ് കുശ്വാഹ എന്നിവരെ സുരക്ഷ ഉദ്യോഗസ്ഥര്‍ പിടികൂടി പൊലീസില്‍ ഏല്‍പ്പിച്ചത്. ഹൗസ് കീപ്പിങ്ങിലെ ജീവനക്കാരനായ സതീഷാണ് അതിക്രമിച്ച് കയറിയവരെ കണ്ടത്.
മതില്‍ ചാടികടന്നെത്തിയ പ്രതികള്‍ മന്നത്തിന്റെ മൂന്നാം നിലയിലെ മേക്കപ്പ് റൂമിനുള്ളില്‍ ഒളിച്ചിരിക്കുകയായിരുന്നു. അവരെ കണ്ടപ്പോള്‍ ഷാരൂഖ് ഞെട്ടിപ്പോയെന്നും പൊലീസ് പറയുന്നു. ഭവനഭേദനത്തിനടക്കം ഇവര്‍ക്കെതിരെ പൊലീസ് കേസെടുത്തിട്ടുണ്ട്. സംഭവത്തില്‍ അന്വേഷണം ഇപ്പോഴും തുടരുകയാണ്.