സിനിമയിലും സീരിയലുകളിലുമൊക്കെയായി സജീവമായ താരമാണ് സരയു മോഹന്‍. ചക്കരമുത്ത് എന്ന ചിത്രത്തിലൂടെയായാണ് സരയു പ്രേക്ഷകര്‍ക്ക് പ്രിയങ്കരിയായി മാറിയത്.
പിറന്നാള്‍ ദിനത്തില്‍ പ്രിയതമന് ആശംസ നേര്‍ന്നിരിക്കുകയാണ് സരയു മോഹന്‍. സനലിന്റെ ചിത്രങ്ങളും താരം പോസ്റ്റ് ചെയ്തിരുന്നു. സിനിമയെന്ന വലിയ സ്വപ്‌നം സാക്ഷാത്ക്കരിച്ചതിന് ശേഷമുള്ള പിറന്നാള്‍ കൂടിയാണ് ഇത്തവണത്തേത്. കുഞ്ഞമ്മീണീസ് ഹോസ്പിറ്റലിലൂടെ സംവിധായകനായി അരങ്ങേറിയിരിക്കുകയാണ് സനല്‍. ഇന്ദ്രജിത്ത്, നൈല ഉഷ, സരയു മോഹന്‍ തുടങ്ങിയവരാണ് ചിത്രത്തിലെ പ്രധാന കഥാപാത്രങ്ങള്‍.
ഒരു കുഞ്ഞു പയ്യൻ ആയിരുന്നു. വാ തോരാതെ വർത്തമാനം പറയുന്ന ഒരു പാലക്കാടുകാരൻ. എന്ത് പറഞ്ഞാലും സിനിമയിൽ എത്തി നിൽക്കുന്ന ഒരു ജാതി ചെക്കൻ. ആർത്തിയോടെ സിനിമകളിൽ അസ്സിസ്റ്റ്‌ ചെയ്തിരുന്ന ചെറുപ്പക്കാരൻ. എന്തോരം കഥകളാ പറഞ്ഞേ, എത്ര വട്ടാ ദാ ഇപ്പോ സിനിമ ചെയ്യ്യുംന്ന് കരുതിയേ. ചില നേരം എത്ര ക്രൂരമായാണ് നിന്റെ കണ്ണിലെ നനവ് ഞാൻ കണ്ടില്ലെന്ന് നടിച്ചേ. നിന്നെക്കാൾ നോവുന്നുണ്ടായിരുന്നു എനിക്ക്.
നീറിനീറി അവസാനം ഒരു നാൾ നീ കണ്ട സ്വപ്നത്തിന് ചിറക് മുളച്ചു. ചിറക് വിരിഞ്ഞാൽ ഇനി പറക്കുക അങ്ങ്. വലിയ ആകാശങ്ങൾ താണ്ടുക. ആ മെല്ലിച്ച പയ്യൻ മുതൽ ഇന്നീ താടിക്കാരൻ വരെ വർഷങ്ങൾ അത്രയും നീ പറഞ്ഞ കഥകൾ നിറയട്ടെ വെള്ളിത്തിരയിൽ. എന്നെന്നും സന്തോഷം നിറയട്ടെ നിന്നിൽ. കുഞ്ഞമ്മിണീസ് ഹോസ്പിറ്റൽ സിനിമയുടെ സംവിധായകൻ സനൽ വി ദേവന്, എന്റെ സച്ചുവിന് ജന്മദിനാശംസകൾ എന്നുമായിരുന്നു സരയു കുറിച്ചത്.
പുണ്യാളന്‍ അഗര്‍ബത്തീസ് സിനിമയുടെ ആഘോഷപരിപാടികള്‍ക്കിടയിലാണ് സരയു സനലിനെ പരിചയപ്പെടുന്നത്. അസിസ്റ്റന്റ് ഡയറക്ടര്‍ സനല്‍ എന്ന് പറഞ്ഞ് രചന ചേച്ചിയായിരുന്നു അദ്ദേഹത്തെ പരിചയപ്പെടുത്തിയത്. പിന്നീട് തന്റെ ഷോര്‍ട്ട് ഫിലിമിനായി സനല്‍ സരയുവിനെ വിളിച്ചിരുന്നു. ഒന്നിച്ച് ജോലി ചെയ്യവെ ഇരുവരും അടുത്ത സുഹൃത്തുക്കളായി മാറുകയായിരുന്നു. വൈകാതെ ആ ബന്ധം പ്രണയമായി, പിന്നീട് ഇരുവരും വിവാഹിതരാവുകയായിരുന്നു.