സിനിമയില്‍ എത്തുന്നതിന് മുന്‍പ് തന്നെ നിറയെ ആരാധകരെ സ്വന്തമാക്കിയ താരമാണ് പ്രണവ് മോഹന്‍ലാല്‍. തുടക്കത്തില്‍ താരപുത്രന്‍ എന്ന ലേബലിലാണ് പ്രണവ് അറിയപ്പെട്ടതെങ്കിലും പിന്നീട് സ്വന്തം വ്യക്തിത്വത്തിലൂടെ പ്രേക്ഷകരുടെ ഇടയില്‍ ശ്രദ്ധിക്കപ്പെടുകയായിരുന്നു. വളരെ സിമ്പിള്‍ ആയ ജീവിത ശൈലിയാണ് പ്രണവ് പിന്തുടരുന്നത്.
മാത്രമല്ല, യാത്രകളെ ഏറെ ഇഷ്ടപ്പെടുന്ന, അച്ഛന്റെ പണത്തിലും പ്രതാപത്തിലും ജീവിക്കാത്ത തന്റെ സന്തോഷങ്ങളെ മുറുകെ പിടിച്ച് സിനിമയെക്കാളുപരി യാത്രകളെ പ്രണയിച്ച യുവതാരമാണ് പ്രണവ് മോഹന്‍ലാല്‍. ഇന്ന് സിനിമയില്‍ ഉള്ളതിനേക്കാള്‍ പ്രണവിന്റെ യഥാര്‍ത്ഥ ജീവിതത്തെ ആരാധനയോടെ നോക്കി കാണുന്നവരാണ് പല യുവാക്കളും. പ്രണവിന്റെ ജീവിതരീതിയാണ് ആളുകളെ പ്രണവിന്റെ ആരാധകരാക്കിയത്.
യാത്രയും സാഹസികതയും ഒപ്പം ഇത്തിരി സംഗീതവും ചേര്‍ന്നതാണ് പ്രണവ് എന്ന നടന്‍.വീഴ്ചകളില്‍ തളരാതെ വീണ്ടും തന്റെ ശ്രമങ്ങള്‍ തുടരാനാണ് പ്രണവിന്റെ ഇഷ്ടം. വളരെ അപൂര്‍വമായി മാത്രം നാട്ടിലെത്താറുള്ള താരത്തിന്റേതായി പുറത്തുവരുന്ന വീഡിയോകളും ചിത്രങ്ങളും ഞൊടിയിട കൊണ്ടാണ് സമൂഹമാധ്യമങ്ങളില്‍ ശ്രദ്ധപിടിച്ചു പറ്റാറുള്ളത്.
താരത്തിന്റെ പുതിയ വീഡിയോ സോഷ്യല്‍ മീഡിയയില്‍ വൈറലാവുകയാണ്. വീഴ്ചകളില്‍ തളരാതെ വീണ്ടും ശ്രമങ്ങള്‍ തുടരുന്ന വീഡിയോ ആണ് പ്രണവ് പങ്കുവച്ചിരിക്കുന്നത്. ഇന്‍സ്റ്റഗ്രാമില്‍ ചെറിയൊരു അടിക്കുറിപ്പോടു കൂടിയാണ് താരം തന്റെ റീല്‍സ് ആരാധകര്‍ക്കായി പുറത്തുവിട്ടത്. റോക്ക് ക്ലൈമ്പിങ്ങും സ്‌കേറ്റിറ്റും അടക്കമുള്ള തന്റെ പ്രിയ സാഹസിക വിനോദങ്ങള്‍ ചേര്‍ത്തുള്ള ഒരു റീല്‍ വീഡിയോ ആണിത്.
വിജയത്തിലേക്ക് എത്തും മുമ്പേ വീണു പോകുന്ന പരാജിത ശ്രമങ്ങളാണ് വീഡിയോയില്‍ കാണാനാവുക. അത്ര പെര്‍ഫക്ട് അല്ലാത്ത നിമിഷങ്ങള്‍ എന്നാണ് പ്രണവ് തന്റെ പുതിയ റീല്‍സിന് അടിക്കുറിപ്പ് നല്‍കിയിരിക്കുന്നത്. ‘ഇന്‍സ്റ്റഗ്രാമില്‍ കൂടുതലും കാണുന്നത് ഏറ്റവും പെര്‍ഫെക്ട് ആയ നിമിഷങ്ങളാണ്. എന്നാല്‍ ഇത് പെര്‍ഫെക്ട് അല്ലാത്ത നിമിഷങ്ങളുടേതാണ്’ എന്ന് പ്രണവ് മോഹന്‍ലാല്‍ കുറിച്ചു. താരത്തിന് കാര്യമായ പരിക്കുകളൊന്നും സംഭവിച്ചിട്ടില്ല. അടുത്തിടെയാണ് ഇന്‍സ്റ്റഗ്രാമില്‍ തന്റെ ആദ്യ റീല്‍സ് വീഡിയോ പ്രണവ് പങ്കുവച്ചത്.
അടുത്തിടെ നീണ്ട സഞ്ചാരത്തിനിടെ വഴിയരികിലുള്ള ബഞ്ചില്‍ വിശ്രമിക്കുന്ന നടന്റെ ചിത്രങ്ങള്‍ സോഷ്യല്‍ മീഡിയയില്‍ വൈറലായിരുന്നു. താരം സ്‌പെയിനില്‍ ആണെന്നാണ് ആരാധകരുടെ കണ്ടെത്തല്‍. അപ്പു എവിടെയാണെന്നാണ് ആരാധകര്‍ക്ക് അറിയേണ്ടത്. അതുതന്നെയാണ് നടന്റെ ഫോട്ടോയ്ക്ക് താഴെ അവര്‍ കുറിക്കുന്നതും.
പ്രണവ് മോഹന്‍ലാല്‍ യൂറോപ്പ് യാത്രയില്‍ ആണെന്ന് വിനീത് ശ്രീനിവാസന്‍ നേരത്തെ പറഞ്ഞിരുന്നു. ഒരു രാജ്യത്തില്‍ നിന്ന് മറ്റൊരു രാജ്യത്തേക്ക് 800 മൈലോളം കാല്‍നടയായി സഞ്ചരിച്ചാണ് നടന്റെ യാത്രയെന്നും വിനീത് ഒരു അഭിമുഖത്തിനിടെ പറഞ്ഞിരുന്നു. അടുത്തവര്‍ഷം മുതല്‍ സിനിമയില്‍ ശ്രദ്ധ കേന്ദ്രീകരിക്കാനാണ് പ്രണവിന്റെ തീരുമാനമെന്ന് വിശാഖ് സുബ്രഹ്മണ്യവും പറഞ്ഞിരുന്നു.
അയാള്‍ കഥ എഴുതുകയാണ് എന്ന സൂപ്പര്‍ഹിറ്റ് ചിത്രത്തില്‍ മോഹന്‍ലാല്‍ പറയുന്ന ഒരു ഡയലോഗ് അടുത്തിടെ വലിയ രീതിയില്‍ പ്രചരിച്ചിരുന്നു. ‘ലൈഫ് ഈസ് നത്തിംഗ്, ബട്ട് എ സെലിബ്രേഷന്‍ ഓഫ് ഇവന്റ്‌സ്. നമുക്ക് കിട്ടിയ ഈ ജീവിതം പരിപൂര്‍ണമായി ആഘോഷിക്കുക..’ എന്ന് തുടങ്ങുന്ന മോഹന്‍ലാലിന്റെ ഡയലോഗ് ഇപ്പോള്‍ ജീവിതത്തില്‍ അന്വര്‍ത്ഥമാക്കിയിരിക്കുകയാണ് പ്രണവ്.
ജീത്തു ജോസഫ് സംവിധാനം ചെയ്ത ആദി എന്ന ചിത്രത്തിലൂടെയാണ് പ്രണവ് മലയാള സിനിമ രംഗത്തെത്തുന്നത്. ചിത്രത്തിലെ മികച്ച സംഘട്ടന രംഗങ്ങള്‍ കൈകാര്യം ചെയ്തതിന് താരത്തിന് പ്രേക്ഷക പ്രശംസയും ലഭിച്ചിരുന്നു. പ്രണവിന്റെ കരിയറില്‍ ഏറ്റവും ശ്രദ്ധേയമായ ചിത്രം വിനീത് ശ്രീനിവാസന്‍ സംവിധാനം ചെയ്ത ഹൃദയം എന്ന ചിത്രമായിരുന്നു. പ്രണവിന്റെ ആദ്യ 50 കോടി ചിത്രം കൂടിയായിരുന്നു ഹൃദയം.
ചിത്രത്തില്‍ ദര്‍ശനയും കല്യാണിയുമായിരുന്നു നായികമാര്‍. ജേക്കബിന്റെ സ്വര്‍ഗ്ഗരാജ്യം പുറത്തിറങ്ങി ആറ് വര്‍ഷത്തിനിപ്പുറമാണ് വിനീത് ശ്രീനിവാസന്റെ സംവിധാനത്തില്‍ മറ്റൊരു ചിത്രം പുറത്തെത്തുന്നത്. പ്രണവ് നായകനാവുന്ന മൂന്നാമത്തെ ചിത്രവുമായിരുന്നു ഇത്. കൊവിഡ് മൂന്നാം തരംഗത്തിന്റെ പശ്ചാത്തലത്തില്‍ പല പ്രധാന റിലീസുകളും മാറ്റിയപ്പോള്‍ പ്രഖ്യാപിച്ച റിലീസ് തീയതിയില്‍ തന്നെ ചിത്രം തിയേറ്ററുകളില്‍ എത്തിക്കാനായിരുന്നു നിര്‍മ്മാതാവ് വിശാഖ് സുബ്രഹ്മണ്യത്തിന്റെ തീരുമാനം. അതേസമയം, നടന്റെ അടുത്ത സിനിമകളുടെ ജോലികള്‍ 2023 തുടക്കത്തില്‍ തന്നെ ആരംഭിക്കുമെന്നാണ് വിവരം.