നിരവധി ആരാധകരുള്ള താരമാണ് നാഗചൈതന്യ. ഇപ്പോഴിതാ നാഗചൈതന്യയുടെ സിനിമ കണ്ടതോടെ തനിക്ക് സംസാരശേഷി തിരിച്ച് കിട്ടിയെന്ന് പറയുകയാണ് പൊലീസുകാരന്‍. 2013ല്‍ പുറത്തിറങ്ങിയ ‘തഡാഖ’ സിനിമയെ കുറിച്ചാണ് പൊലീസുകാരന്‍ നാഗചൈതന്യയോട് സംസാരിച്ചത്.
റിലീസിന് ഒരുങ്ങുന്ന പുതിയ ചിത്രം ‘കസ്റ്റഡി’യുടെ പ്രമോഷന്‍ തിരക്കുകളിലാണ് നാഗചൈതന്യ. ചിത്രത്തിന്റെ പ്രമോഷന്റെ ഭാഗമായി ഹൈദരാബാദില്‍ എത്തിയപ്പോഴാണ് നാഗചൈതന്യ പൊലീസ് കോണ്‍സ്റ്റബിള്‍മാരുമായി സംസാരിച്ചത്.
‘എനിക്ക് തഡാഖ എന്ന സിനിമ ഒരുപാടിഷ്ടമാണ്. ആ സിനിമയില്‍ സുനില്‍ എന്ന കഥാപാത്രം പൊലീസ് ഓഫീസറാണ്. ചിത്രത്തിലെ വില്ലന്മാര്‍ അയാളെ മര്‍ദിക്കുന്നു. അതിന് ശേഷം അയാള്‍ ഭയരഹിതനാകുന്നു. സിനിമയിലെ ആ ഭാഗം എനിക്ക് വളരെ ഇഷ്ടമാണ്.
ഒരു വര്‍ഷം മുമ്പ് ബൈക്ക് അപകടത്തില്‍ പെട്ട് തലച്ചോറില്‍ രക്തം കട്ടപിടിച്ച് എനിക്ക് സംസാരശേഷി നഷ്ടപ്പെട്ടിരുന്നു. ആ സിനിമ എനിക്ക് പ്രചോദനമായി.’
‘എനിക്ക് ഇപ്പോള്‍ കുറച്ച് സംസാരിക്കാന്‍ കഴിയും. നിങ്ങള്‍ കാരണം മാത്രമാണ് ഇന്ന് എന്റെ ആരോഗ്യം മെച്ചപ്പെട്ടത്’ എന്നാണ് പൊലീസ് കോണ്‍സ്റ്റബിള്‍ പറഞ്ഞത്. മെയ് 12ന് കസ്റ്റഡി സിനിമ റിലീസ് ചെയ്യുന്നത്.
വെങ്കട് പ്രഭുവാണ് സംവിധാനം. കീര്‍ത്തി ഷെട്ടി, അരവിന്ദ് സ്വാമി, പ്രിയാമണി, ശരത് കുമാര്‍, സമ്പത്ത് രാജ്, പ്രേംജി അമരന്‍, വെണ്ണല കിഷോര്‍, പ്രേമി വിശ്വനാഥ് എന്നിവരും ചിത്രത്തിലുണ്ട്. തമിഴ്, ഹിന്ദി, കന്നഡ ഭാഷകളിലും ചിത്രം റിലീസ് ചെയ്യും.