മഹാകവി കുമാരനാശാൻ്റെ ജീവിത കഥ സിനിമയാകുന്നു. കവി എന്ന് പേരിട്ടിരിക്കുന്ന ചിത്രം സംവിധാനം ചെയ്യുന്നത് കെ.പി.കുമാരനാണ്. കുമാരനാശാനായി ചിത്രത്തിൽ വേഷമിടുന്നത് പ്രമുഖ സംഗീത സംവിധായകൻ ശ്രീവത്സൻ ജെ മേനോൻ ആണ് . ലാപ്ടോപ്പ്, ലണ്ടൺ ബ്രിഡ്ജ്, ഒറ്റാൽ, സോപാനം, അനാർക്കലി,ലോഹം എന്നീ ചിത്രങ്ങളിലെ സംഗീത സാന്ദ്രമായ ഗാനങ്ങൾ അണിയിച്ചൊരുക്കി മലയാളി പ്രേക്ഷകരുടെ മനസ്സിൽ ഇടം നേടിയ ആളാണ് ശ്രീവത്സൻ ജെ മേനോൻ. പ്രശസ്ത കർണാടക സംഗീതജ്ഞൻ കൂടിയായ അദ്ദേഹം ആദ്യമായി അഭിനയിക്കുന്ന ചിത്രമാണിത്.
കെ.ജി.ജയനാണ് ചിത്രത്തിന് വേണ്ടി ക്യാമറ ചലിപ്പിക്കുന്നത്. കുമാരനാശാൻ ദി ഫസ്റ്റ് മോഡേൺ പൊളിറ്റീഷൻ ഓഫ് കേരള എന്ന ടാഗ് ലൈനോടെ ആണ് ചിത്രം അണിയറയിൽ ഒരുങ്ങുന്നത്. ;ചിത്രീകരണവും ഇതിനോടകം ആരംഭിച്ചു കഴിഞ്ഞു. എൻ.എസ്.മാധവനാണ് സിനിമയുടെ സ്വിച്ച് ഓൺ കർമ്മം നിർവഹിച്ചത്. പഴയ കേരളം റീക്രിയേറ്റ് ചെയ്യുക എന്ന വെല്ലുവിളിയാണ് ചിത്രം നേരിടാൻ പോകുന്നത്.ജീവിതത്തിൽ ഏറെ വെല്ലുവിളികൾ നേരിട്ട മഹാകവിയെ ഇന്ന് പലർക്കും ഓർമയില്ല എന്നതാണ് വസ്തുത.
അദ്ദേഹത്തിൻ്റെ ജീവിതവും കവിതകളും മലയാള സിനിമ പോലും വേണ്ട വിധത്തിൽ ഉപയോഗിച്ചിട്ടില്ല. കുമാരനാശാൻ്റെ ജീവിത സപര്യയിലേക്കുള്ള ഒരു തുടക്കമാവും ഈ ചിത്രമെന്ന് നിസ്സംശയം പറയാം.
Poet Kumaranashan story become movie…