വളരെ കുറച്ച് ചിത്രങ്ങളിലൂടെ തന്നെ മലയാളി പ്രേക്ഷകര്ക്കേറെ സുപരിചിതനായ സംവിധായകനാണ് ഒമര്ലുലു. സോഷ്യല് മീഡിയയില് വളരെ സജീവമായ അദ്ദേഹം തന്റെ അഭിപ്രയാങ്ങളും വിശേഷങ്ങളുമെല്ലാം തന്നെ പങ്കുവെച്ച് എത്താറുണ്ട്. ഇപ്പോഴിതാ മോഹന്ലാല് ചിത്രം മോണ്സ്റ്ററിനെ കുറിച്ച് അദ്ദേഹം പറഞ്ഞ വാക്കുകളാണ് വൈറലായി മാറുന്നത്.
‘ഇപ്പോ അടുത്ത് ഫേസ്ബുക്കില് ഫാന്സ് തള്ളി മറിക്കുന്നത് കണ്ടിട്ട് ഞാന് തിയറ്ററില് പോയി കണ്ട് ലാഗ് അടിച്ച് ചത്ത ഒരു സിനിമയേക്കാള് എത്രയോ നല്ല എന്റര്ടെയ്നര് ആണ് ലാലേട്ടന്റെ മോണ്സ്റ്റര്. ഹണി റോസും അടിപൊളി ആയിട്ടുണ്ട്’, എന്നുമാണ് ഒമര് ലുലു കുറിച്ചിരിക്കുന്നത്.
പിന്നാലെ നിരവധി പേരാണ് കമന്റുമായി എത്തിയിരിക്കുന്നത്. പലര്ക്കും ഒമര്ലുലു മറുപടിയും നല്കുന്നുണ്ട്. ഉദയകൃഷ്ണയുടെ തിരക്കഥയില് വൈശാഖ് സംവിധാനം ചെയ്ത് മോഹന്ലാല് നായകനായി എത്തിയ ചിത്രമായിരുന്നു മോണ്സ്റ്റര്. ആശിര്വാദ് സിനിമാസിന്റെ ബാനറില് ആന്റണി പെരുമ്പാവൂരാണ് നിര്മാണം.
മോഹന്ലാലിനൊപ്പം സിദ്ദിഖ്, ലക്ഷ്മി മഞ്ചു, ഹണി റോസ്, സുദേവ് നായര്, ഗണേഷ് കുമാര്, ലെന തുടങ്ങിയവര് മറ്റു പ്രധാന കഥാപാത്രങ്ങളെ അവതരിപ്പിക്കുന്നു. ഛായാഗ്രഹണം സതീഷ് കുറുപ്പ്, സംഗീത സംവിധാനം ദീപക് ദേവ്, എഡിറ്റിംഗ് ഷമീര് മുഹമ്മദ്, സംഘട്ടനം സ്റ്റണ്ട് സില്വ, പ്രൊഡക്ഷന് കണ്ട്രോളര് സിദ്ധു പനയ്ക്കല്, വസ്ത്രാലങ്കാരം സുജിത്ത് സുധാകരന്, സ്റ്റില്സ് ബെന്നറ്റ് എം വര്ഗീസ്, പ്രൊമോ സ്റ്റില്സ് അനീഷ് ഉപാസന, പബ്ലിസിറ്റി ഡിസൈന്സ് ആനന്ദ് രാജേന്ദ്രന്, ഡിജിറ്റര് പാര്ട്നര് അവനീര് ടെക്നോളജി.