മലയാളത്തിൽ റെക്കോർഡുകൾ ഭേദിച്ച് മുന്നേറിയ ചിത്രമായിരുന്നു മോഹൻലാൽ- പൃഥ്വിരാജ് കൂട്ടുകെട്ടിൽ പുറത്തിറങ്ങിയ ‘ലൂസിഫർ’. പൃഥ്വിരാജിന്റെ ആദ്യ സംവിധാന ചിത്രമായിരുന്നു ഇത്. മലയാളത്തിലെ ഏറ്റവും വലിയ ചിത്രം എന്ന ഖ്യാതിയോടെയാണ് ലൂസിഫറിന്റെ രണ്ടാം ഭാഗമായ ‘എമ്പുരാൻ’ എത്തുന്നത്.
സ്റ്റീഫൻ നെടുമ്പള്ളി ആരായിരുന്നെന്നും എങ്ങനെയാണ് സ്റ്റീഫൻ അബ്രാം ഖുറേഷി ആയതെന്നുമാണ് എമ്പുരാൻ പ്രധാനമായും പ്രമേയമാക്കുന്നതെന്നാണ് പുറത്ത് വരുന്ന വിവരങ്ങൾ. അബ്രാം ഖുറേഷിക്ക് ഇല്ലുമിനാറ്റിയുമായി എന്താണ് ബന്ധമെന്ന് എമ്പുരാനിലൂടെ വെളിവാകുമെന്നാണ് പ്രേക്ഷകർ പ്രതീക്ഷിക്കുന്നത്.
ഈ വേളയിൽ ഇല്ലുമിനാറ്റിയെ കുറിച്ച് സംസാരിക്കുകയാണ് ചിത്രത്തിന്റെ തിരക്കഥാകൃത്തും നടനുമായ മുരളി ഗോപി. ഒരു മാധ്യമത്തിന് നൽകിയ അഭിമുഖത്തിലാണ് മുരളി ഗോപി ഇതേ കുറിച്ച് പറഞ്ഞത്. അദ്ദേഹത്തിന്റെ വാക്കുകൾ ഇങ്ങനെ;
ഇല്ലുമിനാറ്റിയുടെ അർത്ഥം എന്താണെന്ന് ഇല്ലുമിനാറ്റിക്ക് പോലും അറിയില്ല. എന്താണെന്ന് പോലും ചോദിക്കാൻ പാടില്ലാത്ത അവ്യക്തമായ ഒരു ഗ്രൂപ്പാണത്. അങ്ങനെയാണ് അതിന്റെ ബേസ് രൂപപ്പെടുത്തി വെച്ചിരിക്കുന്നത്. നമ്മൾ കാണുന്ന സിസ്റ്റവും അധികാര പോളിസികളും ടി.വിയിൽ കാണുന്ന വലിയ വാർത്തകൾ മുതൽ ചെറിയ ന്യൂസുകൾ വരെയുള്ള കാര്യം ഡിസൈൻ ചെയ്യുന്നവരാണ് അവർ.
നമ്മൾ കാണുന്ന പരസ്യത്തിന്റെ ഡിസൈൻ, അജണ്ട സെറ്റിങ് എന്നീ കാര്യങ്ങളിൽ പോലും അവരുടെ ഇൻഫ്‌ളുവൻസ് ഉണ്ടാകുമെന്നും അത് നമ്മൾ അറിയാതെ പോകുമെന്നുമൊക്കെയാണ് ഇല്ലുമിനാറ്റിയെക്കുറിച്ചുള്ള തിയറികൾ. ഈ ആശയത്തെ ഗൈഡ് ചെയ്യുന്ന ഗ്രൂപ്പ് ഉണ്ടെന്നും പറയുന്ന ആശയമാണ് ഇല്ലുമിനാറ്റി എന്നാണ് മുരളി ഗോപി പറയുന്നത്.
അതേസമയം സമീപകാല മലയാള സിനിമയിൽ ‘ലൂസിഫർ’ എന്ന ഒരൊറ്റ ചിത്രംകൊണ്ട് മോഹൻലാൽ എന്ന നടനും പൃഥ്വിരാജ് എന്ന നവാഗത സംവിധായകനും വലിയ രീതിയിൽ ആഘോഷിക്കപ്പെട്ടിരുന്നു.
മോഹൻലാൽ എന്ന താരത്തെയും ഒരു പരിധി വരെ മോഹൻലാൽ എന്ന നടനെയും പരമാവധി ഉപയോഗപ്പെടുത്തിയ സിനിമയായിരുന്നു ലൂസിഫർ.
മഞ്ജു വാര്യർ, ടൊവിനോ തോമസ്, ഇന്ദ്രജിത്ത്, വിവേക് ഒബ്‌റോയി, സായ്കുമാർ, നന്ദു, സുരാജ് വെഞ്ഞാറമൂട്, ഷറഫുദ്ദീൻ, ഷൈൻ ടോം ചാക്കോ തുടങ്ങീ വൻ താരനിരയാണ് ചിത്രത്തിൽ അണിനിരക്കുന്നത്. ഈ വർഷം അവസാനത്തോടെ ചിത്രം തിയേറ്ററുകളിൽ എത്തുമെന്നാണ് പ്രതീക്ഷിക്കുന്നത്.
സുജിത്ത് വാസുദേവ് ആണ് ചിത്രത്തിന് ഛായാഗ്രഹണം നിർവഹിക്കുന്നത്. ദീപക് ദേവാണ് സംഗീതം. ആശിർവാദ് സിനിമാസും ലൈക പ്രൊഡക്ഷൻസും ചേർന്നാണ് എമ്പുരാൻ നിർമ്മിക്കുന്നത്. മലയാളം, തമിഴ്, തെലുങ്കു, ഹിന്ദി, കന്നഡ എന്നീ ഭാഷകളിലാണ് ചിത്രം പ്രദർശനത്തിനെത്തുന്നത്.