31 വര്‍ഷങ്ങള്‍ക്ക് ശേഷം മോഹൻലാൽ വീണ്ടും തൃശ്ശൂർക്കാരനായി എത്തുന്ന ചിത്രമായ ഇട്ടിമാണി മെയ്ഡ് ഇൻ ചൈനയിലെ ഫസ്റ്റ് ലുക്ക് പുറത്ത്. തൂവാനത്തുമ്പികള്‍ക്ക് ശേഷം മോഹൻലാൽ തൃശൂര്‍ ഭാഷ കൈകാര്യം ചെയ്യുന്ന ചിത്രമാകും ഇത്. കായംകുളം കൊച്ചുണ്ണിയിൽ മോഹൻലാലിന്‍റെ ഇത്തിക്കര പക്കിയുടെ ഫസ്റ്റ് ലുക്ക് പുറത്തുവന്നപ്പോഴുള്ളതുപോലെ ഇടം കണ്ണ് അടച്ചുപിടിച്ച് തനി അച്ചായൻ ലുക്കിലാണ് ഇട്ടിമാണിയിൽ ലാലിന്‍റെ ലുക്ക് വന്നിരിക്കുന്നത്.
നീണ്ട 31 വർഷങ്ങൾക്കു ശേഷം ഞാൻ തൃശൂർ ഭാഷയുമായി വരുന്നു. തൂവാനത്തുമ്പികളി”ലെ ജയകൃഷ്ണന് ശേഷം ‘ഇട്ടിമാണി’ എന്ന തൃശൂർക്കാരനായി ഞാൻ അഭിനയിക്കുന്ന ചിത്രമാണ് ‘ഇട്ടിമാണി മേയ്ഡ് ഇൻ ചൈന’. ആശീർവാദ് സിനിമാസിൻ്റെ ബാനറിൽ ആൻ്റണി പെരുമ്പാവൂർ നിർമ്മിക്കുന്ന ‘ഇട്ടി മാണി’ നവാഗതരായ ജിബി ജോജു തിരക്കഥയെഴുതി സംവിധാനം ചെയ്യുന്നു…” ലാൽ ഫേസ്ബുക്കിലൂടെ മുമ്പ് ഇങ്ങനെ വാര്‍ത്ത പങ്കുവെച്ചിരുന്നത് ഏറെ വൈറലായിരുന്നു.
കഴിഞ്ഞ മാസമാണ് മോഹൻലാൽ പുതിയ ചിത്രത്തിന്‍റെ ഔദ്യോഗിക പ്രഖ്യാപനം നടത്തിയത്. ഒടിയൻ, ലൂസിഫര്‍ തുടങ്ങിയ ബിഗ് ബജറ്റ് ചിത്രങ്ങള്‍ കഴിഞ്ഞതിനു ശേഷം ലാൽ നായകനാവുന്ന ചിത്രങ്ങളിൽ ഒന്നാണ് ഇട്ടിമാണി. മറ്റൊരു ചിത്രമായ മരയ്ക്കാർ- അറബിക്കടലിന്റെ സിംഹം ഷൂട്ടിംഗ് നടന്നുകൊണ്ടിരിക്കുകയാണ്.
Mohanlal new movie Ittimani first look…