നടി അപര്ണ ബാലമുരളിയോട് മോശമായി പെരുമാറിയ വിദ്യാര്ഥിയ്ക്ക് കാരണം കാണിക്കല് നോട്ടീസ് നല്കി എറണാകുളം ലോ കോളജ് പ്രിന്സിപ്പല്. ഇന്ന് തന്നെ ഇതിന് മറുപടി നല്കണമെന്നും ആവശ്യപ്പെട്ടിട്ടുണ്ട്. മറുപടി തൃപ്തികരമല്ലെങ്കില് നടപടിയെടുക്കുമെന്നും പ്രിന്സിപ്പല് അറിയിച്ചു.
ലോ കോളേജ് വിദ്യാര്ഥിയില് നിന്ന് മോശം പെരുമാറ്റം അനുഭവപ്പെട്ടത് വേദനിപ്പിച്ചതായും സംഘാടകരോടു പരിഭവമില്ലെന്നും സംഭവം നടന്ന ഉടനെയും പിന്നീടും അവര് ഖേദം അറിയിച്ചതായും അപര്ണ പറഞ്ഞു.
തങ്കം എന്ന പുതിയ ചിത്രത്തിന്റെ പ്രൊമോഷനുമായി ബന്ധപ്പെട്ട് എറണാകുളം ലോ കോളേജില് എത്തിയപ്പോഴാണ് നടിയോട് യുവാവിന്റെ മോശം പെരുമാറ്റമുണ്ടായത്.
നടിയെ സ്വീകരിക്കുന്നതിന്റെ ഭാഗമായി വേദിയിലെത്തിയ വിദ്യാര്ത്ഥി അവരുടെ തോളില് കൈയ്യിടാന് ശ്രമിക്കുന്നതും അപര്ണ ഒഴിഞ്ഞു മാറാന് ശ്രമിക്കുന്നതും പുറത്തുവന്ന വീഡിയോയില് കാണാം. അപര്ണയോടു വിദ്യാര്ഥി മോശമായി പെരുമാറിയതില് ലോ കോളജ് യൂണിയന് ഖേദം പ്രകടിപ്പിച്ച് രംഗത്തെത്തിയിരുന്നു.