വളരെ കുറച്ച് ചിത്രങ്ങളിലൂടെ തന്നെ മലയാളി പ്രേക്ഷകര്‍ക്ക് പ്രിയപ്പെട്ട നടനായി മാറിയ താരമാണ് അജ്മല്‍ അമീര്‍. ഇപ്പോഴിതാ നെട്രികണ്‍ സിനിമയില്‍ അഭിനയിക്കാന്‍ ഉണ്ടായ കാരണത്തെ കുറിച്ച് പറഞ്ഞ് രംഗത്തെത്തിയിരിക്കുകയാണ് നടന്‍. സംവിധായകന്റെയും പ്രൊഡ്യൂസറുടെയും ഇടപെടലുകളെ കുറിച്ചും ഒരു മാധ്യമത്തിന് നല്‍കിയ അഭിമുഖത്തില്‍ അജ്മല്‍ പറഞ്ഞു.
മിലിന്ദ് റാവു കഥ പറഞ്ഞപ്പോള്‍ ആദ്യം നോ പറഞ്ഞെങ്കിലും പിന്നീട് സിനിമയുടെ ടീമിനെ കുറിച്ച് അറിഞ്ഞപ്പോള്‍ അഭിനയിക്കാന്‍ തയ്യാറാവുക ആയിരുന്നുവെന്നാണ് അജ്മല്‍ പറയുന്നത്. നെട്രികണ്ണില്‍ സൈക്കോ വില്ലന്‍ കഥാപാത്രമായാണ് അജ്മല്‍ വേഷമിട്ടത്.
സ്ത്രീകളെ ക്രൂരമായി പീഡിപ്പിച്ച് കൊല്ലുന്ന സൈക്കോ വില്ലന്‍ കഥാപാത്രത്തെ നേരിടുന്ന ദുര്‍ഗ എന്ന കഥാപാത്രമായാണ് നയന്‍താര ചിത്രത്തിലെത്തുന്നത്. മിലിന്ദ് റാവു സംവിധാനവും വിഘ്‌നേഷ് ശിവന്‍ നിര്‍മാണവും നിര്‍വഹിച്ചിരിക്കുന്ന ചിത്രം തനിക്ക് വലിയ അനുഭവമായിരുന്നുവെന്നും അജ്മല്‍ പറയുന്നു.
ഫിലിം മേക്കിംഗില്‍ തന്റേതായ ഒരു ക്ലാസ് ഉണ്ട് മിലിന്ദിന്. വിഘ്‌നേഷ് ശിവനാണെങ്കില്‍ എല്ലാം നിരീക്ഷിച്ച് കൊണ്ടിരിക്കും. എന്നിട്ട് സീനുകളില്‍ മാസ് എലമെന്റ്‌സ് ചേര്‍ക്കും. ഈ ക്ലാസും മാസും ചേരുന്നത് സിനിമയ്ക്ക് ഗുണകരമാവും. കുറേയധികം സീനുകള്‍ അത്തരത്തില്‍ മികച്ചതായിട്ടുണ്ട് എന്നും അജ്മല്‍ പറഞ്ഞു.