ഹോളിവുഡ് നടിയായ ജൊഡി ടര്‍ണറിന്റെ ആഭരണം മോഷണം പോയി. കാന്‍ ഫിലിം ഫെസ്റ്റിവലിനിടെയായിരുന്നു സംഭവം. ഫെസ്റ്റിവലിലെ റെഡ് കാര്‍പറ്റിലണിഞ്ഞ സ്വര്‍ണാഭരണങ്ങളാണ് മോഷണം പോയത്. തന്റെ പുതിയ സിനിമയായ ആഫ്റ്റര്‍ യാങ്കോണ്‍ എന്ന സിനിമയുടെ പ്രദര്‍ശനവുമായി ബന്ധപ്പെട്ടാണ് നടി കാന്‍ ഫിലിം ഫെസ്റ്റിവലിനെത്തിയത്.
ഹോട്ടലില്‍ വെച്ച് ഒരു വയസ്സുള്ള മകള്‍ക്ക് ഭക്ഷണം കൊടുക്കവെയാണ് മോഷണം നടന്നത് എന്നാണ് കരുതുന്നത്. ഷോയ്ക്ക് ശേഷം നടി തന്നെയാണ് ട്വിറ്ററിലൂടെ ഇക്കാര്യം അറിയിച്ചത്.
‘ കാനിലെ എന്റെ അവസാന ദിവസം രണ്ടര മണിക്കൂര്‍ പൊലീസ് സ്റ്റേഷനില്‍ ചെലവഴിക്കേണ്ടി വരുമെന്ന് ഞാന്‍ കരുതിയില്ല, പക്ഷെ ഇവിടെയാണ് നമ്മള്‍,’ നടി ട്വീറ്റ് ചെയ്തു. സംഭവത്തില്‍ അന്വേഷണം നടക്കുന്നുണ്ടെന്നാണ് പൊലീസ് അറിയിച്ചത്.
കാന്‍ ഫിലിം ഫെസ്റ്റിവലിനോളം പ്രശസ്തമാണ് മേളയ്ക്കിടെ നടക്കുന്ന വമ്പന്‍ മോഷണങ്ങളും. 2013 ല്‍ കാര്‍ട്ലെന്‍ ഹോട്ടലില്‍ വെച്ച് 103 മില്യണ്‍ യൂറോസിന്റെ രത്നങ്ങളാണ് കവര്‍ച്ച ചെയ്യപ്പെട്ടത്. കുപ്രസിദ്ധ മോഷണ ഗ്യാങായ പിങ് പാന്തേര്‍സ് ആണ് ഈ മോഷണത്തിന് പിന്നിലെന്നാണ് അന്നുയര്‍ന്ന അഭ്യൂഹങ്ങള്‍.
അതേവര്‍ഷം തന്നെ 1.6 മില്യണ്‍ യൂറോ വരുന്ന നെക്സലേസും മോഷണം പോയി. സമാനമായി 2015 ലും 17.5 മില്യണ്‍ യൂറോ വില വരുന്ന ആഭരണങ്ങള്‍ മോഷ്ടിക്കപ്പെട്ടു. സിനിമാ പ്രദര്‍ശനത്തേക്കാളും ഖ്യാതി നേടുന്ന കാനിലെ റെഡ്കാര്‍പറ്റില്‍ സെലിബ്രിറ്റികള്‍ക്ക് അണിയാന്‍ ആഭരണങ്ങളും വസ്ത്രങ്ങളും വമ്പന്‍ ബ്രാന്‍ഡുകള്‍ സ്പോണ്‍സര്‍ ചെയ്യാറുണ്ട്. ഇവയാണ് മോഷ്ടാക്കള്‍ ലക്ഷ്യം വെക്കുന്നത്.