മിനിസ്‌ക്രീനിലൂടെ മലയാളികള്‍ക്ക് സുപരിചിതയാണ് പ്രീത പ്രദീപ്. ‘മൂന്നുമണി’ എന്ന പരമ്പരയിലെ ‘മതികല’ എന്ന കഥാപാത്രമാണ് പ്രീതയ്ക്ക് വലിയ പ്രേക്ഷക സ്വീകാര്യത നേടിക്കൊടുത്തത്. ‘ഉയരെ’ അടക്കമുള്ള സിനിമകളിലും പ്രീത ശ്രദ്ധേയമായ വേഷങ്ങള്‍ കൈകാര്യം ചെയ്തിട്ടുണ്ട്. പാര്‍വതിയുടെ ചേച്ചിയായെത്തിയത് പ്രീതയായിരുന്നു.
നീണ്ട നാളത്തെ പ്രണയത്തിനു ശേഷമാണ് താരം വിവാഹിതയായത്. വിവേകാണ് പ്രീതയുടെ ജീവിതപങ്കാളി. ഇപ്പോഴിതാ മനോഹരമായ അമ്മ-മകള്‍ തീം ഫോട്ടോഷൂട്ടുമായി എത്തിയിരിക്കുകയാണ് താരം. സോഷ്യല്‍ മീഡിയയില്‍ സജീവമായ പ്രീത പങ്കുവയ്ക്കാറുള്ള ഫോട്ടോഷൂട്ടുകളും വിശേഷങ്ങളുമെല്ലാം ആരാധകര്‍ ഏറ്റെടുക്കാറുണ്ട്.
മോം ഡോട്ടര്‍ കളക്ഷന്‍സ് എന്ന കുറിപ്പോടെയാണ് പ്രീത പുതിയ ചിത്രങ്ങള്‍ പങ്കുവച്ചിരിക്കുന്നത്. അടുത്തിടെ വിവാഹം കഴിഞ്ഞ പ്രീതയ്ക്കെങ്ങനെയാണ് ഇത്ര വലിയ മകളെന്നാണ് ചിത്രങ്ങള്‍ കണ്ട് മിക്ക ആളുകളുടേയും സംശയം.
എന്നാല്‍, ഡിസൈനറായ ജാഫറിന്റെ മകള്‍ മഹര്‍ ജാഫറാണ് പ്രീതയ്‌ക്കൊപ്പമുള്ളത്. മനോഹരമായ ലെഹങ്കയിലാണ് പ്രീതയും മഹറും ചിത്രത്തില്‍. ഫോട്ടോഷൂട്ടിന്റെ ഭാഗമായുള്ള വിഡിയോയും പങ്കുവച്ചിട്ടുണ്ട്. ഫ്ളവേഴ്സ് ചാനലിലെ സ്റ്റാര്‍ മാജിക്കിലും പ്രീത സജീവ സാന്നിധ്യമാണ്. അഭിനേത്രി എന്നതിനും അപ്പുറത്ത് മികച്ചൊരു നര്‍ത്തകി കൂടിയാണ് പ്രീത.