രാജ്യത്തെ ഏറ്റവും പ്രായം കുറഞ്ഞ മേയര് ആര്യ രാജേന്ദ്രന് അഭിനന്ദനങ്ങളുമായി മോഹന്ലാല്. ആര്യയെ ഫോണില് വിളിച്ചാണ് മോഹന്ലാല് അഭിനന്ദനം അറിയിച്ചത്. ‘എല്ലാവര്ക്കും ഇഷ്ടപ്പെട്ട നഗരമാണ് തിരുവനന്തപുരം. അതിനെ മനോഹരമായ രീതിയില് കൊണ്ടുപോവാന് ആര്യയ്ക്ക് കഴിയട്ടെ. എല്ലാവിധ പിന്തുണയും ഉണ്ടാകും’ എന്നാണ് മോഹന്ലാല് ആശംസിച്ചത്. ലാലേട്ടന്റെ വീടിന്റെ അടുത്താണ് തന്റെ വീടെന്നും കാണാമെന്നും ആര്യ മറുപടിയും നല്കി.
ആള് സെയിന്റ്സ് കോളേജിലെ ബി.എസ്.സി മാത്സ് വിദ്യാര്ത്ഥിയായ ആര്യ എസ്.എഫ്.ഐ സംസ്ഥാന കമ്മിറ്റി അംഗം, സി.പി.എം കേശവദേവ് റോഡ് ബ്രാഞ്ച് കമ്മിറ്റി അംഗം, ബാലസംഘം സംസ്ഥാന പ്രസിഡന്റ് എന്നീ നിലകളില് പ്രവര്ത്തിച്ചിട്ടുണ്ട്. ജില്ലയിലെ പ്രായം കുറഞ്ഞ സ്ഥാനാര്ഥിയായിരുന്നു ആര്യ.
തിരഞ്ഞെടുപ്പ് സമയത്ത് തന്നെ മേയര് സ്ഥാനത്തെക്ക് ഉയര്ത്തിക്കാട്ടിയ ജമീല ശ്രീധരനെ മേയറാക്കുമെന്നായിരുന്നു എല്ലാവരും പ്രതീക്ഷിച്ചിരുന്നത്. എന്നാല് യുവ പ്രതിനിധി തന്നെ എത്തട്ടെ എന്ന തീരുമാനത്തിലായിരുന്നു ആര്യ രാജേന്ദ്രന് നറുക്ക് വീഴുന്നത്. 2872 വോട്ടിന് യുഡിഎഫ് സ്ഥാനാര്ത്ഥി ശ്രീകലയെ പരാജയപ്പെടുത്തിയാണ് ആര്യ വിജയിച്ചത്.