സംവിധായകന്‍ നരണിപ്പുഴ ഷാനവാസ് അന്തരിച്ചു എന്ന വാര്‍ത്തകള്‍ക്കെതിരെ നടനും നിര്‍മ്മാതാവുമായ വിജയ് ബാബു രംഗത്ത്. ‘ഷാനവാസ് ഇപ്പോഴും വെന്റിലേറ്ററിലാണ്, ഹൃദയമിടിപ്പുണ്ട്. അത്ഭുതങ്ങള്‍ സംഭവിക്കുമെന്ന് പ്രതീക്ഷിക്കാം, തെറ്റായ വിവരങ്ങള്‍ പ്രചരിപ്പിക്കാതിരിക്കൂ’ എന്നാണ് വിജയ് ബാബു ഫെയ്‌സ്ബുക്കില്‍ കുറിച്ചത്.
സിനിമയിലെ സാങ്കേതിക പ്രവര്‍ത്തകരുടെ സംഘടനയായ ഫെഫ്കയുടെ ഔദ്യോഗിക ഫെയ്‌സ്ബുക്ക് പേജിലാണ് ഷാനാവാസിന്റെ മരണവാര്‍ത്ത എത്തിയിരുന്നത്. മിനിറ്റുകള്‍ക്കകം തന്നെ ഇത് പിന്‍വലിക്കുകയും ചെയ്തിരുന്നു. ഇതോടൊണ് സംവിധായകന്‍ അന്തരിച്ചു എന്ന തരത്തിലുള്ള വാര്‍ത്തകള്‍ പ്രചരിച്ചത്. അതേസമയം, സംവിധായകന്‍ അപകടനില തരണം ചെയ്തിട്ടില്ല എന്നാണ് ലഭിക്കുന്ന റിപ്പോര്‍ട്ടുകള്‍.
ഹൃദയാഘാതത്തെ തുടര്‍ന്ന് ഞായറാഴ്ചയാണ് ഷാനവാസിനെ കോയമ്പത്തൂരിലെ കെജി ആശുപത്രിയില്‍ പ്രവേശിപ്പിക്കുന്നത്. ആശുപത്രിയിലേയ്ക്ക് കൊണ്ടുപോകുമ്പോള്‍ ബ്ലീഡിങ് ഉണ്ടായിരുന്നുവെന്നും ഒപ്പമുണ്ടായിരുന്നവര്‍ പറയുന്നു. ദിവസങ്ങള്‍ക്ക് മുമ്പ് നിര്‍മ്മാതാവ് ഷിബു ജി. സുശീലനെ വിളിച്ചിരുന്നതായും സിനിമയുടെ കഥ അവസാനഭാഗം എഴുതിക്കൊണ്ടിരിക്കുകയാണെന്നും അറിയിച്ചതായാണ് അണിയറപ്രവര്‍ത്തകര്‍ അറിയിച്ചത്.