നിരവധി ചിത്രങ്ങളിലൂടെ മലയാളികള്‍ക്ക് പ്രിയങ്കരിയായ നടിയാണ് ലിസി. സിനിമയില്‍ ഇപ്പോള്‍ സജീവമല്ലെങ്കിലും താരത്തിന്റെ വിശേഷങ്ങളെല്ലാം തന്നെ വളരെപ്പെട്ടെന്നാണ് വൈറലായി മാറുന്നത്. ഇപ്പോഴിതാ താരം പങ്കുവെച്ച പോസ്റ്റാണ് വൈറലാകുന്നത്. കഴിഞ്ഞ ദിവസം കേരള രാജ്യാന്തര ചലച്ചിത്ര മേളയുടെ ഉദ്ഘാടന വേദിയില്‍ സര്‍പ്രൈസ് അതിഥിയായി ഭാവന എത്തിയത് ഏവരും കൈയ്യടിച്ചാണ് സ്വീകരിച്ചത്.
ഉദ്ഘാടന ചടങ്ങിനായി നേരത്തെ സംഘാടക സമിതി പുറത്തിറക്കിയ അതിഥികളുടെ പട്ടികയില്‍ ഭാവനയുടെ പേരുണ്ടായിരുന്നില്ല. അവസാനം ഉദ്ഘാടന ചടങ്ങിന് തൊട്ടുമുമ്പായി മേളയിലെ വിശിഷ്ടാതിഥികളെ വേദിയിലേക്ക് ക്ഷണിക്കുന്ന കൂട്ടത്തിലാണ് ചലച്ചിത്ര അക്കാഡമി ചെയര്‍മാന്‍ രഞ്ജിത്ത് ഭാവനെയെയും വേദിയിലേക്ക് ക്ഷണിച്ചത്.
ഭാവന വേദിയിലേക്ക് എത്തിയപ്പോള്‍ കൈയ്യടിച്ച് എഴുന്നേറ്റ് നിന്നായിരുന്നു സദസ് സ്വീകരിച്ചത്. ഇപ്പോള്‍ ഇക്കാര്യത്തിലുള്ള തന്റെ സന്തോഷം ഫേസ്ബുക്കിലൂടെ പങ്കുവച്ചിരിക്കുകയാണ് നടി ലിസി.
‘ഭാവനയെ 26ാമത് ഐഎഫ്എഫ്കെയുടെ ഉദ്ഘാടന ചടങ്ങില്‍ അതിഥിയായി ക്ഷണിച്ചതിന് മുഴുവന്‍ ടീമിനും അഭിനന്ദനങ്ങള്‍. പ്രധാനമായും നിറഞ്ഞ കൈയടിയോടെ എഴുന്നേറ്റ് നിന്ന് ഭാവനയെ സ്വീകരിച്ച സദസിനോട് ബഹുമാനം തോന്നുന്നു. ഒരു മലയാളി എന്ന നിലയില്‍ അഭിമാനം തോന്നുന്ന ചുരുക്കം ചില നിമിഷങ്ങളിലൊന്നാണിത് ‘ ലിസി ഫേസ്ബുക്കില്‍ കുറിച്ചു.