മലയാളികളുടെ പ്രിയ നടനാണ് ജയറാം. അപരനിലൂടെയായാണ് താരം തുടക്കം കുറിച്ചത്. മിമിക്രിയില്‍ നിന്നും സിനിമയിലേക്കെത്തി താരമായി മാറുകയായിരുന്നു അദ്ദേഹം. ഇന്ന് തന്റെ 57ാം പിറന്നാള്‍ ആഘോഷിക്കുകയാണ് നടൻ. താരങ്ങളും ആരാധകരുമെല്ലാം ജയറാമിന് ആശംസ അറിയിച്ചെത്തിയിട്ടുണ്ട്. പാര്‍വതിയും കാളിദാസും മാളവികയുമെല്ലാം ജയറാമിനെക്കുറിച്ച് വാചാലരായെത്തിയിട്ടുണ്ട്.
ഹാപ്പി ബര്‍ത്ത് ഡേ അപ്പാ, ലോകത്തിലെ ഏറ്റവും വലിയ റോള്‍ മോഡല്‍ എനിക്കുണ്ടെന്ന് മാത്രമല്ല അപ്പ എന്റെ ബെസ്റ്റ് ഫ്രണ്ട് കൂടയാണ്. ഐ ലവ് യൂ അപ്പയെന്നുമായിരുന്നു കാളിദാസ് കുറിച്ചത്. കുടുംബസമേതമായുള്ള ചിത്രത്തിനൊപ്പമായാണ് കാളിദാസ് അപ്പയ്ക്ക് പിറന്നാളാശംസ നേര്‍ന്നത്. മന്യയും പോസ്റ്റിന് താഴെയായി ആശംസ അറിയിച്ചിട്ടുണ്ട്.
ഹാപ്പിയസ്റ്റ് ബര്‍ത്ത് ഡേ മൈ ലൈവ് എന്നായിരുന്നു പാര്‍വതി ഇന്‍സ്റ്റഗ്രാമില്‍ കുറിച്ചത്. ഹാപ്പി ബര്‍ത്ത് ഡേ അപ്പ, അപ്പ എപ്പോഴും എന്റെ ഹീറോയാണെന്നുമായിരുന്നു മാളവിക കുറിച്ചത്. നിരവധി പേരാണ് ഇവരുടെ പോസ്റ്റുകള്‍ക്ക് താഴെയായി കമന്റുകള്‍ പോസ്റ്റ് ചെയ്തിട്ടുള്ളത്.
സ്‌ക്രീനിലെ മികച്ച കെമിസ്ട്രി ജീവിതത്തിലും ആവര്‍ത്തിച്ച് മുന്നേറുന്നവരാണ് ജയറാമും പാര്‍വതിയും. തുടക്കത്തില്‍ പാര്‍വതിയുടെ വീട്ടുകാര്‍ക്ക് ഈ ബന്ധത്തില്‍ താല്‍പര്യമില്ലായിരുന്നു. ലൊക്കേഷനില്‍ വെച്ച് പാര്‍വതിയെ കാണാനോ സംസാരിക്കാനോയൊന്നും ജയറാമിന് അനുവാദമുണ്ടായിരുന്നില്ല. പ്രണയകാലത്തെ അനുഭവങ്ങളെക്കുറിച്ച് ജയറാമും പാര്‍വതിയും തുറന്നുപറഞ്ഞുള്ള അഭിമുഖം സോഷ്യല്‍ മീഡിയയിലൂടെ വൈറലായിരുന്നു. തലയണമന്ത്രത്തിന്റെ ചിത്രീകരണത്തിനിടയില്‍ വെച്ചായിരുന്നു ജയറാമും പാര്‍വതിയും പ്രണയത്തിലാണെന്ന രഹസ്യം പരസ്യമായത്. സെറ്റിലുള്ള എല്ലാവരുമായി സംസാരിക്കാറുള്ള ജയറാം പാര്‍വതിയോട് മാത്രം സംസാരിക്കാറുണ്ടായിരുന്നില്ല. അങ്ങനെയാണ് ഇരുവരും പ്രണയത്തിലാണെന്ന് ശ്രീനിവാസനും സത്യന്‍ അന്തിക്കാടും മനസ്സിലാക്കിയത്.
വിവാഹത്തോടെ അഭിനയത്തില്‍ നിന്നും ഇടവേള എടുക്കുകയായിരുന്നു പാര്‍വതി. ഭര്‍ത്താവിന്റേയും മക്കളുടേയും കാര്യങ്ങളെല്ലാം നോക്കി സന്തുഷ്ട കുടുംബ ജീവിതം നയിച്ച് വരികയാണ് പാര്‍വതി. അച്ഛനും അമ്മയ്ക്കും പിന്നാലെയായി മകനും അഭിനയ രംഗത്തേക്കെത്തിയതിന്റെ സന്തോഷവും പാര്‍വതി പങ്കിട്ടിരുന്നു. പൂമരമെന്ന ചിത്രത്തിലൂടെയായിരുന്നു കാളിദാസ് നായകനായി അരങ്ങേറിയത്. ജയറാമിന്റേയും പാര്‍വതിയുടേയും മകളായ മാളവികയും സിനിമാതാല്‍പര്യം പ്രകടിപ്പിച്ചിരുന്നു. മികച്ച അവസരം ലഭിച്ചാല്‍ താനും സിനിമയില്‍ തുടക്കം കുറിക്കുമെന്നായിരുന്നു മാളവിക പറഞ്ഞത്. സ്‌പോര്‍ട്‌സ് മേഖലയില്‍ ജോലി ചെയ്യാനിഷ്ടമാണ്. ഇടയ്ക്ക് ജയറാമിനൊപ്പം പരസ്യത്തിലും മാളവിക അഭിനയിച്ചിരുന്നു.
ഏതാനും പരസ്യങ്ങളിലും ഫോട്ടോ ഷൂട്ടുകളിലും അഭിനയിച്ച് മാളവിക ശ്രദ്ധനേടിയിട്ടുണ്ട്.
തമിഴിലും തെലുങ്കിലുമായി കൈനിറയെ ചിത്രങ്ങളാണ് ജയറാമിന്റേതായി ഒരുങ്ങുന്നത്. പ്രഭാസിന്റെ ബിഗ് ബജറ്റ് ചിത്രം ‘രാധേ ശ്യാം’, മണിരത്നത്തിന്റെ ‘പൊന്നിയിൻസെൽവം’, ശങ്കർ–രാം ചരൺ ചിത്രം, മഹേഷ് ബാബുവിന്റെ ‘സർകാരു വാരി പാടാ’ എന്നിവയാണ് ജയറാമിന്റെ വമ്പൻ പ്രോജക്ടുകൾ.
മലയാളത്തിൽ സത്യൻഅന്തിക്കാട് സംവിധാനം ചെയ്യുന്ന ചിത്രത്തിന്റെ ഷൂട്ടിങ് പുരോഗമിക്കുന്നു. പതിനൊന്ന് വർഷങ്ങൾക്കു ശേഷം സത്യൻ അന്തിക്കാട്-ജയറാം വീണ്ടും ഒന്നിക്കുന്ന ചിത്രത്തിൽ മീര ജാസ്മിൻ ആണ് നായിക.