പാടാത്ത പൈങ്കിളിയില്‍ നിന്നും സൂരജ് അപ്രത്യക്ഷനായപ്പോള്‍ ആരാധകര്‍ നിരാശയിലായിരുന്നു. ആരോഗ്യപരമായ കാരണങ്ങളെത്തുടര്‍ന്നായിരുന്നു താരം പിന്‍മാറിയത്. പരമ്പരയിലേക്ക് സൂരജിനെ തിരികെ കൊണ്ടുവരണമെന്നുള്ള ആവിശ്യം ഇപ്പോഴും ശക്തമാവുകയാണ്.
സോഷ്യല്‍ മീഡിയയില്‍ സജീവമായ സൂരജിന്റെ പുതിയ വീഡിയോയാണ് ഇപ്പോള്‍ ചര്‍ച്ചയായിക്കൊണ്ടിരിക്കുന്നത്. പരമ്പരയില്‍ നിന്നും പിന്‍വാങ്ങേണ്ടി വന്നപ്പോഴുള്ള സങ്കടത്തെ അതിജീവിച്ചതിനെക്കുറിച്ച് പറഞ്ഞുള്ള വീഡിയോയാണ് താരം പുതിയതായി പോസ്റ്റ് ചെയ്തിട്ടുള്ളത്. ഹൃദയത്തിന്റെ ചില്ലുവാതില്‍ പൊളിഞ്ഞുവെന്ന ക്യാപ്ഷനോടെയാണ് സൂരജ് വീഡിയോ പോസ്റ്റ് ചെയ്തത്.
സീരിയലില്‍ സജീവമായിരുന്ന സമയത്ത് വീട്ടിലിരിക്കേണ്ടി വന്നത് അത്ര സുഖകരമായ കാര്യമായിരുന്നില്ല. എത്ര ചിരിച്ച് കാണിച്ചാലും ഉള്ളിന്റെയുള്ളില്‍ വിഷമം തന്നെയാണ്. ആ സ്‌ക്രീനില്‍ നിന്നും പുറത്തിറങ്ങി പിന്നെ ആ സ്‌ക്രീന്‍ നോക്കുമ്പോള്‍ വിഷമം തന്നെയാണ്. എത്ര വലിയ വിഷമം വന്നാലും ഭക്ഷണം കഴിക്കും. അത് മുടക്കാറില്ല.
ആരോഗ്യ പ്രശ്‌നങ്ങള്‍ മാറി വരുന്നുണ്ട്. വീണ്ടും ഫീല്‍ഡിലേക്ക് ഇറങ്ങാനുള്ള ചില ശ്രമങ്ങള്‍ നടത്തിയിരുന്നു. അതിനിടയിലുണ്ടായ അനുഭവങ്ങളെക്കുറിച്ചായിരുന്നു പുതിയ വീഡിയോയില്‍ സൂരജ് പറഞ്ഞത്. അതിനായി ചിലരെ വിളിച്ചിരുന്നു. കാര്യം ഞാന്‍ അങ്ങനെ വിട്ട് പറയുന്നില്ലെന്നും സൂരജ് പറഞ്ഞിരുന്നു. ആ സമയത്താണ് തിരിച്ചിങ്ങോട്ട് കോള്‍ വന്നത്. പരസ്യത്തിലേക്കുള്ള അവസരമായിരുന്നു അത്. അദ്ദേഹത്തെ കാണാനായി പോയപ്പോഴാണ് തടി കൂടുതലാണെന്ന് പറഞ്ഞ് ആ അവസരം മിസ്സായത്.
വീട്ടില്‍ വിശ്രമത്തില്‍ കഴിയുന്ന സമയത്ത് നന്നായി ഭക്ഷണം കഴിക്കുമായിരുന്നു. ഓവറായുള്ള തടിയൊന്നുമില്ല. ഈ മുടിയും താടിയുമൊക്കെ കാണുമ്പോള്‍ വണ്ണം തോന്നിക്കും. അദ്ദേഹത്തിന്റെ വാക്കുകള്‍ കേട്ടതോടെയാണ് ഡയറ്റ് പ്ലാനിനെക്കുറിച്ച് തീരുമാനിച്ചത്. ഭക്ഷണ കാര്യങ്ങളില്‍ നിയന്ത്രണം വരുത്തി. ആ അവസരം ലഭിച്ചിരുന്നുവെങ്കില്‍ കേരളത്തില്‍ പല സ്ഥലങ്ങളിലും എന്റെ വലിയ ഫ്‌ളക്‌സൊക്കെ വന്നേനെയെന്നും സൂരജ് പറയുന്നു.
ഒരാള്‍ മാറ്റിനിര്‍ത്താന്‍ ശ്രമിച്ചാല്‍ ഇരട്ടിയായി തിരിച്ചുവരുന്ന പ്രകൃതമാണ് എന്റേത്. വീഴ്ചയിലും പരാജയത്തിലുമെല്ലാം സന്തോഷിക്കുന്നത് രണ്ടിനേയും ഒരേ ലെവലില്‍ കൊണ്ടുപോവുന്നതുകൊണ്ടാണ്. സിനിമ വിജയിച്ചാലും പരാജയമായാലും ഓവറായി സന്തോഷിക്കുകയോ ദു:ഖിക്കുകയോ ചെയ്യാറില്ല അജിത് സാര്‍. അങ്ങനെ ചിന്തിച്ച് ജീവിച്ചാല്‍ രക്ഷപ്പെടും. അല്ലെങ്കില്‍ ഒരുപാട് ചില്ലുപൊട്ടലുകള്‍ ഉണ്ടാവുമെന്നും പറഞ്ഞായിരുന്നു സൂരജ് വീഡിയോ അവസാനിപ്പിച്ചത്.
ആരാധകരുടെ സ്‌നേഹത്തിനും പിന്തുണയ്ക്കും സൂരജ് നന്ദി അറിയിച്ചിരുന്നു. നിങ്ങള്‍ ചെയ്യുന്നതെല്ലാം കാണുന്നുണ്ട്. കുറേ പ്ലാനിംഗിലാണ്, ചുമ്മാ ഇരുന്നിട്ട് കാര്യമില്ലല്ലോ, ഇപ്പോഴും ഞാന്‍ ഇങ്ങനെ ഇരിക്കുമ്പോഴും എന്നെ ഒരുപാട് സപ്പോര്‍ട്ട് ചെയ്യുന്നുണ്ട്. ഇത് എല്ലാര്‍ക്കും ലഭിക്കുന്ന ഭാഗ്യമല്ല. ഇങ്ങനെ വീട്ടില്‍ കുത്തിയിരുന്നാല്‍ എന്നെ എല്ലാവരും മറക്കേണ്ട സമയം കഴിഞ്ഞു. എന്നെ ആരും മറന്നിട്ടില്ലെന്നുള്ളതിന്റെ തെളിവ് എനിക്ക് ചുറ്റുമുണ്ട് എന്നായിരുന്നു സൂരജ് പറഞ്ഞത്.