മൂന്ന് വർഷം മുൻപ് നടന്ന മകന്റ കല്യാണ ഫോട്ടോ പങ്കുവെച്ച് ഡബ്ബിങ് ആർട്ടിസ്റ്റും നടിയുമായ ഭാഗ്യലക്ഷ്മി. എന്റെ ജീവിതത്തിലെ മനോഹരമായ ദിവസം, എന്റെ മകന്റെ വിവാഹം എന്ന ക്യാപ്ഷനോടെയാണ് ഫോട്ടോ പങ്കുവച്ചിരിയ്ക്കുന്നത്. ഡിംപൾ ഭലും ശീതൾ ശ്യാമും അടക്കം പലരും കമന്റ് ബോക്സിലെത്തി സ്നേഹം അറിയിക്കുകയും ചെയ്തു.
പ്രത്യേകിച്ചൊരു വിശേഷവും ഇല്ലാതെ തന്നെ എന്താവും ഇപ്പോൾ ഈ ഫോട്ടോ പങ്കുവച്ചത് എന്ന സംശയം ആളുകൾക്കുണ്ട്
2020 ജനുവരിയിൽ ആയിരുന്നു ഭാഗ്യലക്ഷ്മിയുടെ മൂത്തമകൻ സച്ചിന്റെ വിവാഹം. അഞ്ജനയാണ് സച്ചിന്റെ ഭാര്യ. തിരുവനന്തപുരത്തുവച്ചു നടന്ന വിവാഹത്തിലും അതുകഴിഞ്ഞുള്ള സത്കാരപാർട്ടിയിലും മലയാള സിനിമയിലെ പ്രമുഖ താരങ്ങളെല്ലാം പങ്കെടുത്തിരുന്നു. മേനക, സുരേഷ്കുമാർ, ജലജ, നദിയ മൊയ്തു, കെപിഎസി ലളിത, ഷാജി കൈലാസ്, സുരേഷ് ഗോപി, മനോജ് കെ ജയൻ, ജയറാം, പാർവ്വതി എന്നിങ്ങനെ താരസമ്പന്നമായിരുന്നു.
ഭർത്താവ് രമേശ് കുമാറിൽ നിന്നും വിവാഹ മോചനം നേടിയതിന് ശേഷം രണ്ടു ആൺമക്കളെയും കഷ്ടപ്പെട്ടു വളർത്തിയതിനെ കുറിച്ച് പല അഭിമുഖങ്ങളിലും ഭാഗ്യലക്ഷ്മി തന്നെ സംസാരിച്ചിട്ടുണ്ട്. 2014 ൽ കിഡ്നി തകരാറിലായി അദ്ദേഹം മരണപ്പെട്ടു.