പ്രണയത്തിന്റെ 25-ാം വാർഷികം ആഘോഷിച്ച് കുഞ്ചാക്കോ ബോബനും പ്രിയയും. താജ്മഹലിനു മുന്നിൽ നിന്നുള്ള മനോഹരമായ ചിത്രങ്ങൾ ഷെയർ ചെയ്തിരിക്കുകയാണ് ഇപ്പോൾ നടൻ
“25 വർഷത്തെ പ്രണയം. സ്നേഹത്തിന്റെ പ്രതീകമായ ഈ സ്മാരകത്തിന്റെ പശ്ചാത്തലത്തിൽ അത് ആഘോഷിക്കുന്നു,” ചാക്കോച്ചൻ കുറിച്ചു.
“ഇന്ന് ഞാൻ സിനിമകളിൽ നന്നായി അഭിനയിക്കുന്നുവെങ്കിൽ അതിന്റെ ക്രെഡിറ്റ് നിനക്കാണ്. സ്വയം വിശ്വസിക്കാൻ പ്രേരിപ്പിച്ചതിന്റെയും എല്ലാറ്റിനെയും വ്യത്യസ്തമായ വീക്ഷണകോണിൽ കാണാനും മികച്ചതിന് വേണ്ടി പരിശ്രമിക്കാനും എന്നെ പ്രേരിപ്പിച്ചത് നീയാണ്. “ഓ പ്രിയേ “…….. എന്ന് എന്റെ ആദ്യ സിനിമയിൽ തന്നെ പാടാൻ അവസരം നൽകിയത് ദൈവത്തിന് പറ്റിയ തെറ്റല്ല. കാരണം എന്റെ ജീവിതത്തിൽ സംഭവിച്ച ഏറ്റവും നല്ല കാര്യം നീയാണ്!!” എന്നാണ് കഴിഞ്ഞ വിവാഹവാർഷികത്തിൽ ചാക്കോച്ചൻ കുറിച്ചത്.
‘ആഗ്ര യാത്രയിൽ ചാക്കോച്ചനൊപ്പം അമ്മയും സഹോദരിയും സുഹൃത്തുക്കളായ മഞ്ജു വാര്യരും രമേഷ് പിഷാരടിയുമെല്ലാം കൂടെയുണ്ട്. കഴിഞ്ഞ ദിവസം അമ്മയുടെ ജന്മദിനാഘോഷത്തിൽ നിന്നുള്ള ചിത്രങ്ങളും ചാക്കോച്ചൻ ഷെയർ ചെയ്തിരുന്നു.
അനിയത്തിപ്രാവി’ലൂടെ വന്ന് പ്രേക്ഷക ഹൃദയം കീഴടക്കിയ ആ യുവാവ്, ഏറെനാൾ ക്യാമ്പസുകളുടെ ചോക്ലേറ്റ് ഹീറോയായിരുന്നു. എന്നാൽ ആയിരക്കണക്കിന് ആരാധികമാരുടെ ഹൃദയം കവർന്ന ആ ചോക്ലേറ്റ് ഹീറോയുടെ ഹൃദയം കവർന്നത് പ്രിയ സാമുവൽ ആൻ എന്ന പെൺകുട്ടിയാണ്. 2005 ലാണ് കുഞ്ചാക്കോ ബോബനും പ്രിയയും വിവാഹിതരായത്.