പാചകവും യാത്രയും കുടുംബത്തിലെ വിശേഷങ്ങളുമെല്ലാം പങ്കുവച്ച് മലയാളികളുടെ കുടുംബത്തിലെ ഒരു അംഗമായി മാറിയിരിക്കുകയാണ് ലക്ഷ്മി നായര്‍ . മകള്‍ പാര്‍വതിക്ക് ഒറ്റ പ്രസവത്തില്‍ മൂന്ന് കുട്ടികള്‍ ജനിച്ചതിനെക്കുറിച്ചും അതിന് ശേഷമുള്ള വിശേഷങ്ങളുമെല്ലാം ലക്ഷ്മി ആരാധകരോട് പങ്കുവച്ചിരുന്നു. യുവാന്‍, വിഹാന്‍, ലയ എന്നാണ് മക്കളുടെ പേര്. ആരുഷ് ഇവരുടെ മൂത്ത സഹോദരനാണ്. ട്രിപ്ല്റ്റ്‌സിന്റെ ആദ്യ പിറന്നാളാഘോഷത്തെക്കുറിച്ച് പറഞ്ഞുള്ള വീഡിയോയാണ് പുതുതായി വൈറലായി മാറിക്കൊണ്ടിരിക്കുന്നത്.
കൊച്ചുമക്കളുടെ പിറന്നാളിനായി കേക്ക് ഉണ്ടാക്കിയത് ലക്ഷ്മി നായരായിരുന്നു. ജംഗിള്‍ തീമിലാണ് ആഘോഷം സംഘടിപ്പിച്ചത്. മകളുടെ ഭര്‍ത്താവായ അശ്വിനാണ് ഡെക്കറേഷനെല്ലാം ചെയ്യുന്നത്. പിറന്നാളിന് മുന്നോടിയായി ഞങ്ങള്‍ രണ്ടാളും നല്ല തിരക്കിലാണെന്നായിരുന്നു ലക്ഷ്മി നായര്‍ പറഞ്ഞത്.
കേക്കുണ്ടാക്കുന്നതും പ്ലേറൂമും വീടിലും ഗാര്‍ഡനുമെല്ലാം അലങ്കരിച്ചതും ലക്ഷ്മി നായര്‍ കാണിച്ചിരുന്നു. കൊച്ചുമക്കള്‍ക്കായി കേക്ക് ഒരുക്കാനായതില്‍ പ്രത്യേകമായൊരു സന്തോഷമുണ്ട് എന്നും ലക്ഷ്മി പറഞ്ഞിരുന്നു.
എങ്ങനെയാണ് കേക്ക് വേണ്ടതെന്ന് പാര്‍വതിയോട് ചോദിച്ചിരുന്നു. അവളുടെ മനസിലുള്ളത് അതേപോലെ എന്നോട് പറഞ്ഞിരുന്നു. അതുപോലെ വന്നോ ഇതെന്ന് ചോദിച്ചപ്പോള്‍ അമ്മാ ഞാന്‍ മനസില്‍ കണ്ടത് അതേപോലെ വന്നു എന്നായിരുന്നു മറുപടി. അശ്വിനും ആയുഷുമെല്ലാം ഹാപ്പിയാണ്. കുഞ്ഞുങ്ങള്‍ക്ക് പിന്നെ ഒന്നും പറയാനില്ലല്ലോ. അവരുടെ വളര്‍ച്ചയിലെ ഓരോ ഘട്ടവും എനിക്കിപ്പോഴും ഓര്‍മ്മയുണ്ടെന്നും ലക്ഷ്മി നായര്‍ പറഞ്ഞിരുന്നു.
ഒരു ഇവന്റ് മാനേജ്‌മെന്റ് കമ്പനിയുടേയും സഹായമില്ലാതെയാണ് അശ്വിന്‍ ഇത്രയും മനോഹരമായി ഡെക്കറേഷന്‍ ചെയ്തത്. കുഞ്ഞുങ്ങളുടെ ചിത്രങ്ങളെല്ലാം ഗാര്‍ഡന്‍ ഏരിയയില്‍ തൂക്കിയിട്ടിരുന്നു. അശ്വിന്റെ ഡെക്കറേഷന്‍ കിടിലനാണെന്ന് വന്നവരെല്ലാം പറഞ്ഞിരുന്നു. പാര്‍വതിയുടേയും അശ്വിന്റെയും സുഹൃത്തുക്കളെല്ലാം ബര്‍ത്ത് ഡേ പാര്‍ട്ടിയില്‍ പങ്കെടുത്തിരുന്നു. കേക്ക് കട്ടിങ്ങിന് മുന്നോടിയായി വീഡിയോ കോളിലൂടെ നാട്ടിലുള്ളവരേയും വിളിച്ചതും ലക്ഷ്മി നായര്‍ കാണിച്ചിരുന്നു.
കുഞ്ഞുങ്ങളുടെ ജീവിതത്തിലെ ഏറ്റവും പ്രധാനപ്പെട്ട കാര്യമാണ് നടന്നത്. എന്റെ സന്തോഷം പറഞ്ഞറിയിക്കാനാവുന്നതല്ല. ഇതെല്ലാം വീഡിയോയിലൂടെ കാണിക്കാനാവുമോ എന്ന് ഉറപ്പില്ലായിരുന്നു. അതാണ് നേരത്തെ പറയാതിരുന്നതെന്നും ലക്ഷ്മി നായര്‍ വ്യക്തമാക്കിയിരുന്നു.
നിരവധി പേരായിരുന്നു വീഡിയോയ്ക്ക് താഴെയായി കമന്റുകളുമായെത്തിയത്. കുഞ്ഞുങ്ങളേയും പാര്‍വതിയേയും കാണാനായതില്‍ വളരെയധികം സന്തോഷമുണ്ട്. എന്നും ഇങ്ങനെ പോവട്ടെ, ഇതുവരെ കണ്ടതില്‍ മനോഹരമായ വീഡിയോ തുടങ്ങിയ കമന്റുകളാണ് വീഡിയോയ്ക്ക് താഴെ വന്നത്. കമന്റുമായെത്തിയവര്‍ക്കെല്ലാം ലക്ഷ്മി നായര്‍ മറുപടിയേകിയിരുന്നു.
about lakshmi nair