തന്റെ വിദ്യാഭ്യാസയോഗ്യത വെളിപ്പെടുത്തി ബോളിവുഡ് നടി ദീപിക പദുകോണ്‍. വെറും പന്ത്രണ്ടാം ക്ലാസ് മാത്രമാണെന്നാണ് താരം പറയുന്നത് ഹേമമാലിനിയുടെ ജീവചരിത്രം ‘ ഹേമമാലിനി: ബിയോണ്ട് ഡ്രീം ഗേള്‍’ എന്ന പുസ്തകത്തിന്റെ പ്രകാശന വേദിയിലാണ് ദീപികയുടെ തുറന്നുപറച്ചില്‍. തുടര്‍ന്ന് പഠിക്കാന്‍ സാധിക്കാത്തതില്‍ കുറ്റബോധം ഉണ്ടെന്നും അവര്‍ നിറഞ്ഞ സദസ്സില്‍ പറഞ്ഞു.
” മോഡലിംഗ് ജോലികള്‍ക്കിടയില്‍ പതിനൊന്ന്, പന്ത്രണ്ട് ക്ലാസുകള്‍ പൂര്‍ത്തിയാക്കാന്‍ ഞാനേറെ ബുദ്ധിമുട്ടിയിരുന്നു. അക്കാലത്ത് ബാംഗ്ലൂരിലായിരുന്നു ഞങ്ങള്‍ കുടുംബസമേതം താമസിച്ചിരുന്നത്. മോഡലിംഗിനായി മുംബൈ ,ഡല്‍ഹി യാത്രകള്‍ അന്ന് പതിവായിരുന്നു. പന്ത്രണ്ടാം ക്ലാസിനു ശേഷം കോളേജില്‍ അഡ്മിഷന്‍ എടുത്തെങ്കിലും തുടര്‍ന്ന് കൊണ്ട് പോകാന്‍ സാധിച്ചില്ല. വിദൂര വിദ്യാഭ്യാസത്തിലൂടെ ഡിഗ്രി കരസ്ഥമാക്കാന്‍ ശ്രമിച്ചു. അതിലും ഞാന്‍ പരാജയപ്പെട്ടു. വെറും പന്ത്രണ്ടാം ക്ലാസ് പാസ് മാത്രമാണ് ഞാന്‍ . കോളേജ് ബിരുദം നേടിയതിനു ശേഷം, മോഡലിംഗുമായി മുന്നോട്ടു പോകാമെന്ന അഭിപ്രായക്കാരായിരുന്നു എന്റെ മാതാപിതാക്കള്‍ – എന്നും ദീപിക കൂട്ടിചേര്‍ത്തു .