മലയാളികളുടെ പ്രിയങ്കരനാണ് ദിലീപ്. ഒരു കാലത്ത് കുടുംബ പ്രേക്ഷകർക്ക് പ്രിയങ്കരൻ ആയിരുന്നു ദിലീപ്. എന്നാൽ ഇക്കഴിഞ്ഞ വർഷങ്ങളിൽ നടന് കാര്യമായ ഹിറ്റുകളൊന്നും സിനിമയിൽ ഇല്ല. കൊച്ചിയിൽ നടി ആക്രമിക്കപ്പെട്ട കേസിൽ ദിലീപിന്റെ പേരും ഉയർന്ന് വന്നതിന് പിന്നാലെയാണ് നല്ലൊരു ശതമാനം പേരും ദിലീപിനെതിരെ തിരിഞ്ഞത്. ഇപ്പോഴും നടി കേസിനു പിന്നാലെ പരക്കം പാഞ്ഞുകൊണ്ടിരിക്കുകയാണ് ദിലീപ്. കേസിന് പിന്നാലെ പലരും ദിലീപിനെ പിന്തുണച്ച് കൊണ്ടും എതിർത്തുകൊണ്ടും രംഗത്തെത്തിയിരുന്നു. നടൻ ദിലീപിന്റെ 150-ാമത്തെ ചിത്രം പ്രിൻസ് ആൻഡ് ഫാമിലി കുറച്ച് ദിവസങ്ങൾക്ക് മുമ്പായിരുന്നു തിയേറ്ററുകളിലെത്തിയിരുന്നത്.
ദിലീപിനെ കൂടാതെ സിദ്ദീഖ്, ധ്യാൻ ശ്രീനിവാസൻ, ജോണി ആന്റണി, ബിന്ദു പണിക്കർ, മഞ്ജു പിള്ള, റാനിയ തുടങ്ങിയവരാണ് പ്രിൻസ് ആന്റ് ഫാമിലിയിലെ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. ഇപ്പോഴിതാ ഈ സിനിമ വിജയിക്കണം എന്ന് എല്ലാവർക്കും വലിയ ആഗ്രഹമുണ്ടായിരുന്നു എന്നും അതിന് കാരണം ദിലീപ് എന്ന ഘടകമാണ് എന്നും പറയുകയാണ് ജോണി ആന്റണി. ഒരു യൂട്യൂബ് ചാനലിന് നൽകിയ അഭിമുഖത്തിൽ സംസാരിക്കുകയായിരുന്നു നടൻ.
ഈ സിനിമയോട് എല്ലാവരും പ്രത്യേക താൽപര്യത്തോടെയാണ് സമീപിച്ചത്. പ്രത്യേകിച്ച് ബിന്റോയുടെ ആദ്യത്തെ സിനിമ. ദിലീപിന്റെ 150-ാമത്തെ സിനിമ എന്നൊക്കെയുണ്ട്. ദിലീപിന്റെ സിനിമ വിജയിക്കണമെടാ എന്ന് ബിന്റോയോടും പറഞ്ഞിരുന്നു. ഞാൻ ഒരു കാര്യം കൂടി പറയട്ടെ. കാര്യം അത് എനിക്കോർക്കാതിരിക്കാൻ പറ്റില്ല. കൊച്ചിരാജാവ് എന്ന പടം ഫസ്റ്റ് കോപ്പിയായി ഞാൻ ഇങ്ങോട്ട് വരികയാണ്.
ആ സമയം എനിക്ക് ഒരു കോൾ വരികയാണ്. ഇന്നസെന്റേട്ടന്റെ കോളാണ്. ജോണിയാ, ഞാൻ ഇന്നസെന്റാണ്. എങ്ങനെയുണ്ട് നിന്റെ പടം എന്ന് ചോദിച്ചു. ഞാൻ പറഞ്ഞു ചേട്ടാ നന്നായിട്ടുണ്ട്, ഒരുവിധം വിശ്വാസം ഉണ്ട് എന്ന്. ആ പടം ഓടണം, അയാൾ ഇവിടെ ഉണ്ടാകണം. ഞാൻ ദിലീപിനെ വിളിച്ച് പറഞ്ഞു ദിലീപേ നിന്റെ അപ്പൻ വിളിച്ച് കേട്ടോ എന്ന്. അപ്പോൾ ദിലീപ് ചോദിച്ചു ഏ എന്റെ അപ്പനോ എന്ന്. അപ്പോൾ ഞാൻ പറഞ്ഞു നിന്റെ സിനിമയിലെ അപ്പൻ എന്ന്. ഇന്നസെന്റേട്ടൻ എന്നോട് പറഞ്ഞതാ അയാളിവിടെ ഉണ്ടാകണം എന്ന്. അതിപ്പോൾ ഓർക്കുമ്പോഴും എന്തോ പോലെ ആണ്. എന്ന് പറഞ്ഞത് പോലെ ദിലീപ് ഇവിടെ ഉണ്ടാകണം എന്നാണ് ജോണി ആന്റണി പറഞ്ഞത്.
ദിലീപിന്റെ അടുത്ത സുഹൃത്തായ ജോണി ആന്റണി അദ്ദേഹത്തെ വെച്ച് മൂന്ന് സിനിമകൾ സംവിധാനം ചെയ്യുകയും ചെയ്തിട്ടുണ്ട്. ജോണി ആന്റണിയുടെ ആദ്യ രണ്ട് സിനിമകളായ സിഐഡി മൂസ, കൊച്ചിരാജാവ് എന്നിവ ദിലീപിനൊപ്പമായിരുന്നു. 2007 ൽ ഇൻസ്‌പെക്ടർ ഗരുഡ് എന്ന സിനിമയും ജോണി ആന്റണി – ദിലീപ് കൂട്ടുകെട്ടിൽ പുറത്തിറങ്ങിയിരുന്നു. നിലവിൽ അഭിനയത്തിൽ ശ്രദ്ധ കേന്ദ്രീകരിച്ചിരിക്കുന്ന ജോണി ആന്റണി സിഐഡി മൂസയ്ക്ക് രണ്ടാം ഭാഗം ഉണ്ടാകും എന്നും അറിയിച്ചിരുന്നു.
‘ഞാൻ മാജിക് ഫ്രെയിംസിന്റെ സിനിമയിൽ ആദ്യമായിട്ടാണ് അഭിനയിക്കുന്നത്. പക്ഷെ പണ്ട് മുതൽ തന്നെ അറിയാം. എങ്കിലും ഈ കോൾ വന്നപ്പോൾ ഞാൻ അത്ഭുതപ്പെട്ടു. ബിന്ഡോയും ഷാജസും ചേട്ടനും ഉണ്ടെന്ന് ആദ്യമേ തന്നെ പറഞ്ഞതുകൊണ്ട് ലിസ്റ്റിൻ പിന്നെ ഒന്നും പ്രത്യേകിച്ച് പറഞ്ഞില്ല, ഞാൻ വരുകയും ചെയ്തു. ഭയങ്കര അഭിമാനം ഉണ്ട്. ഇതിന് പിന്നാലെ മറ്റൊരു പടത്തിൽ കൂടെ ഞാൻ അഭിനയിച്ചു. ലിസ്റ്റിനെ കുറിച്ച് കേൾക്കുമ്പോൾ എനിക്ക് കുറച്ച് ഭയമൊക്കെ ഉണ്ടായിരുന്നു. എങ്ങനെയായിരിക്കും ഈ ക്രൂവിനോടൊക്കെ പെരുമാറുക എന്നതായിരുന്നു എന്റെ ആശങ്ക. പക്ഷേ ഈ കുട്ടികൾക്ക് വേണ്ട എല്ലാ കാര്യങ്ങളും ലിസ്റ്റിൻ ഭംഗിയായിട്ട് ചെയ്തിട്ടുണ്ടാകും. നമ്മൾ ഡയറക്ടർമാർ ആയിരുന്നതുകൊണ്ട് തന്നെ ഇവർ എന്ത് ചെയ്യുന്നു ഇവർക്ക് എന്ത് കൊടുക്കുന്നു എന്നൊക്കെ ഞാൻ വാച്ച് ചെയ്യാറുണ്ട്. ലിസ്റ്റൻ വേണ്ടതെല്ലാം അവർക്ക് കൊടുത്തിട്ടുണ്ട്.
പുതിയ ഡയറക്ടേഴ്സിന് നിങ്ങൾ ഒരു സിനിമ കൊടുക്കുമ്പോൾ നിങ്ങൾ ഒരു ജീവിതമാണ് കൊടുക്കുന്നത്. 23 വർഷം മുമ്പ് ദിലീപ് എന്ന ഈ മനുഷ്യൻ തന്ന ജീവിതമാണ് എന്റേത്. 22 വർഷമോ മറ്റോ ആയി മൂസ ഇറങ്ങിയിട്ട്. ഇന്നും ഞാൻ അതുകൊണ്ട് ജീവിച്ചു പോകുന്നു. അങ്ങനെ ഒരു വിൻഡോ വരുമ്പോൾ 10 കുടുംബങ്ങളുടെ അല്ലെങ്കിൽ 100 കുടുംബങ്ങളുടെ പ്രാർത്ഥന നിങ്ങൾക്ക് കിട്ടും. ഒരു കാലത്ത് നിങ്ങൾക്കൊന്നും ഒരു തോൽവിയും വരില്ല.
ദിലീപിന്റെ കാര്യത്തിലേക്ക് വരികയാണെങ്കിൽ, ചെയ്ത പടങ്ങളും വിജയങ്ങളും വെച്ച് നോക്കുമ്പോൾ മലയാള സിനിമയിൽ എന്നല്ല, ഇന്ത്യൻ സിനിമയിൽ തന്നെ ഇത്രയധികം ആവറേജുള്ള ഒരു നടൻ ദിലീപ് മാത്രമായിരിക്കും. ദിലീപ് എന്റെ സുഹൃത്തായതുകൊണ്ട് പറയുകയല്ല, കണക്കുകളാണ് ഞാൻ പറയുന്നത്. സിനിമ നന്നായാൽ എല്ലാ വിമർശനങ്ങളെയും അതിജീവിച്ച് ഓടാനുള്ള ഓടിക്കയറാനുള്ള കപ്പാസിറ്റി ദിലീപിനുണ്ട്. അത് ദിലീപ് അർഹിക്കുന്നത്.
ദിനംപ്രതി എത്രയോ ആളുകൾ എന്റെ അടുത്ത് വന്ന് ദിലീപേട്ടന്റെ അടുത്ത് ഒരു കഥ പറയാൻ പറ്റുമോയെന്ന് ചോദിക്കാറുണ്ട്. അതുപോലെ ആളുകൾക്ക് ഇഷ്ടമുള്ള താരമാണ് ദിലീപ്. നിങ്ങൾ ചാനലുകൾ തുറന്ന് നോക്കൂ.. അവിടെ എല്ലാ ദിവസവും ദിലീപിന്റ പടങ്ങൾ കാണും. ഷാഫി ചെയ്ത പടങ്ങൾ. ഞാൻ ചെയ്ത പടങ്ങൾ, ലാൽ ജോസ് ചെയ്ത പടങ്ങൾ അങ്ങനെ ഒന്നിന് പിറകെ ഒന്നായ വന്നുകൊണ്ടിരിക്കുകയാണ്. ഈ സിനിമ ഒരു സൂപ്പർ ഹിറ്റായിരിക്കുമെന്ന് ദിലീപിന് ഞാൻ ഉറപ്പ് നൽകുന്നു.
കാരണം നിങ്ങളെ സ്നേഹിക്കുന്ന ഞാൻ ഉൾപ്പെടെയുള്ള ആളുകളുടെ പ്രാർത്ഥനയും ആഗ്രഹവും ആവേശവുമാണ് ഈ സിനിമ. ഈ പടത്തിലേക്ക് എന്നെ വിളിച്ചതിൽ വളരെ സന്തോഷമുണ്ട്. ഷാരിസ് നല്ല രീതിയിൽ എഴുതി. വിൻഡോ നല്ല രീതിയിൽ എടുത്തു. ദിലീപിന്റെ ഫാൻസ് അസോസിയേഷൻ ഭാരവാഹികൾ ഇവിടെയുണ്ട്. എനിക്ക് അറിയാം അവരൊക്കെ ചങ്ക് പറിച്ച് കൊടുക്കുന്നവരാണ്. അതുപോലെ ദിലീപിനൊപ്പം നിൽക്കുന്ന ആയിരക്കണക്കിന് ആളുകളുണ്ട്. ഈ സിനിമ സൂപ്പർ ഹിറ്റാകട്ടേയെന്നും അദ്ദേഹം പറഞ്ഞു.
കഴിഞ്ഞ കുറച്ച് കാലമായി സിഐഡി മൂസയുടെ രണ്ടാം ഭാഗം വരുന്നുവെന്ന തരത്തിൽ പ്രചാരങ്ങൾ നടക്കുന്നുണ്ട്. ഇതേ കുറിച്ചും ജോണി ആന്റണി അടുത്തിടെ പറഞ്ഞിരുന്നു. മൂസ 2 നന്നായി എഴുതി വരികയാണെങ്കിൽ, രസകരമായ ആ കോമ്പോ ഒന്നിച്ച്, അന്ന് എങ്ങനെ തുടങ്ങിയോ ആ ഊർജ്ജത്തിൽ ഒന്നിച്ച് നിന്ന് മുന്നോട്ട് പോകുക ആണെങ്കിൽ തീർച്ചയായും മൂസ 2 ഉണ്ടാകും.
അത് സംഭവിക്കാനാണ് നമ്മൾ എല്ലാം ആഗ്രഹിക്കുന്നതും പ്രാർത്ഥിക്കുന്നതും. ഇത് പുതിയൊരാൾ ചെയ്‌തെങ്കിൽ ബെറ്റർ ആകുമെന്ന് പറയിപ്പിക്കാൻ ഞാൻ സമ്മതിക്കില്ല. ആദ്യ ഭാഗത്തെ പോലെ തന്നെ കട്ടയ്ക്ക് പിടിച്ച് എന്റെ കഴിവിന്റെ പരമാവധി ഞാൻ ശ്രമിക്കും. അത് ഞാൻ ഉറപ്പ് തരികയാണ്. സ്‌കോട്ട്‌ലാന്റിൽ ആയിരിക്കും ഇൻട്രോഡക്ഷൻ സോങ്’, എന്നാണ് ജോണി ആന്റണി പറഞ്ഞത്.
ആദ്യഭാഗത്ത് ഉണ്ടായിരുന്ന പല അഭിനേതാക്കളും ഇന്നില്ലല്ലോ എന്ന ചോദ്യത്തിന്, ‘തുടർച്ചകൾ വന്നിട്ടുള്ള സിനിമകളിൽ ഒരിക്കലും ഒരു കഥാപാത്രവും നിലനിൽക്കണമെന്ന് നിർബന്ധം ഇല്ല. എനിക്ക് തോന്നുന്നു രണ്ടാം ഭഗത്തിൽ മൂസയും അർജുനും ഉണ്ടായാൽ മതി. അങ്ങനെ ചിന്തിച്ചാലേ പറ്റുള്ളൂ.
ഇല്ലാത്തവരെ നമുക്ക് കൊണ്ട് വരാൻ പറ്റില്ല. നഷ്ടങ്ങൾ നഷ്ടങ്ങൾ തന്നെയാണ്. പക്ഷേ പുതിയ ആൾക്കാരെ വച്ചത് നികത്താൻ ശ്രമിക്കും. ഒരുപാട് കടമ്പകൾ ഉണ്ട് അതിന്’, എന്നായിരുന്നു ജോണി ആന്റണിയുടെ മറുപടി. പവി കെയർ ടേക്കർ എന്ന ദിലീപ് ചിത്രത്തിന്റെ പ്രമോഷൻ പ്രസ്മീറ്റിനിടെ ആയിരുന്നു സംവിധായകന്റെ പ്രതികരണം.
സിഐഡി മൂസ എടുക്കുന്നത് ദിലീപിന്റെ പ്രതിസന്ധി പരിഹരിക്കാനല്ല. ദിലീപിന്റെ പ്രതിസന്ധിയുടെ പീക്ക് ടൈമിൽ നിൽക്കുമ്പോഴാണല്ലോ രാമലീല വരുന്നത്. സിനിമ സംബന്ധമായി ദിലീപിന് ഒരു പ്രതിസന്ധി ഉണ്ടെന്ന് ഞാൻ കരുതുന്നില്ല. കേസുമായി ബന്ധപ്പെട്ട് പ്രതിസന്ധികളുണ്ടാകാം. അത് കോടതി തീരുമാനിക്കട്ടെ. അതിനകത്ത് നമ്മളിപ്പോൾ കമന്റ് പറയേണ്ട കാര്യമില്ല എന്നും അദ്ദേഹം മുമ്പ് പറഞ്ഞിരുന്നു.
സിഐഡി മൂസ റിലീസ് ചെയ്തിട്ട് 20 വർഷം പൂർത്തിയായ വേളയിൽ ദിലീപ് പങ്കുവച്ച വീഡിയോ സോഷ്യൽ മീഡിയയിൽ തരംഗമായികുന്നു. ‘മൂസ വീണ്ടും തിരിച്ചുവരും. സിഐഡി മൂസയുടെ 20 വർഷങ്ങൾ,’ എന്നാണ് ദിലീപ് കുറിച്ചത്. ഇത് സിനിമാ പ്രേമികൾക്ക് ആവേശം പകർന്നിരുന്നു. ഇപ്പോൾ ജോണി ആന്റണിയുടെ വാക്കുകൾക്ക് പിന്നാലെ ദിലീപിൽ നിന്നും ആ പ്രഖ്യാപനം ഉടൻ ഉണ്ടാകുമെന്ന പ്രതീക്ഷയിലാണ് ആരാധകർ.
2003 ജൂലൈ നാലിനാണ് സി ഐ ഡി മൂസ റിലീസ് ചെയ്തത്. ഗ്രാന്റ് പ്രൊഡക്ഷൻസിന്റെ ബാനറിൽ ദിലീപ്, അനൂപ് എന്നിവർ ചേർന്ന് നിർമ്മിച്ച സിഐഡി മൂസയ്ക്ക് തിരക്കഥ ഒരുക്കിയത് ഉദയ് കൃഷ്ണ സിബി കെ തോമസാണ്. ഭാവന, കൊച്ചിൻ ഹനീഫ, ഒടുവിൽ ഉണ്ണികൃഷ്ണൻ, ഹരിശ്രീ അശോകൻ, സലിം കുമാർ, സുകുമാരി, ബിന്ദു പണിക്കർ, മുരളി, ക്യാപ്റ്റൻ രാജു, ഇന്ദ്രൻസ് തുടങ്ങി വലിയ താരനിരതന്നെ ചിത്രത്തിൽ അണിനിരന്നിരുന്നു.
ജോണി ആന്റണിയുടെ സംവിധാനത്തിൽ പുറത്തിറങ്ങിയ ചിത്രം കൊച്ചുകുട്ടികൾ മുതൽ മുതിർന്നവർ വരെ ഒന്നടങ്കം ഒരുപോലെ ആസ്വദിച്ചു. ടെലിവിഷനിൽ സംപ്രേക്ഷണം ചെയ്യുമ്പോൾ ഇന്നും ആവർത്തിച്ച് കാണുന്ന ഈ സിനിമ മലയാളികൾക്ക് സമ്മാനിച്ചത് ചിരിയുടെ മാലപ്പടക്കം ആയിരുന്നു. അത്തരത്തിലൊരു സിനിമ ഇനി ഇൻഡസ്ട്രിയിൽ ഉണ്ടാകുമോ എന്ന കാര്യത്തിൽ സംശയവും ആണ്. ജോണി ആൻ്റണിയുടെ കരിയറിലെ തന്നെ ശ്രദ്ധേയമായ ചിത്രമായിരുന്നു ഇത്. ഈ ചിത്രത്തിലൂടെയാണ് അദ്ദേഹം സ്വതന്ത്ര സംവിധായകനായി മാറിയത്. തുടർന്ന് കൊച്ചി രാജാവ്, തുറപ്പുഗുലാൻ, സൈക്കിൾ, തോപ്പിൽ ജോപ്പൻ, താപ്പാന തുടങ്ങിയ ചിത്രങ്ങൾ അദ്ദേഹം സംവിധാനം ചെയ്തിട്ടുണ്ട്.
അതേസമയം, ബിന്റോ സ്റ്റീഫൻ സംവിധാനം ചെയ്യുന്ന സിനിമയാണ് പ്രിൻസ് ആന്റ് ഫാമിലി. ദിലീപ് നായകനാകുന്ന ചിത്രത്തിൽ ധ്യാൻ ശ്രീനിവാസൻ, സിദ്ധീഖ്, മഹിമ നമ്പ്യാർ, ഉർവ്വശി, ബിന്ദു പണിക്കർ, മഞ്ജു പിള്ള, ജോണി ആന്റണി തുടങ്ങിയവരും അഭിനയിക്കുന്നുണ്ട്. പവി കെയർടേക്കർ ആയിരുന്നു ഇതിന് മുമ്പ് ദിലീപിന്റേതായി പുറത്തിറങ്ങിയ സിനിമ. സമ്മിശ്ര പ്രതകിരണം മാത്രമായിരുന്നു ചിത്രത്തിന് ലഭിച്ചിരുന്നത്. വിചാരിച്ച അത്ര വിജയം കൈവരിക്കാൻ ഈ ചിത്രത്തിനും ആയില്ല. ഭഭബ ആണ് ദിലീപിന്റേതായി അണിയറയിലുള്ള മറ്റൊരു സിനിമ.