ബോളിവുഡിലെ എക്കാലത്തെയും മികച്ച നടന്മാരില്‍ ഒരാളാണ് ധര്‍മേന്ദ്ര. 60 വര്‍ഷത്തെ കരിയറില്‍ മുന്നോറോളം ചിത്രങ്ങളില്‍ ധര്‍മേന്ദ്ര അഭിനയിച്ചിട്ടുണ്ട്. ഇപ്പോള്‍ നടന്‍ സിനിമകളില്‍ സജീവമല്ലെങ്കിലും ബോളിവുഡ് വാര്‍ത്തകളില്‍ സജീവമാണ്.
ധര്‍മ്മേന്ദ്രയ്ക്ക് സിനിമയേക്കാള്‍ പ്രിയം കാറുകളായിരുന്നുവെന്നാണ് അദ്ദേഹവുമായി അടുത്ത ബന്ധമുള്ളവര്‍ പറയുന്നത്. വിന്റേജ് കാറുകള്‍ മുതല്‍ ആധുനിക സംവിധാനങ്ങളുള്ള സൂപ്പര്‍ കാറുകള്‍ വരെ നീളുന്നതാണ് ധര്‍മേന്ദ്രയുടെ കാര്‍ പ്രേമം.
വിവിധ കാലഘട്ടത്തിലെ കാറുകളുടെ വലിയൊരു ശേഖരം തന്നെ ധര്‍മേന്ദ്രയ്ക്കുണ്ടത്രേ. ഇപ്പോഴിതാ ഇക്കൂട്ടത്തില്‍ തനിക്ക് ഏറ്റവും പ്രിയപ്പെട്ട ഒരു കാര്‍ ആരാധകര്‍ക്കായി പരിചയപ്പെടുത്തിയിരിക്കുകയാണ് നടന്‍.
സിനിമാ ലോകത്ത് ചുവടുറപ്പിക്കുന്ന കാലത്ത് തനിക്കൊപ്പം യാത്ര ചെയ്ത ഫിയറ്റ് 1100. അറുപത് വര്‍ഷം പഴക്കമുള്ള ഈ കാറാണ് ധര്‍മേന്ദ്ര ആദ്യം വാങ്ങുന്നത്. ഇന്നും പുതുപുത്തനായാണ് ഈ കാര്‍ താരം സൂക്ഷിച്ചിരിക്കുന്നത്.
1089 സിസിസിലിണ്ടര്‍ പെട്രോള്‍ എഞ്ചിനോടു വരുന്ന ഈ കാറിന്റെ പുതിയ തലമുറയാണ് മുംബൈയിലെ ‘കാലി പീലി’ ടാക്‌സി. 1960ല്‍ 18,000 രൂപയ്ക്കാണ് ധര്‍മേന്ദ്ര ഈ കാര്‍ വാങ്ങുന്നത്. പ്രീമിയര്‍ ഓട്ടോമൊബൈല്‍സ് ലിമിറ്റഡിന്റെ കീഴിലാണ് ഫിയറ്റ് നിര്‍മിച്ചിരുന്നത്.