മലയാള മിനിസ്‌ക്രീന്‍ പ്രേക്ഷകരുടെ ഏറ്റവും പ്രിയങ്കരനായ നടനാണ് ആനന്ദ് നാരായണന്‍. കുടുംബവിളക്ക് സീരിയലിലെ ഡോക്ടര്‍ അനിരുദ്ധ് എന്ന കഥാപാത്രത്തിലാണ് നടന്‍ തിളങ്ങി നില്‍ക്കുന്നത്. ഇത് കൂടാതെ നിരവധി സീരിയലുകളില്‍ ആനന്ദ് അഭിനയിച്ചിട്ടുണ്ടെങ്കിലും അനിരുദ്ധിലൂടെയാണ് ജനപ്രീതി ലഭിക്കുന്നത്. ആദ്യം വില്ലന്‍ വേഷമായിരുന്നെങ്കിലും ഇപ്പോള്‍ നല്ലൊരു കഥാപാത്രമായി ഇത് മാറുകയും ചെയ്തു.
കുടുംബവിളക്ക് എന്ന സീരിയലിലെ അനിരുദ്ധ് എന്ന കഥാപാത്രമായി എത്തി പ്രേക്ഷക ശ്രദ്ധ നേടിയ നടനാണ് ആനന്ദ് നാരായണന്‍. സുമിത്രയുടെ മൂത്ത പുത്രനായ അനിരുദ്ധ് അല്പം നെഗറ്റീവ് ഷേഡ് ഉള്ള കഥാപാത്രമാണ്. ഇടയ്ക്ക് പോസിറ്റീവ് സൈഡിലേക്ക് മാറിയെങ്കിലും എപ്പോള്‍ വേണമെങ്കിലും മറുകണ്ടം ചാടാനുള്ള സാധ്യതയുണ്ട്. കുടുംബവിളക്ക് സീരിയലിനൊപ്പം ശ്യാമാംബരം എന്ന സീ കേരളത്തിലെ സീരിയലും ചെയ്യുന്നു എന്നതാണ് ഇപ്പോള്‍ ആനന്ദിന്റെ പുതിയ സന്തോഷം. ഇന്ത്യഗ്ലിഡ്‌സിന് നല്‍കിയ അഭിമുഖത്തില്‍ തന്റെ സ്റ്റാര്‍ഡത്തെ കുറിച്ച് ആനന്ദ് നാരായണന്‍ സംസാരിക്കുകയുണ്ടായി.
കുടുംബവിളക്ക് എന്ന സീരിയലിന് മുന്‍പ് ഞാന്‍ വേറെയും ഒരുപാട് സീരിയലുകള്‍ ചെയ്തിട്ടുണ്ട്. ഏഷ്യനെറ്റിലെ തന്നെ കാണാകണ്മണിയാണ് എന്റെ ആദ്യ സീരിയല്‍. അതിന് ശേഷം ഒരുപാട് സീരിയലുകള്‍ ചെയ്തു എങ്കിലും ഒന്നും ബ്രേക്ക് കിട്ടിയില്ല. അവസരങ്ങള്‍ തേടിയും ഒരുപാട് നടന്നിരുന്നു. ഏറ്റവും ഒടുവിലാണ് കുടുബവിളക്ക് എന്ന സീരിയലും അനിരുദ്ധ് എന്ന കഥാപാത്രവും എന്നെ തേടിയെത്തിയത്.
ഇപ്പോള്‍ ആളുകള്‍ എന്നെ തിരിച്ചറിയുന്നുണ്ട്. കുടുംബവിളക്കിലെ അനിരുദ്ധല്ലേ എന്ന് ചോദിച്ച് വരാറുണ്ട്. സന്തോഷമുള്ള കാര്യമാണ്. പക്ഷെ ഒരിക്കലും അതൊരു സ്റ്റാര്‍ഡം ആയി തലയില്‍ വയ്ക്കുകയോ, സെലിബ്രിറ്റി എന്ന അഹങ്കാരത്തോടെ ആളുകളോട് പെരുമാറുകയോ ചെയ്യില്ല. ഞാനിപ്പോഴും നാരായണന്‍ നായരുടെ മകന്‍ ആനന്ദ് നാരായണന്‍ തന്നെയാണ്.
എന്റെ ആദ്യ സീരയില്‍ ടെലികാസ്റ്റ് ചെയ്ത് തുടങ്ങിയ സമയത്ത് എന്റെ അച്ഛന് പറഞ്ഞ ഒരു വാക്കുണ്ട്. ‘മോനെ ഇന്നലെ വരെ നീ നാരായണന്‍ നായരുടെ മകന്‍ എന്ന നിലയിലാണ് അറിയപ്പെട്ടിരുന്നത്. എന്നാല്‍ ഇന്ന് മുതല്‍ അങ്ങിനെയല്ല. ആളുകളോട് പെരുമാറുമ്പോള്‍ ആ ഓര്‍മ വേണം’ എന്ന്. അന്ന് അച്ഛന് കൊടുത്ത വാക്കാണ് ഇന്നലെ വരെ ഞാന്‍ എങ്ങിനെയായിരുന്നു അത് പോലെ തന്നെയായിരിയ്ക്കും ഇനി അങ്ങോട്ടും എന്ന്. അത് ഇപ്പോഴും ഞാന്‍ പാലിക്കുന്നുണ്ട്.
എത്ര അവസരങ്ങള്‍ വന്നാലും കരിയറില്‍ ഉയര്‍ച്ച കിട്ടിയാലും വന്ന വഴി ഞാന്‍ മറക്കില്ല. അതുകൊണ്ട് തന്നെ എന്നെ തിരിച്ചറിഞ്ഞ് കൂടെ നിന്ന് ഫോട്ടോ എടുക്കാന്‍ വരുന്നവരോടോ സംസാരിക്കാന്‍ വരുന്നവരോടോ ഒരു തരത്തിലുള്ള വിമുഖതയും കാട്ടാറില്ല. എനിക്കും ഇഷ്ടമുള്ള കാര്യമാണ് അതൊക്കെ.
യൂട്യൂബ് ചാനല്‍ ആരംഭിച്ചതിനെ കുറിച്ചും ആനന്ദ് അഭിമുഖത്തില്‍ സംസാരിച്ചു. ‘ആങ്കറിങ് ചെയ്യാനും സംസാരിച്ചുകൊണ്ടിരിയ്ക്കാനും വളരെ അധികം ഇഷ്ടമുള്ള ആളാണ് ഞാന്‍. അപ്പോഴാണ് എല്ലാവരും യൂട്യൂബ് ചാനല്‍ തുടങ്ങി എന്ന് കണ്ടത്. എങ്കില്‍ പിന്നെ നമുക്കും ഒരു ചാനല്‍ എന്തുകൊണ്ട് ചെയ്തുകൂട എന്ന ചിന്തിച്ചു. സീരിയല്‍ കാണാത്തവരും യൂട്യൂബില്‍ കണ്ട് സംസാരിക്കാന്‍ വരാറുണ്ട്. വളരെ നല്ല അഭിപ്രായം പറയുമ്പോള്‍ സന്തോഷമാണ്. എന്നെ മാത്രമല്ല, എന്റെ ഭാര്യയെയും മക്കളെയും എല്ലാം എല്ലാവര്‍ക്കും അറിയാം, പുറത്ത് വച്ച് കാണുമ്പോള്‍ അവരുടെയൊക്കെ പേര് എടുത്ത് വിളിച്ച് കാര്യങ്ങള്‍ തിരക്കുമ്പോള്‍ വളരെ അധികം സന്തോഷം തോന്നും- ആനന്ദ് നാരായണന്‍ പറഞ്ഞു