കഴിഞ്ഞ ദിവസമായിരുന്നു മോശം സേവനത്തിന്റെ പേരില്‍ എയര്‍ ഇന്ത്യയെ വിമര്‍ശിച്ച് നടിയും ബിജെപി നേതാവുമായ ഖുശ്ബു സുന്ദര്‍ രംഗത്ത് എത്തിയിരുന്നത്. ഇപ്പോഴിതാ നടിയോട് ക്ഷമ ചോദിച്ചിരിക്കുകയാണ് എയര്‍ ഇന്ത്യ. ജനുവരി 31നാണ് ചെന്നൈ എയര്‍പോര്‍ട്ടില്‍ കാലിന് പരിക്കുപറ്റിയ താന്‍ ഒരു വീല്‍ചെയറിനായി അരമണിക്കൂര്‍ കാത്തുനിന്നുവെന്ന് ഖുശ്ബു ട്വീറ്റ് ചെയ്തത്.
മറ്റൊരു എയര്‍ലൈനില്‍ നിന്നും വീല്‍ ചെയര്‍ വാങ്ങിയാണ് തനിക്ക് നല്‍കിയതെന്നും ഖുശ്ബു പറയുന്നു. നിങ്ങള്‍ക്ക് ഇതില്‍ കൂടുതല്‍ നന്നായി ചെയ്യാന്‍ സാധിക്കുമെന്നും ഖുശ്ബു എയര്‍ ഇന്ത്യയെ ഓര്‍മ്മിപ്പിക്കുന്നു. പിന്നാലെ ഖുശ്ബുവിന്റെ ട്വീറ്റ് സോഷ്യല്‍ മീഡിയയില്‍ വ്യാപകമായി ചര്‍ച്ചയായതോടെ ക്ഷമാപണവുമായി എത്തിയിരിക്കുകയാണ് എയര്‍ ഇന്ത്യ.
ഈ അടുത്താണ് ഒരു അപകടത്തില്‍ ഖുശ്ബുവിന്റെ കാലിന് പരിക്കേറ്റത്. ഇതിന്റെ ചിത്രങ്ങള്‍ ഖുശ്ബു സോഷ്യല്‍ മീഡിയയില്‍ പങ്കുവച്ചിരുന്നു. അതേസമയം, അവസാനം വാരിസിലാണ് ഖുശ്ബു അഭിനയിച്ചിരുന്നത്. എന്നാല്‍ ആ ചിത്രത്തില്‍ ഖുശ്ബുവിന്റെ രംഗങ്ങള്‍ വെട്ടിമാറ്റിയത് വിവാദമായിരുന്നു,
സിനിമ കണ്ട പ്രേക്ഷകര്‍ ആരും ഖുശ്ബുവിനെ കണ്ടില്ല. ചിത്രത്തില്‍ ചെറിയ വേഷം ചെയ്തതിന് നടന്‍ വിജയ് തന്നെ നേരിട്ട് ഓഡിയോ ലോഞ്ചിനിടെ നന്ദി പറഞ്ഞ നടി തീയറ്ററില്‍ കാണിച്ച സിനിമയില്‍ എവിടെയും ഇല്ല. സിനിമയില്‍ നായികയായ രശ്മിക മന്ദാനയുടെ അമ്മ റോളിലായിരുന്നു ഖുശ്ബു അഭിനയിച്ചത് എന്നായിരുന്നു അണിയറയിലെ സംസാരം.
എന്നാല്‍ സ്‌ക്രീനില്‍ ഈ കഥാപാത്രം ഇല്ല. നേരത്തെ വാരിസ് ലോക്കേഷനില്‍ നിന്നും രശ്മികയും, വിജയിയും, ഖുശ്ബുവും സെല്‍ഫി എടുക്കുന്ന ഖുഷ്ബുവിന്റെ ചിത്രം വൈറലായിരുന്നു. വാരിസ് അണിയറക്കാര്‍ തന്നെ ഇത് പ്രമോഷന്റെ ഭാഗമായി ഉപയോഗിച്ചിരുന്നു. എന്നിട്ടും സ്‌ക്രീനില്‍ താരം ഇല്ലാതിരുന്നതാണ് ആരാധകരെ ചൊടിപ്പിച്ചത്.