News
വിജയിയോടുള്ള ആരാധന.., വാരിസിനായി ഒരു രൂപ പോലും പ്രതിഫലം വാങ്ങാതെ ചിമ്പു
വിജയിയോടുള്ള ആരാധന.., വാരിസിനായി ഒരു രൂപ പോലും പ്രതിഫലം വാങ്ങാതെ ചിമ്പു
തെന്നിന്ത്യയില്‍ നിരവധി ആരാധകരുള്ള താരമാണ് വിജയ്. സോഷ്യല്‍ മീഡിയയിലെല്ലാം വളരെപ്പെട്ടെന്നാണ് അദ്ദേഹത്തിന്റെ വിശേഷങ്ങള്‍ വൈറലായി മാറുന്നത്. ഇപ്പോഴിതാ വിജയുടെ പുത്തന്‍ ചിത്രമായ ‘വാരിസി’ലെ ‘തീ ദളപതി’ എന്ന ഗാനം ഇതിനോടകം തന്നെ ഹിറ്റ് ചാര്‍ട്ടുകളില്‍ ഇടം നേടി കഴിഞ്ഞിരിക്കുകയാണ്.
എസ് തമന്റെ സംഗീതത്തില്‍ ഒരുങ്ങിയ ഗാനം പാടിയത് നടന് ചിമ്പുവാണ്. ഈ ഗാനത്തെക്കുറിച്ചുള്ള പുതിയ റിപ്പോര്‍ട്ടുകളാണ് ഇപ്പോള്‍ ചര്‍ച്ചയാകുന്നത്. ‘തീ ദളപതി’ ഗാനം പാടുവാനായി ചിമ്പു പ്രതിഫലം വാങ്ങിയില്ലെന്നാണ് റിപ്പോര്‍ട്ടുകള്‍ പറയുന്നത്. വിജയിയോടുള്ള ആരാധനയും തമനുമായുള്ള സൗഹൃദവും മൂലമാണ് ചിമ്പു പ്രതിഫലം നിരസിച്ചത്.
സിനിമയുടെ ഓഡിയോ ലോഞ്ചില്‍ വെച്ച് വിജയ് തന്നെയാണ് ഇക്കാര്യം അറിയിച്ചത്. തനിക്കായി ഈ ഗാനം ആലപിച്ചതിന് വിജയ് നടനോട് നന്ദി പറയുകയും ചെയ്തു. പൊങ്കല്‍ റിലീസായി 2023 ജനുവരിയിലാണ് വാരിസ് തിയേറ്ററുകളില്‍ എത്തുക.’മഹര്‍ഷി’ സംവിധായകന്‍ വംശി പൈഡിപ്പള്ളിയാണ് വാരിസ് സംവിധാനം ചെയ്യുന്നത്.
വളര്‍ത്തച്ഛന്റെ മരണത്തെത്തുടര്‍ന്ന് കോടിക്കണക്കിന് ഡോളര്‍ ബിസിനസ്സ് സാമ്രാജ്യത്തിന് ഉടമയാകുന്ന വിജയ് രാജേന്ദ്രന് എന്ന കഥാപാത്രത്തെയാണ് വിജയ് സിനിമയില്‍ അവതരിപ്പിക്കുന്നത്. ശരത് കുമാറാണ് നടന്റെ അച്ഛനായി എത്തുന്നത്. ശ്രീ വെങ്കടേശ്വര ക്രിയേഷന്‍സിന്റെ ബാനറില്‍ ദില്‍ രാജുവും ശിരീഷും ചേര്‍ന്നായിരിക്കും ചിത്രത്തിന്റെ നിര്‍മ്മാണം.
സിനിമയില്‍ ഒരു പ്രധാന കഥാപാത്രമായി എസ് ജെ സൂര്യയും എത്തുന്നുണ്ട്. വിജയ്യും എസ് ജെ സൂര്യയും ഒന്നിക്കുന്ന നാലാമത്തെ ചിത്രമാണ് ‘വാരിസ്’. രശ്മിക മന്ദാനയാണ് നായിക. പൂജ ഹെഗ്‌ഡെ, കിയാര അദ്വാനി ഉള്‍പ്പെടെയുള്ളവരെ വിജയ് ചിത്രത്തിനായി പരിഗണിച്ചെങ്കിലും ഒടുവില്‍ രശ്മികയെ തെരഞ്ഞെടുക്കുകയായിരുന്നു എന്നാണ് റിപ്പോര്‍ട്ട്. പ്രഭു, ജയസുധ, ശരത്കുമാര്‍, ഖുശ്ബു, ശ്രീകാന്ത്, ഷാം, സംഗീത കൃഷ്, സംയുക്ത, യോഗി ബാബു തുടങ്ങിയവരും ചിത്രത്തില്‍ പ്രധാന താരങ്ങളാണ്.
