Malayalam
അസിഡിറ്റി ഗായകരെ പെട്ടെന്ന് ബാധിക്കും, ചിത്ര ചേച്ചിക്കൊപ്പം കൂടിയതില്‍ പിന്നെയാണ് എനിക്ക് അടുക്കും ചിട്ടയും വന്നത്; ഗായകരുടെ ആഹാര രീതികളെ കുറിച്ച് സിത്താര കൃഷ്ണകുമാർ
അസിഡിറ്റി ഗായകരെ പെട്ടെന്ന് ബാധിക്കും, ചിത്ര ചേച്ചിക്കൊപ്പം കൂടിയതില്‍ പിന്നെയാണ് എനിക്ക് അടുക്കും ചിട്ടയും വന്നത്; ഗായകരുടെ ആഹാര രീതികളെ കുറിച്ച് സിത്താര കൃഷ്ണകുമാർ
നിരവധി ആരാധകരുള്ള ഗായകിയാണ് സിത്താര കൃഷ്ണകുമാർ. വ്യത്യസ്തമായ ശബ്ദത്തിലൂടെ ശ്രദ്ധ നേടിയ സിത്താര നിരവധി ഹിറ്റ് ഗാനങ്ങൾ പാടി. ഇന്ന് സിത്താരയുടെ പാട്ടുകൾക്ക് വലിയൊരു ആരാധക വൃന്ദമുണ്ട്. റിയാലിറ്റി ഷോകളിൽ മത്സരാർത്ഥിയായി എത്തിയ സിത്താര പിന്നീട് പിന്നണി ഗായികയായി ശ്രദ്ധ നേടുകയായിരുന്നു.
സോഷ്യൽ മീഡിയയിൽ വളരെ സജീവമായ സിത്താരയുടെ വിശേഷങ്ങളെല്ലാം തന്നെ വളരെപ്പെട്ടെന്നാണ് വൈറലായി മാറുന്നത്. ഇപ്പോഴിതാ ഗായകരുടെ ആഹാര രീതികളെ കുറിച്ച് സിത്താര പറഞ്ഞ വാക്കുകളാണ് സേഷ്യൽ മീഡിയയിൽ വൈറലാകുന്നത്.
ഗായകര്‍ക്ക് അസിഡിറ്റി പെട്ടെന്ന് ബാധിക്കും. അതുകൊണ്ട് പുളി കഴിക്കാറില്ല, കൂടാതെ തണുത്തതൊന്നും താന്‍ കഴിക്കാറില്ല എന്നാണ് സിത്താര പറയുന്നത്. പൊതുവേ തണുപ്പ് തൊണ്ടയ്ക്ക് ബുദ്ധിമുട്ടുണ്ടാക്കാറുണ്ട്. എസ്പിബി സാര്‍ ഐസ്‌ക്രീം കഴിക്കുമായിരുന്നു. പക്ഷേ, എനിക്കത് പ്രശ്നമല്ലെന്ന് കരുതി നിങ്ങള്‍ക്ക് അങ്ങനെയാകണമെന്നില്ല എന്ന് പറയുമായിരുന്നു.
എല്ലാവരുടെയും ശരീരവും അതിന്റെ പരിധികളും പരിമിതികളും വ്യത്യസ്തമാണ്. ഓരോരുത്തരുടെയും അരുതുകള്‍ വെവ്വേറെയാണ്. അസിഡിറ്റി ഗായകരെ പെട്ടെന്ന് ബാധിക്കും. അതുകൊണ്ട് ഭക്ഷണം ശ്രദ്ധിച്ചേ പറ്റൂ. ചിലര്‍ക്ക് തണുപ്പ് കഴിച്ചാലും പ്രശ്നം ഉണ്ടാകില്ല. പക്ഷേ, പുളി ഒട്ടും പറ്റുന്നുണ്ടാകില്ല. ഞാന്‍ തണുത്തതൊന്നും അങ്ങനെ കഴിക്കാറില്ല.
പുളി ഒട്ടുമില്ലാത്ത തൈര് കഴിക്കും. സ്റ്റാര്‍ സിംഗറില്‍ ചിത്ര ചേച്ചിക്കൊപ്പം കൂടിയതില്‍ പിന്നെയാണ് എനിക്ക് അടുക്കും ചിട്ടയും വന്നത്. ചിത്രച്ചേച്ചി എവിടെ പോയാലും ബാഗില്‍ തണുപ്പിച്ചാറിയ വെള്ളം കാണും. എരിവും പുളിയുമുള്ള ഭക്ഷണം ചേച്ചി ഒഴിവാക്കും. ആര്‍ക്ക് പെട്ടെന്ന് ഒരു അസുഖം വന്നാലും ചേച്ചിയുടെ ബാഗില്‍ മരുന്ന് കാണും.
ആ ശ്രദ്ധയും സംഗീതത്തോടുള്ള സമര്‍പ്പണവും എന്റെ കാഴ്ചപ്പാടുകള്‍ തിരുത്തി. പുറത്തു നിന്നുള്ള ഭക്ഷണം കഴിക്കല്‍ ഞാന്‍ കുറച്ചു. സ്വന്തമായി ടിഫിന്‍ കൊണ്ടുപോയി തുടങ്ങി. സംഗീതം കൊണ്ടും ജീവിതശൈലി കൊണ്ടും ചിത്രച്ചേച്ചി എനിക്ക് വഴി വെട്ടമാണ് എന്നുമാണ് സിത്താര പറയുന്നത്.
കാർഡിയോളജിസ്റ്റായ ഡോ. സജീഷ് എം ആണ് സിത്താരയുടെ ഭർത്താവ്. 2007 ലായിരുന്നു വിവാഹം. ക്ലാസിക്കൽ ഡാൻസറായാണ് സിത്താര കരിയർ തുടങ്ങുന്നത്. പിന്നീട് ഗായികയായി മാറുകയായിരുന്നു. 2007 ൽ അതിശയൻ എന്ന സിനിമയിൽ പാടിയാണ് സിത്താര പിന്നണി ഗാനരംഗത്തേയ്ക്ക് ചുവട് വെയ്ക്കുന്നത്.
